15
1 Ị́jọ́ umvijó jãjã rú rĩ la ũmbã sị́ ịgbẹ rá,
wó ị́jọ́ umvijó ásị́ ãcĩ sĩ rĩ la ũmbã inga-ingã.
2 ꞌBá ũndũwá ru rĩ drĩ ị́jọ́ jọ, ĩꞌdi fẽ nị̃táŋá la adru ãjị́ ambamba rú,
wó ꞌbá azalépi aza-azâ rĩ tị gá ị́jọ́ ífí kóru rĩ la ãfũ nĩ.
3 Úpí ꞌbã mịfị́ la ãngũ ndre ãngũ pírí gá,
ĩꞌdi ꞌbá ũnzĩkãnã ngalépi rĩ kí undré ꞌbá mũkẽ ngalépi rĩ kí abe.
4 Ĩdra ꞌbá adrílépi rĩ ĩꞌdi ife ídri fẽlépi rĩ ꞌi,
wó ĩdra úlétáŋá ulélépi rĩ la úríndí ịgbẹ́-ịgbệ.
5 ꞌBá azalépi aza-azâ rĩ la átẹ́pị ꞌbã ímbátáŋá gã úmgbé,
wó ꞌbá ũndũwá ru rĩ la ímbátáŋá lẽ rá.
6 Jó ꞌbá ãlá rĩ drị̂ agá málĩ la ga tré,
wó ꞌbá ũnzí rĩ ꞌbã málĩ kí ĩꞌdi drị̃ gá ị́jọ́ asé.
7 Tị ꞌbá ũndũwá ru rĩ drị̂ la nị̃táŋá iré,
wó ꞌbá azalépi aza-azâ rĩ ꞌbã ásị́ adru ꞌdĩ ꞌbã áni ku.
8 Úpí ngụ̃ ídétáŋá ꞌbá ũnzí rĩ ꞌbã kí idélé rĩ ũnzí,
wó ĩꞌdi adru ãyĩkõ sĩ la ꞌbá múké rĩ drĩ kí ị́jọ́ zị ĩꞌdi tị gá rĩ gá.
9 Úpí ngụ̃ gẹ̃rị̃ ꞌbá ũnzí rĩ drị̂ ũnzí,
wó lẽ ꞌbá ị́jọ́ mgbã rĩ idélépi rĩ áyụ.
10 ꞌBá gẹ̃rị̃ pịrị rĩ aꞌbelépi rá rĩ la drị̃rịma ũkpó la ịsụ́ rá,
ꞌbá ítútáŋá ngụ̃lépi ũnzí rĩ la drã rá.
11 Ãngũ ꞌbá drãlépi rá rĩ ꞌbadrị̂ kí Ãbãdónĩ *Ãbãdónĩ ꞌbã ífí tị Ĩbũrãníyã drị̂ sĩ “lị́kị̃.” be drĩ kí dó iꞌdá Úpí drị̃lẹ́ gá tọndọlọ,
icó dó ị́jọ́ ꞌbá ásị́ gá rĩ nị̃lé ku íngoní ru.
12 ꞌBá ꞌbá idelépi ide idê rĩ lẽ ítútáŋá ku,
icó ị́jọ́ zịlé ꞌbá ũndũwá ru rĩ ꞌbã tị gá ku.
13 Ásị́ ãyĩkõ rú rĩ la ꞌbá ꞌbã mẹ́lẹ́tị fẽ dị̃lé dị̃-dị̃,
wó ũcõgõ ásị́ gá rĩ la úríndí ịgbẹ́ cĩrĩ.
14 ꞌBá ũndũwã rú rĩ ꞌbã ásị́ la ụ̃nị̃táŋá ndrụ̃,
wó ꞌbá azalépi aza-azâ rĩ la aza na ãkónã rú.
15 Ídri ꞌbá ĩkpãlé ĩkpã-ĩkpã rĩ ꞌbadrị̂ la adru sáwã pírí sĩ ũcõgõ rú,
wó ꞌbá ásị́ agá ãyĩkõ rú rĩ la uꞌá sáwã pírí sĩ ãyĩkõ sĩ.
16 Adrujó ãko trũ wereŋá ru Úpí ụ̃rị̃jó rĩ,
ndẽ adrujó málĩ trũ ũcõgõ agá rĩ rá.
17 Tẹ́bị́ ịnị najó sĩ uꞌájó ꞌbá mídrị́ko gá rĩ kí abe lẽtáŋá sĩ rĩ ndẽ,
ĩzá úsã trũ kpãcĩ rĩ najó adrujó ngụ̃táŋá sĩ rĩ rá.
18 ꞌBá ásị́ ãcí rĩ la ãgátã ají,
wó ꞌbá ị́jọ́ talépi rĩ la ãwãŋá atrị rá.
19 ꞌBá ũvúꞌbá rĩ ní ị́jọ́ pírí kí mba mbã,
wó ꞌbá pịrị rĩ ní ị́jọ́ kí adru múké.
20 Ngọ́tị́ŋá ũndũwã rú rĩ la átẹ́pị̃ ní ãyĩkõ fẽ,
wó ngọ́tị́ŋá azalépi aza-azâ rĩ la ãndrẽ ꞌbã ị́jọ́ kí ide-idê.
21 Adrujó ũndũwã kóru rĩ ĩꞌdi ãyĩkõ rú ꞌbá ị́jọ́ vãlépi ku rĩ ní,
wó ꞌbá ũndũwã rú rĩ la ị́jọ́ mgbã rĩ idé.
22 Ị́jọ́ amáŋá ãkõ sĩ, ị́jọ́ ụ̃tị̃lé rĩ kí asu rá,
wó ꞌbá ị́jọ́ amálépi rĩ drĩ kí adru ũꞌbí ru, ị́jọ́ ụ̃tị̃lé rĩ kí ị̃kụ̃lẹ̃nị̃ rá.
23 ꞌBá la adru ãyĩkõ sĩ umvitáŋá múké ãfũlépi ĩꞌdi tị gá rĩ sĩ,
ị́jọ́ umvilé sáwã pịrị rĩ agá rĩ ꞌbã ũnĩ dó ni yã!
24 Gẹ̃rị̃ ꞌbá ũndũwã rú rĩ ꞌbã kí uꞌájó rĩ la kí agụ ídri gá,
ị́jọ́ ꞌdĩ sĩ kí dó sĩ ru uná gẹ̃rị̃ ꞌbá agụlépi drã gá rĩ sĩ.
25 Úpí la ꞌbá ãfó ru rĩ ꞌbã jó andi rá,
wó ĩꞌdi ãko ãwụ́zị́ ꞌbadrị̂ kí tãmba nĩ.
26 Úpí ngụ̃ ígátáŋá ꞌbá ũnzí rĩ ꞌbadrị̂ ũnzí,
wó ị́jọ́ jọlé ásị́ ị̃gbẹ̃ sĩ rĩ la ĩꞌdiní ãyĩkõ fẽ nĩ.
27 ꞌBá rọ̃mgbọ́ ru rĩ la ũcõgõ ají lị́cọ́ ĩꞌdidrị̂ nî,
wó ꞌbá ị́jọ́ sĩ ꞌbá mịfị́ sajó ãko ãzí sĩ rĩ gãlépi úmgbé rĩ la uꞌá ílí ãzo rú.
28 ꞌBá múké rĩ kí ị́jọ́ ꞌa ũrã ráká kí umvi la ĩndõ,
wó tị ꞌbá ũnzí rĩ ꞌbadrị̂ la ꞌbá ũdũ ãcí áni.
29 Úpí ꞌi ꞌbá ũnzí rĩ kí abe rá-rá ru,
wó ĩꞌdi zịtáŋá ꞌbá múké rĩ ꞌbadrị̂ are rá.
30 Mẹ́lẹ́tị ãlá rĩ la ꞌbá ásị́ ní ãyĩkõ fẽ,
wó ị́jọ́ mgbã rĩ la ụrụꞌbá ãlá rĩ fẽ nĩ.
31 Ídrĩ bị́lẹ́ ꞌbã ị́jọ́ sĩ uzájó ími drị̃ gá rĩ kí drị̃ gá rá,
mi uꞌá ꞌbá ũndũwã rú rĩ kí drĩdríŋĩ gá rá.
32 ꞌBá ímbátáŋá gãlépi úmgbé rĩ lẽ ru ku,
wó ꞌbá ítútáŋá ãꞌị̃lépi rá rĩ la ị́jọ́ vãŋá ịsụ́ rá.
33 Úpí ụ̃rị̃jó ri la ꞌbá imbá adrujó ũndũwá ru,
ãzíla mi ãrútáŋá ịsụ́ rá la ídrĩ ími iri vụ̃rụ́ rĩ gá.