12
1 ꞌBá ímbátáŋá lẽlépi rĩ lẽ nị̃táŋá rá,
wó ꞌbá ru lẽlépi itúlépi ku rĩ la aza-ãzã.
2 ꞌBá múké rĩ la ásị́ ị̃gbẹ̃ ịsụ́ Úpí drị́,
wó ĩꞌdi ị́jọ́ lị ꞌbá ũnzí rĩ drị̃ gá rá.
3 Ị́jọ́ ũnzí fẽ ꞌbání pá tuŋá pịrị la ku,
wó ꞌbá ãlá rĩ la pá tu ũkpó ru.
4 Ũkú ádrízã múké rĩ la ágô ní ãrútáŋá ají,
wó ũkú drị̃nzá fẽlépi ágô ní rĩ ĩꞌdi cécé ãyánĩ ágô ꞌbã ĩfã ꞌbã sĩ asụ́jó rĩ áni.
5 Ị́jọ́ ꞌbá ãlá rĩ ꞌbã itúlé rĩ kí pịrị,
wó ị́jọ́ ꞌbá ũnzí rĩ ꞌbã kí amálé rĩ kí ị́jọ́ ꞌbá uléjó rĩ kî.
6 Ị́jọ́ ꞌbá ũnzí rĩ drị̂ ĩꞌdi ꞌbá ꞌdịjó,
wó ꞌbá pịrị rĩ ꞌbã ị́jọ́ la ꞌbá ídri pa rá.
7 ꞌBá ũnzí rĩ kí drã rá ãzíla kí ãvĩ rá,
wó ꞌbá ãlá rĩ kí pá tu ũkpó ru.
8 Ála ꞌbá ịcụ́ ũndũwã ĩꞌdidrị̂ sĩ,
wó ꞌbá azalépi aza-azâ rĩ ála ĩꞌdi ide ĩdẽ.
9 ꞌBá ị̃nzị̃lé ku ãzị́ ĩꞌdidrị̂ kí ngalépi cénĩ rĩ múké,
ndẽ ꞌbá ru ꞌbãlépi ãmbógó ru íná kóru rĩ rá.
10 ꞌBá múké rĩ kí ãnãkpá ĩꞌbadrị̂ kí tãmbalépi mbã mbã rĩ kî,
wó ꞌbá ũnzí rĩ kí ásị́ la adru ĩꞌbaní ãcí-ãcí.
11 ꞌBá ãzị́ ngalépi ĩꞌdidrị́ ámvụ́ agá ásị́ pírí sĩ rĩ la adru ãkónã trũ wẽwẽ rú,
wó ꞌbá ãzị́ ífí kóru rĩ ngalépi rĩ la aza ãzã.
12 ꞌBá ũnzí rĩ kí ãko ꞌbá ụ̃gụ́ꞌbá ru rĩ ꞌbã kí ụ̃gụ̃lé rĩ kí vị́ ta,
wó ꞌbá ãlá rĩ kí pá tu ũkpó ru.
13 ꞌBá ũnzí rĩ kí gbã mãtégõ gá ị́jọ́ ũnzí ĩꞌbaní jọlé rĩ kí sĩ,
wó ꞌbá ãlá rĩ kí ru pa ị́jọ́ ũnzí agá rá.
14 Ị́jọ́ ãfũlépi ími tị gá múké rĩ la míní ụ̃rọ̃drị́ ají,
ãzíla ãzị́ ngalé ũkpó sĩ rĩ la ụ̃rọ̃drị́ ají rá.
15 Ị́jọ́ ꞌbá azalépi aza-azâ rĩ drị̂ kí adru ĩꞌdi mịfị́ gá pịrị,
wó ꞌbá ũndũwã rú rĩ la ị́jọ́ jọlé ĩꞌdiní ímbátáŋá rũ rĩ are rá.
16 ꞌBá azalépi aza-azâ rĩ la ũmbã ĩꞌdidrị̂ iꞌda cọtị́,
wó ꞌbá ũndũwá rú rĩ la ĩyãŋã tútú údrĩ táni ĩꞌdi uꞌdá rĩ gá.
17 Sãdínĩ pịrị rĩ la ị́jọ́ mgbã rĩ jọ,
wó sãdínĩ pịrị ku rĩ la ĩnzõ jọ.
18 Ị́jọ́ ꞌa ũrãlé ku rĩ la ꞌbá sõ kãrụ̃ cécé ménéŋá áni,
wó ị́jọ́ ꞌbá ũndũwã rú rĩ ꞌbã jọlé rĩ la ꞌbá adrí rá.
19 Ị́jọ́ mgbã rĩ la uꞌá jã ꞌdâ,
wó ĩnzõ la ãsị̃ ụ̃trụ́ ru.
20 ꞌBá ị́jọ́ ũnzí itúlépi rĩ ꞌbã ásị́ gá mũlũmbẽ cí,
wó ꞌbá ásị́ ị̃gbẹ̃ ajílépi rĩ ꞌbaní ãyĩkõ cí.
21 Ị́jọ́ ũnzí icó aꞌdélé ꞌbá ãlá rĩ kí drị̃ gá ku,
wó ị́jọ́ ꞌbá ũnzí rĩ ꞌbadrị̂ ꞌbã ngá lú ũcõgõ.
22 Úpí ngụ̃ ꞌbá ĩnzõ jọlépi rĩ ũnzí,
wó ĩꞌdi uꞌá ãyĩkõ sĩ la ꞌbá ị́jọ́ mgbã jọlépi rĩ sĩ.
23 ꞌBá ũndũwá rú rĩ icé kí ru ũndũwã ĩꞌbadrị̂ sĩ ku,
wó ꞌbá azalépi aza-azâ rĩ kí aza ĩꞌbadrị̂ iꞌda tọndọlọ.
24 ꞌBá ãzị́ ngalépi ũkpó sĩ rĩ la adru drị̃lẹ́ ru,
wó ꞌbá ũvú rĩ la adru ãtíꞌbó ru.
25 Ásị́ umvúŋá la fẽ ãyĩkõ la adru ꞌbá ásị́ gá ꞌdáyụ,
wó ị́jọ́ jọŋá ásị́ ị̃gbẹ̃ sĩ rĩ la ꞌbá ásị́ gá ãyĩkõ ají rá.
26 ꞌBá ãlá rĩ la ĩꞌdi ꞌbã wọ̃rị̂ tã mba rá,
wó gẹ̃rị̃ ꞌbá ũnzí rĩ drị̂ la kí agụ wọ̃rị̂ be bụ́lụ́ gá.
27 ꞌBá ũvú rĩ icó ĩzá ĩꞌdi ꞌbã rụlé rĩ aꞌdílé ku,
wó ꞌbá ũndũwã rú ãzị́ ngalépi ũkpõ sĩ rĩ la adru málĩ trũ.
28 Gẹ̃rị̃ ꞌbá ãlá rĩ ꞌbadrị̂ gá ídri cí,
ãzíla gẹ̃rị̃ ꞌdã agá drã ꞌdá yụ.