2
Ị́jọ́ ụndrị́jó aꞌdéŋá Táwụ̃nị̃ Nị̃nẹ́vẹ̃ drị̂ ꞌbã drị̃ gá rĩ
1 Táwụ̃nị̃ Nị̃nẹ́vẹ̃ drị̂, mẹ́rọ́ꞌbá kí amụ́ ími celé ꞌdĩ!
Ĩꞌbã ãsĩkárĩ kí ãngũ sịlé ũkpó rĩ sị́ gá sĩ mẹ́rọ́ꞌbá kí undréjó,
Ĩtẽ gẹ̃rị̃ afílépi táwụ̃nị̃ ĩmidrị̂ agá rĩ andre tẽtẽ!
Ĩmi itú ãsĩkárĩ ĩmidrị̂ kí ãꞌdị́ ní bábá,
ĩmi itú ĩmi ũkpó ru ãꞌdị́ ní bábá.
2 Mẹ́rọ́ꞌbá drĩ kí táni ũri Yãkóꞌbõ drị̂ kí ị̃lị̃kị̃ rá tí,
ace were Úpí la dị̃zã ĩꞌbadrị̂ ají vúlé rá.
Ịsịrayị́lị̃ ĩꞌdi cécé zãbíbũ izalé rá rĩ áni
wó ĩꞌdi mụ dị̃zã ịsụ́lé úꞌdí ru rá.
3 Gọ́bẹ́rẹ́ ãsĩkárĩ ũkpó mẹ́rọ́ꞌbá ru rĩ ꞌbadrị̂ kí ika rú,
sụ̃ kí bõngó ika rú.
Aya gárĩ ĩꞌbadrị́ ãꞌdị́drị̂ drị̂ kí dị̃ ãcí áni,
ị̃tụ́ sĩ ídé kí bábá;
kí ãjụ́ ĩꞌbadrị̂ kí iwi ũlí agá ꞌdâ.
4 Gárĩ ĩꞌbadrị́ ãꞌdị́drị̂ kí ụ̃cẹ̃ ũkpó sĩ gẹ̃rị̃ kí agâsĩ
drị̃ gá vúlé drị̃ gá vúlé ãngũ cí rĩ agá.
Kí indré cécé ãcí ãngũ jilépi rĩ áni
kí ují ndrí-ndrí ãvi áni.
5 Úpí mẹ́rọ́ꞌbá ꞌbadrị̂ fẽ ãzị́táŋá ãsĩkárĩ ĩꞌdidrị́ ĩꞌdi ꞌbã pẽlé ndú rĩ ꞌbaní,
wó icó kí mụlé ãꞌdị́ trũ drị̃ gá ku
afụ kí ru bõrõ táwụ̃nị̃ drị̂ gá,
idé kí ãngũ sĩ ru zị̃jó rĩ bábá ꞌbo.
6 Únzị̃ ị̃yị́ tị kí mgbọ
ãzíla lị́cọ́ úpí drị̂ asu dó rá.
7 Ũtrũ kí ũkú Hũzábũ ꞌi pílílí ru,
agụ kí ĩꞌdi ãmị́yọ́ŋá ãngũ gá.
Izonzị ĩꞌdidrị́ ãtiꞌbo rú rĩ ri kí awálé ĩꞌdi sĩ, kí awá cécé ãmámũ áni,
kí dị̃ ru jụ́jụ́ dị sĩ.
8 ꞌBá Táwụ̃nị̃ Nị̃nẹ́vẹ̃ drị̂ agá rĩ acá kí dó cécé ị̃yị́ kídí ru rĩ áni,
ꞌbá alagá rĩ kí apá cécé ị̃yị́ ꞌbã dịjó rĩ áni.
ꞌBá ãzí kí uzá ụ́ꞌdụ́kọ́ ụrụgá sĩ, “Ĩtu pá! Ĩtu pá!”
Wó ꞌbá ãzí ãgõlépi la ꞌdáyụ.
9 Ĩmụ, ĩra sílĩvã kî!
Ĩmụ, ĩra gólũdĩ kî!
Ãko ĩꞌbã kí tãmbalé rĩ ce kí ị̃ndụ́ ku,
ꞌdĩ málĩ ĩꞌbã kí tãmbalé ĩrá ĩꞌbadrị̂ agá rĩ kî.
10 Ị̂lị̃kị̃ dó táwụ̃nị̃ Nị̃nẹ́vẹ̃ drị̂ rá,
úra ãko ala gá rĩ kí rá ãzíla acá dó sĩ ándrú ru!
Kí ásị́ ri akálé akâ ãzíla kí ãja ri aꞌbịlé aꞌbị̂,
kí ụrụꞌbá ri yãlé ụ̃rị̃ drị́ yã yã.
11 Táwụ̃nị̃ Nị̃nẹ́vẹ̃ drị́ ándrá adrulépi ꞌbụ́ kẹ̃mị̃ drị̂ áni rĩ dó íngõlé yã?
Ãngũ ĩꞌbã kí ándrá sĩ ĩꞌbã mvaka kí undrujó rĩ kí dó íngõlé yã?
Ãngũ kẹ̃mị̃ ágó rĩ ꞌbã kí jõ sĩ mụjó ãrónĩ rĩ kí abe
mvaka la ꞌbã kí jõ sĩ uꞌájó ala gá múké rĩ kí dó íngãá yã?
12 Kẹ̃mị̃ ucí dó ĩzá ĩꞌdi ꞌbã mvaka ꞌbaní calépi rĩ sĩ
ãzíla ụꞌdị́ ãnãkpá kí ĩꞌdi ꞌbã wọ̃rị́ka ꞌbaní ĩndĩ,
ãngũ ĩꞌdidrị́ ĩzá tã mbajó rĩ ga tré ĩzá sĩ
ãzíla ꞌbụ́ ĩꞌdidrị̂ ga kí ĩndĩ
13 Úpí Ũkpó ꞌdị́pị jọ,
“Má acá dó ĩmĩ mẹ́rọ́ꞌbá ru,
ma gárĩ ĩmidrị́ ãꞌdị́drị̂ kí ivé rá
ãzíla ãsĩkárĩ ĩmidrị̂ kí ũdrã ãꞌdị́ gá ménéŋá sĩ.
Ma ãko ĩminí arálé ꞌbá ãzí rĩ ꞌbadrị́ rĩ kí upa rá.
ꞌBá ĩminí ụ́ꞌdụ́kọ́ ujílépi rĩ kí
ĩmi icó kí ụ́ꞌdụ́kọ́ arelé ị̃dị́ ku.”