2
Ụ̃rọ̃drị́ ịsụ́lé ũndũwá sĩ rĩ
1 Mâ ngọ́pị, ídrĩ ị́jọ́ mádrị̂ kí ãꞌị̃ rá
ãzíla ídrĩ ãzị́táŋá mádrị̂ kí tã mba ími ásị́ gá rá,
2 bị́lẹ́ ꞌbãjó sĩ ị́jọ́ ũndũwã drị̂ arejó,
ãzíla míní ásị́ fẽjó sĩ ị́jọ́ vãjó,
3 ídrĩ ị́jọ́ ífí vãjó múké-múké rĩ aꞌị́ rá
ãzíla ídrĩ ími ụ́ꞌdụ́kọ́ inga sĩ ị́jọ́ vãŋá aꞌị́jó,
4 ídrĩ ĩꞌdi ndrụ̃ cécé míní sílĩvã ndrụ̃jó rĩ áni
ãzíla ídrĩ ĩꞌdi ndrụ̃ cécé málĩ zị̃lé zị̃zị̃ rĩ ndrụ̃jó rĩ áni,
5 ꞌdã ꞌbã ũngúkú gá mi dó nị̃la ála Úpí Ãdróŋá ụ̃rị̃ íngoní ru yã rĩ gá rá,
ãzíla mi nị̃táŋá sĩ Úpí nị̃jó rĩ ịsụ́ rá.
6 Ãꞌdusĩku Úpí la ũndũwá fẽ nĩ
ãzíla tị la gá ũndũwã ãzíla vãtáŋá la ãfũ nĩ.
7 Ãdróŋá la ꞌbá ị́jọ́ pịrị rĩ ngalépi rĩ fẽ alịlé ị́jọ́ ũkpó rĩ kí agâ sĩ,
ĩꞌdi gọ́bẹ́rẹ́ ꞌbá ị́jọ́ pịrị rĩ ngalépi rĩ ꞌbadrị̂ rú nĩ,
8 ãꞌdusĩku ĩꞌdi ꞌbá ꞌbá kí ị́jọ́ lịlẹ́pi pịrị-pịrị rĩ kí tã mba,
ãzíla ĩꞌdi ꞌbá ãꞌị̃táŋá trũ rĩ kí tã mba nĩ.
9 ꞌDã ꞌbã ũngúkú gá mi dó ị́jọ́ pịrị rĩ vã ãzíla ị́jọ́ liŋá pịrị rĩ nị̃ rá,
mi dó sĩ nị̃ ị́jọ́ múké rĩ nga sĩ cé.
10 Ị́jọ́ ꞌdĩ sĩ mi dó sĩ acá ũndũwã rú
ãzíla nị̃táŋá la dó sĩ míní ãyĩkõ fẽ.
11 Ị́jọ́ amálé pịrị rĩ la ími tãmba
ãzíla ị́jọ́ vãŋá la ími drị̃ ce nĩ.
12 Ũndũwã la ími pa ꞌbá ũnzí rĩ kí drị́ gá
ãzíla ꞌbá ị́jọ́ jọlépi mũlũmbẽ sĩ rĩ kí drị́ gá.
13 Ĩꞌdi ími pa ꞌbá gẹ̃rị̃ pịrị rĩ aꞌbelépi rá
acị́lépi ị́nị́ agá ꞌdĩ kí drị́ gá.
14 Ĩꞌdi ími pa ꞌbá uꞌálépi ãyĩkõ sĩ ị́jọ́ ũnzí idéŋá sĩ
ãzíla uꞌálépi ãyĩkõ sĩ ị́jọ́ ũnzí ꞌbá ꞌbã kí idélé rĩ kí sĩ rĩ kí drị́ gá.
15 Ĩꞌdi ími pa ꞌbá gẹ̃rị̃ ĩꞌbadrị̂ kí sĩ adrujó gọ́ꞌdọ́ ru rĩ kí drị́ gá,
ãzíla ꞌbá úlétáŋá ru rĩ kí drị́ gá.
16 Ũndũwã la vâ ími pa ũkú ãwụ́ꞌbá ru
mịfị́ ãcí ị́jọ́ jọlépi tị ũré sĩ ꞌdĩ kí sĩ,
17 ágó ĩꞌdidrị́ ĩzõnzĩ sĩ rĩ aꞌbelépi rá
ãzíla tị icíma ándrá ĩꞌdi ꞌbã icílé Ãdróŋá drị̃lẹ́ gá rĩ gãlépi úmgbé rĩ drị́ agá.
18 Ãꞌdusĩku ídrĩ fi jó ĩꞌdidrị̂ agá mi acị́ gẹ̃rị̃ ĩmi agụlépi drã gá rĩ agâ sĩ.
Míní mụjó gẹ̃rị̃ ĩꞌdidrị̂ agâ sĩ rĩ la ími agụ ãngũ ꞌbá drãlépi rá rĩ ꞌbadrị̂ gá.
19 ꞌBá ãzí mụlépi ĩꞌdi rụ̂lé ãgõlépi rá
ãzíla ídri ꞌbã gẹ̃rị̃ ịsụ́lépi rá la ꞌdá yụ.
20 Ị́jọ́ ꞌdĩ sĩ lẽ íbĩ ícétáŋá ꞌbá ídri múké ꞌdĩ ꞌbadrị̂ kí vú
ãzíla mí uꞌá ídri ꞌbá ị́jọ́ mgbã rĩ idélépi rĩ drị̂ sĩ,
21 ãꞌdusĩku ꞌbá mgbã ꞌdĩ kí mụ uꞌálé ãngũ drị̃ gá ꞌdâ
ãzíla ꞌbá ị́jọ́ kóru rĩ kí mụ acelé ala gá nĩ.
22 Wó ꞌbá ũnzí ꞌdĩ kí ála mụ kí drolé ãngũ drị̃ gá ꞌdâ rá
ãzíla ála ꞌbá ũnzí rĩ kí unze ị̃ndụ́ trũ gbụ́.