Bụ́kụ̃
Yósũwã
drị̂
Ị́jọ́ icélé bụ́kụ̃ Yósũwã drị̂ drị̃ gá rĩ
Bụ́kụ̃ Yósũwã drị̂ mụ drị̃ gá áꞌdígó ꞌBá Ịsịrayị́lị̃ drị̂ trũ iꞌdójó ãngũ bụ́kụ̃ Ãzị́táŋá Amviŋá drị̂ ꞌbã ãsị̃jó rĩ gá. ꞌBá Ịsịrayị́lị̃ drị̂ iꞌdó kí ãcị̃ ị̃yị́ Yõrĩdánĩ drị̂ ꞌbã wókõ ị̃tụ̂ ꞌbã ãfũjó rĩ gâlé ru. Bụ́kụ̃ Yósũwã drị̂ icé dó sĩ ị́jọ́ ꞌbá Ịsịrayị́lị̃ drị́ ꞌdĩ za kí ị̃yị́ Yõrĩdánĩ drị́ ꞌdĩ íngoní ru yã rĩ ꞌbã drị̃ gá ãzíla ꞌdụ kí ãngũ Kãnánĩ drị̂ drị̃lẹ́ ĩꞌbadrị́ Yósũwã ándrá filépi Mụ́sã ꞌbã kẹ̃jị́ gá rĩ ꞌbã pálé gá íngoní ru yã rĩ ꞌbã drị̃ gá. ꞌBá ꞌdĩ nga kí ị́jọ́ ꞌdĩ íni la Ãdróŋá ꞌbã ĩꞌbaní ãzị́táŋá la fẽjó nĩ rĩ sĩ. Ãdróŋá ri ị́jọ́ ándrá ĩꞌdi ꞌbã azịlé sĩ ãngũ Kãnánĩ drị̂ fẽjó anzị ãfũlépi Ịbụrahị́mụ̃ rụ́ rĩ ꞌbaní rĩ umvilé. (Íꞌdóŋá 12:7)
Únị̃ ãꞌdị sĩ bụ́kụ̃ Yósũwã drị̂ nĩ yã rĩ gá ku. Sáwã ãzí kí agá ĩꞌdi indré ꞌbá bụ́kụ̃ ꞌdĩ sĩlépi ri ándrá sáwã ị́jọ́ ꞌdĩ ꞌbã kí ru idéjó rĩ gá cí rĩ áni. (Ícétáŋá sĩ Yósũwã 5:1, 6) Ị́jọ́ ꞌdĩ sĩ ꞌbá ụ̃nị̃táŋá Bĩbĩlíyã drị̂ trũ ĩyõ rĩ ũrã kí dó sĩ Yósũwã sĩ bụ́kụ̃ ꞌdĩ ꞌbã ãndâ la nĩ. Wó ị́jọ́ bụ́kụ̃ ꞌdĩ ꞌbã wókõ ãzí ri kí ꞌbá ãzí ndú la sĩ kí nĩ adru Yósũwã ꞌi ku rĩ iꞌda ru pịrị-pịrị, cécé ꞌbání ị́jọ́ nzejó drã Yósũwã drị̂ ꞌbã drị̃ gá rĩ ꞌi. (Yósũwã 24: 29)
ꞌBá ãzí ụ̃nị̃táŋá Bĩbĩlíyã drị̂ trũ ĩyõ rĩ ũrã kí úsĩ bụ́kụ̃ ꞌdĩ ꞌi ãnirú ílí 800 ị́jọ́ ꞌdĩ ꞌbã kí ru ngajó ꞌbo rĩ ꞌbã ũngúkú gá. Ị́jọ́ ru ngalépi sĩ ị́jọ́ sĩjó kí drị̃ gá bụ́kụ̃ ꞌdĩ agá rĩ icó kí ru idélé ãnirú ílí 1250 sĩ ꞌdĩ sĩ útĩ drĩ Yẹ́sụ̃ ꞌi ku rú. Ị́jọ́ ꞌdĩ icó kí dó sĩ ru ngalé ílí 40 Rãmẽsésĩ ꞌbã ũpĩ najó Mị̃sị́rị̃ gá rĩ ꞌbã vúlé gá. Rãmẽsésĩ ĩꞌdi úpí ꞌbání ũrãlé ri ũpĩ nalé sáwã ꞌbá Ịsịrayị́lị̃ drị̂ ꞌbã kí ãngũ Mị̃sị́rị̃ drị̂ aꞌbejó rĩ sĩ rĩ ꞌi. (Ãfũŋá 1:11)
1
Ãdróŋá azị Yósũwã Ịsịrayị́lị̃ kí drị̃ celé
1 Ãtíꞌbó Úpí drị́ Mụ́sã la dó mụ drãlé ꞌbo, Úpí jọ Yósũwã Nụ́nị̃ ngọ́pị ándrá Mụ́sã ãzã kolépi rĩ ní, 2 “Ãtíꞌbó mádrị́ Mụ́sã drã dó ꞌbo. Ị́jọ́ ꞌdĩ sĩ mi ꞌi ãzíla ꞌbá pírí Ịsịrayị́lị̃ drị̂ kí abe ĩmi adru dó bábá sĩ mĩrĩ Yõrĩdánĩ zajó, ĩmi dó sĩ mụ filé ãngũ mání mụlé fẽlé ĩmi ꞌbá Ịsịrayị́lị̃ rú ꞌdĩ ꞌbaní rĩ gá. 3 Ma mụ ãngũ pírí ĩminí sĩ pá ꞌbãjó ala gá ꞌbo rĩ kí fẽlé ĩminí cécé mání ándrá azịlé Mụ́sã ní rĩ áni. 4 Iꞌdójó kõtórõ Nẹ̃gẹ́vụ̃ drị̂ gá ándrá cajó ãngũ ꞌbé ꞌa rú Lébãnõnĩ drị̂ gá ụ́rụ́, angájó mĩrĩ Ũfũrátĩ drị̂ gá ị̃tụ̂ ꞌbã ãfũ agâlé ru cajó mĩrĩ Mẽdĩtẽránĩyãnĩ drị̂ gá ị̃tụ̂ ꞌbã ꞌde agâlé ru, umú ãngũ ꞌbá Hị́tị̃ rú rĩ ꞌbadrị̂ pírí ĩndĩ. 5 Ụ́ꞌdụ́ míní adrujó ídri rú rĩ kí agá pírí, mẹ́rọ́ꞌbá ãzí ãlu la icó ími ndẽlé ku. Cécé ándrá mání adrujó Mụ́sã be rĩ áni, ma vâ mụ adrulé mí be ꞌdã ꞌbã áni. Má icó ími aꞌbelé ku, má icó vâ ími gãlé ku. 6 Mí adru ũkpó ru ãzíla ími ásị́ ꞌbã mba-mbã ãꞌdusĩku mi mụ ꞌbá ꞌdĩ kí drị̃ celé sĩ mụjó ãngũ ándrá mání ũyõ la najó ma fẽ la ĩꞌbã áyị́pịka ꞌbaní ãwítã rú rĩ ꞌdụjó. 7 Mí adru jõ ũkpó ru ãzíla ími ásị́ ꞌbã mba jõ ũkpómgboroto rú sĩ ị́jọ́ kí idéjó ásị́ pírí sĩ, mí adru jõ mịfị́ trũ sĩ ãzị́táŋá ãtíꞌbó Mụ́sã ꞌbã azịlé míní rĩ kí tá mbajó pírí; mí uja jõ mi kí agá rĩ sĩ drị́ ãndá gá ku jõku drị́ ị̃jị́ gá ku, ị́jọ́ ꞌdĩ sĩ mi dó sĩ adru drị̃lẹ́ba rú ãngũ cí míní mụjó rĩ gá. 8 Lẽ ílã bụ́kụ̃ ãzị́táŋá drị́ ꞌdĩ ụ́ꞌdụ́ pírí sĩ, mí ũrã ị́jọ́ drị̃ la gá ị̃tụ́ kí ị́nị́ be, ị́jọ́ ꞌdĩ sĩ mi dó sĩ adru mịfị́ trũ sĩ ị́jọ́ sĩlé ala gá ꞌdĩ kí idéjó pírí. ꞌDã ꞌbã ũngúkú gá, mi dó sĩ adru málĩ trũ ãzíla drị̃lẹ́ba rú ị́jọ́ pírí míní ngalé rĩ kí agá. 9 Má azị ándrá míní lẽ mí adru ũkpó ru ãzíla ími ásị́ ꞌbã mba-mbã rĩ gá ku yã? Mí idé ụ̃rị̃ sĩ ku, ími ásị́ ꞌba umvú ku, ãꞌdusĩku Úpí Ãdróŋá mídrị̂ la adru mí be ãngũ cí míní mụjó rĩ gá.”
Yósũwã itú ꞌbá kí sĩ Kãnánĩ ꞌdụjó
10 ꞌDã ꞌbã ũngúkú gá, Yósũwã azị dó ị́jọ́ ꞌbá ãmbogo rú Ịsịrayị́lị̃ drị̂ ꞌbaní jọ, 11 “Ĩmụ kámbĩ agâsĩ ãzíla ĩmi ũlũ ꞌbá ꞌbaní, ‘Ĩmi itú ĩmi bábá ãko ĩmidrị̂ kî trũ ãꞌdusĩku ụ́ꞌdụ́ na vúlé gá ĩmi mụ mĩrĩ Yõrĩdánĩ zalé sĩ mụjó ãngũ Úpí Ãdróŋá ĩmidrị̂ ꞌbã mụlé fẽlé ĩmi ãni la rú rĩ ꞌdụjó.’ ”
12 Yósũwã jọ sụ́rụ́ Rụ́bẹ̃nị̃ drị́, Gádĩ drị́ ãzíla sụ́rụ́ Mãnásẽ drị̂ ꞌbã nụ́sụ̃ ꞌbaní, 13 “Ĩmi agá drĩ ị́jọ́ ãtíꞌbó Úpí drị́ Mụ́sã ꞌbã azịlé ĩminí ĩꞌdi ꞌbã sĩ jọjó la ‘Úpí Ãdróŋá ĩmidrị̂ la ĩminí ãngũ sĩ avị́jó la fẽ rĩ, ãzíla fẽ ĩminí ãngũ lê ꞌbo.’ 14 Ũkú ĩmidrị̂ kí, anzị ĩmidrị̂ kí ãzíla ãnãkpá ĩmidrị̂ kí abe kí mụ acelé ãngũ Mụ́sã ꞌbã fẽlé ĩminí mĩrĩ Yõrĩdánĩ ꞌbã wókõ ị̃tụ̂ ꞌbã ãfũ agâlé ru ꞌdĩ gá ꞌdâ, wó ãgọbị ãꞌdị́ drị̂ kí mụ drị̃ gá sĩ ĩmi ádrị́pịka kí ãzã kojó sĩ kí irijó ãngũ ĩꞌbadrị̂ kí agá, 15 kpere Úpí ꞌbã ĩmi ádrị́pịka ꞌbaní ávị́ŋá fẽ agá cécé ĩꞌdi ꞌbã fẽjó la ĩminí avị́jó rĩ áni ãzíla ĩꞌbaní ãngũ Úpí Ãdróŋá ĩmidrị̂ ꞌbã fẽlé ĩꞌbaní rĩ ꞌdụjó rĩ áni. ꞌDã ꞌbã ũngúkú gá, ĩmi dó sĩ gõ ãngũ ĩminí ꞌdụlé ĩmi ãni la rú rĩ gá, ꞌdĩ ãngũ ãtíꞌbó Úpí drị́ Mụ́sã ꞌbã fẽlé ĩminí Yõrĩdánĩ ꞌbã wókõ ị̃tụ́ ꞌbã ãfũ agâlé ru rĩ gá rĩ ꞌi.” 16 Umvi kí Yósũwã ní, “Ị́jọ́ pírí míní azịlé rĩ kí ãma kí nga rá ãzíla ãngũ cí míní ãma tị pẽjó rĩ gá ãma mụ rá. 17 Cécé ãmaní ándrá Mụ́sã ꞌbã tị arejó ị́jọ́ pírí kí agá rĩ áni, ị́jọ́ ꞌdĩ sĩ ãma vâ ími tị are rá. Úpí Ãdróŋá mídrị̂ ꞌba adru mí be cécé ĩꞌdi ꞌbã ándrá adrujó Mụ́sã be rĩ áni. 18 ꞌBá ị́jọ́ míní azịlé rĩ kí gãlépi úgmbé ãzíla ími tị arelépi ku, ị́jọ́ míní jọlé rĩ ngalépi ku rĩ lẽ úꞌdị ĩꞌdi rá. Mí adru ũkpó ru ãzíla ími ásị́ ꞌbã mba-mbã.”