10
Ị́jọ́ Uꞌbéŋá Sũlũmánĩ drị̂ kî
1 ꞌDĩ kí ị́jọ́ Sũlũmánĩ ꞌbã uꞌbélé rĩ kî:
Ngọ́tị́ŋá ũndũwã rú rĩ la átẹ́pị̃ ní ãyĩkõ fẽ,
wó ngọ́tị́ŋá azalépi aza-azâ rĩ la ãndrẽ ní ũcõgõ fẽ.
2 Málĩ ịsụ́lé gẹ̃rị̃ ũnzí sĩ rĩ ꞌbã ụ̃rọ̃drị́ ꞌdá yụ,
wó ị́jọ́ mgbã rĩ la ꞌbá pa drã agá nĩ.
3 Úpí aꞌbe ꞌbá ãlá rĩ fụlé ãbị́rị́ ní ku,
wó ĩꞌdi ꞌbá ũnzí rĩ ꞌbaní ị́jọ́ kí lẽlé rĩ kí uga úmgbé.
4 ꞌBá drị́ alólépi ku rĩ la acá lẽmẽrí,
wó ꞌbá ru drị́ alólépi aló-álõ rĩ la adru málĩ trũ.
5 Ngọ́tị́ŋá ũndũwã rú rĩ la ãkónã ũkũnã ílí sĩ,
wó ngọ́tị́ŋá ụ́ꞌdụ́ kolépi sáwã ãkónã ũkũnãjó rĩ sĩ rĩ ĩꞌdi ngọ́tị́ŋá drị̃nzá ajílépi rĩ.
6 ꞌBá múké rĩ kí drị̃lẹ́ba ịsụ́ rá,
wó ꞌbá ũnzí rĩ la ũmbã zị̃ ĩꞌdi ꞌbã ásị́ gá.
7 ꞌBá múké rĩ ị́jọ́ igájó rĩ ĩꞌdi drị̃lẹ́ba rú,
wó ꞌbá ũnzí rĩ kí ị́jọ́ la ãvĩ gbõ rú.
8 ꞌBá ũndũwã rú rĩ la ãzị́táŋá ãꞌị̃ ĩꞌdi ꞌbã ásị́sị́ŋá gá rá,
wó ꞌbá azalépi aza-azâ rĩ la lị́kị̃ drị̃ lị.
9 ꞌBá ị́jọ́ pịrị rĩ ngalépi rĩ la acị́ ụ̃rị̃ kóru,
wó ꞌbá ị́jọ́ pịrị rĩ ngalépi ku rĩ ị́jọ́ la ĩꞌdi ịsụ́ rá.
10 ꞌBá ꞌbá bĩlépi ị́jọ́ ũnzí sĩ mịfị́ sĩ rĩ la cãndí ají,
wó ꞌbá ị́jọ́ ũnzí aꞌdálépi rĩ la ásị́-ị̃gbẹ̃ ají.
11 ꞌBá múké rĩ tị gá ị́jọ́ ídri fẽlépi rĩ la ãfũ nĩ,
wó ꞌbá ũnzí rĩ ꞌbã tị la ũmbã aꞌbó cí.
12 ꞌBá ngụ̃jó rĩ la ãwãŋá ají,
wó lẽtáŋá la ũnzĩkãnã pírí kí drị̃ kụ̃ cí.
13 ꞌBá ị́jọ́ nị̃lépi cé rĩ tị gá ála ũndũwã ịsụ́,
wó ꞌbá ị́jọ́ nị̃lépi ku rĩ ála ị̃ndụ́ la co rá.
14 ꞌBá ũndũwã rú rĩ la ị́jọ́ nị̃ŋá tã mba rá,
wó ꞌbá azalépi aza-azâ rĩ la lị́kị̃ umve ĩꞌdi ꞌbã tị sĩ.
15 ꞌBá kápa trũ rĩ la ru ũgõró ãtị̃ ĩꞌdi ꞌbã málĩ kî sĩ,
wó ꞌbá lẽmẽrí rĩ la drã lẽmẽrĩ sĩ.
16 Ũyá ꞌbá ãlá rĩ ꞌbadrị̂ la ĩꞌbaní ídri ají,
wó ũyá ꞌbá ũnzí rĩ ꞌbadrị̂ la ĩꞌbaní drị̃rịma ají.
17 ꞌBá ímbátáŋá ãꞌị̃lépi rĩ la mụ gẹ̃rị̃ ídri drị̂ gá,
wó ꞌbá ímbátáŋá lẽlépi ku rĩ la ꞌbá kí drị̃ ꞌde bụ́lụ́ gá.
18 ꞌBá ngụ̃táŋá zị̃lépi ĩꞌdi tị sĩ cí rĩ ĩꞌdi ĩnzóꞌbá,
ãzíla ꞌbá káláŋá ujílépi rĩ ĩꞌdi ꞌbá azalépi aza-azâ la.
19 Ị́jọ́ jọlé ambamba rĩ agá ị́jọ́ ũnzí ĩcẽ ku,
wó ꞌbá ũndũwã rú rĩ la ĩyãŋã tú.
20 ꞌBá ũndũwã rú rĩ ꞌbã ị́jọ́ jọŋá sílĩvã ãlá rĩ áni,
wó ꞌbá ũnzí rĩ ꞌbã ásị́ gá ị́jọ́ kí ífí kóru.
21 ꞌBá ãlá rĩ ꞌbã ị́jọ́ la ꞌbá ũꞌbí kí ásị́ imbá,
wó ꞌbá azalépi aza-azâ rĩ la ru ꞌdị ĩꞌdi ꞌbã ãnị́ ãkõ sĩ.
22 Sụ̃sụ́ Úpí ꞌbã wilé rĩ la míní málĩ ají,
ãzíla ũꞌbã cãndí drị̃ la gá ku.
23 ꞌBá azalépi aza-azâ rĩ la uꞌá ãyĩkõ sĩ ị́jọ́ ũnzí rĩ ngaŋá sĩ,
wó ũndũwã la ãyĩkõ fẽ ꞌbá ị́jọ́ vãlépi rá rĩ nî.
24 Ị́jọ́ bá ãlá rĩ ꞌbã lẽlé rĩ ála fẽ la ĩꞌdiní rá,
wó ị́jọ́ ꞌbá ũnzí rĩ ꞌbã sĩ idéjó ụ̃rị̃ sĩ rĩ la ĩꞌdi rụ rá.
25 Ãlụ́kụ́kụ̃ drĩ li, ĩꞌdi ꞌbá ũnzí rĩ kí we ĩndĩ,
wó ꞌbá ãlá rĩ kí pá tu ũkpó ru jã ꞌdâ.
26 Íꞌbã ꞌbá ũvú rĩ míní ãzị́ ngalé ku,
ĩꞌdi cécé wáyĩnĩ ũká rĩ ꞌbã ꞌbá sị́ anụ́jó jõku ãcíkã ꞌbã ꞌbá fụjó rĩ áni.
27 Úpí ụ̃rị̃jó rĩ la ꞌbá ꞌbã adrujó ídri rú ílí ãzo rú,
wó ꞌbá ũnzí rĩ kí ála kí ílí lị ãlị́ŋá ru.
28 Ásị́ tị̃ŋá ꞌbá múké rĩ drị̂ la ãyĩkõ ají,
wó ásị́ tị̃ŋá ꞌbá ũnzí rĩ drị̂ la adru ãzị́ kóru.
29 Úpí la ꞌbá ãlá rĩ kí tã mba nĩ,
wó ĩꞌdi ꞌbá ị́jọ́ ũnzí idelépi rĩ kí ị̃lị̃kị̃ rá.
30 Ícó ꞌbá ãlá rĩ kí drolé ãngũ ĩꞌbadrị̂ agá rĩ sĩ ku,
wó ꞌbá ũnzí rĩ icó kí acelé ãngũ drị̃ gá ꞌdâ ku.
31 ꞌBá ãlá rĩ kí ị́jọ́ jọ ũndũwã sĩ,
wó ĩdra ị́jọ́ ũnzí jọlépi rĩ ála drị̃ la atrị cí.
32 ꞌBá ãlá rĩ kí ị́jọ́ múké rĩ kí jọ,
wó ꞌbá ũnzí rĩ kí tị la ĩnzõ jọ.