19
1 ꞌBá lẽmẽrí ị́jọ́ pịrị rĩ ngalépi rĩ ndẽ;
ꞌbá azalépi aza-azâ ị́jọ́ pịrị rĩ jọlépi ku rĩ rá.
2 Adrujó ãvá trũ ị́jọ́ nị̃jó ku rĩ adru múké ku;
yãjó ị́jọ́ sĩ yã-yã rĩ la fẽ mi gẹ̃rị̃ pịrị rĩ aꞌbe rá.
3 ꞌBá la lị́kị̃ ají ĩꞌdi drị̃ gá aza ĩꞌdidrị̂ sĩ;
ꞌdã ꞌbã ũngúkú gá ĩꞌdi dó unu Úpí ụrụꞌbá gá.
4 Málĩ la fẽ la mi adru wọ̃rị́ trũ ũꞌbí ru;
wó ꞌbá lẽmẽrí rĩ ꞌbã wọ̃rị́ka kí ĩꞌdi aꞌbe pírí rá.
5 Sãdínĩ ĩnzó rĩ kí
ꞌbá ĩnzõ jọlépi ambamba rĩ be icó kí ĩcẽlé drị̃rịma ịsụ́ŋá gá ku.
6 ꞌBá ũꞌbí kí mũkẽ ndrụ̃ ꞌbá ãko fẽlépi fẽ-fẽ rĩ ꞌba rụ̂ sĩ;
ãzíla ꞌbá pírí kí adru wọ̃rị́ ꞌbá ãko fẽlépi fẽfẽ rĩ ãni.
7 ꞌBá lẽmẽrí rĩ ꞌbã kãká drĩ kí dó ĩꞌdi ngụ̃ ũnzí;
ꞌbá ĩꞌdi ꞌbã wọ̃rị́ka rú rĩ kí dó apá ĩꞌdi sĩ íngõpí!
Drĩ táni uꞌde kí vú gâ sĩ mãmálá ꞌbãŋá trũ tí,
icó kí ịsụ́lé ku.
8 ꞌBá ũndũwã ịsụ́lépi rĩ lẽ ídri ĩꞌdidrị̂ rá;
ꞌbá vãtáŋá trũ rĩ la drị̃lẹ́ba ịsụ́ rá.
9 Sãdínĩ ĩnzó rĩ icó ĩcẽlé drị̃rịma ịsụ́ŋá sĩ ku;
ãzíla ꞌbá ĩnzõ jọlépi ambamba rĩ icó ĩcẽlé drị̃rịma ịsụ́ŋá gá ku.
10 ꞌBá azalépi aza-azâ rĩ ní uꞌájó ꞌbá kụ́rẹ́nị́ ru rĩ áni rĩ drĩ dó adru ũnzí;
ãtíꞌbó ní adrujó úpí ru úpí ꞌbã ngọ́pị ní rĩ ꞌbã ũnzĩkãnã lã dó adru íngõpí!
11 ꞌBá ũndũwá ru rĩ la ũmbã ĩꞌdidrị̂ drị̃ ụtrị́ rá;
ĩꞌdi ãrútáŋá ịsụ́ ĩꞌdi ꞌbã ị́jọ́ ũnzí ꞌbã ãrígó tị ũfẽjó ku rĩ sĩ.
12 Úpí ꞌbã ũmbã ĩꞌdi cécé kẹ̃mị̃ ní awájó rĩ áni;
wó ĩꞌdi ꞌbã ásị́ ị̃gbẹ̃ ĩꞌdi cécé andrẹlị́ká kalépi ásé drị̃ gá rĩ áni.
13 Ngọ́tị́ŋá azalépi aza-azâ rĩ la átẹ́pị̃ ní lị́kị̃ ají;
ũkú ru lẽlépi ãwãŋá sĩ rĩ ĩꞌdi cécé uzogó ralépi jó agá sáwã pírí sĩ rĩ áni.
14 Átẹ́pị la jó kí aꞌbe málĩ be ãwítã rú anzị ĩꞌdidrị̂ ꞌbaní;
wó Úpí la ũkú ị́jọ́ ífí vãlépi rá rĩ fẽ nĩ.
15 Ũvũ la ꞌbá fẽ ụ́ꞌdụ́ kolé káyĩ rá;
ãzíla ru drị́ alójó ku rĩ la ꞌbání ãbị́rị́ ají.
16 ꞌBá ãzị́táŋá tãmbalépi rĩ mba ru ídri tã rá;
wó ꞌbá ãzị́táŋá tãmbalépi ku rĩ la drã rá.
17 ꞌBá ãko fẽlépi ꞌbá lẽmẽrí rĩ nî rĩ fẽ ãko ꞌdã Úpí nî;
ãzíla Úpí la ĩꞌdi ũfẽ rá.
18 Íco mî ngọ́tị́ŋá ị̃ndụ́ ímbátáŋá ru ꞌdĩ sĩ iza drĩ ru ku rú;
ídrĩ ĩꞌdi ị̃ndụ́ co ku, ĩꞌdi mụ drãlé rá.
19 Lẽ ꞌbá ásị́ ãcí rĩ ꞌbã ũfẽ ị́jọ́ ĩꞌdi ꞌbã izalé rĩ rá;
ídrĩ ĩꞌdi ãzã ko rá, lẽ íko ĩꞌdi ãzã vúlé rĩ sĩ ị̃dị́.
20 Mí are ị́jọ́ sĩ ími bụ̃rọ̃ jọjó rĩ ãzíla mí ãꞌị̃ ímbátáŋá rá;
ị́jọ́ ꞌdĩ sĩ mi dó sĩ drụ́zị́ drị̃lẹ́ gâlé adru ũndũwá ru.
21 ꞌBá la ị́jọ́ kí ụ̃tị̃ ĩꞌdi ásị́ gâlé ũꞌbí ru;
wó ị́jọ́ Úpí ꞌbã lẽlé rĩ la ru idé nĩ.
22 Ãko ꞌbá ꞌbã lẽlé rĩ ĩꞌdi lẽtáŋá ukólépi ku rĩ ꞌi;
adrujó lẽmẽrí rĩ ĩꞌdi múké ndẽ adrujó ĩnzóꞌbá rĩ rá
23 Úpí ụ̃rị̃jó rĩ la ꞌbá agụ ídri gá;
ꞌbá ụ̃rị̃ ꞌdĩ trũ rĩ ásị́ la la adru ị̃gbẹ́ ru,
ị́jọ́ ũnzí aló ĩꞌdi ku.
24 Ũvúꞌbá la ru drị́ su mgbi íná ãtĩjó rá;
ãzíla icó íná sulé ru tị gâlé ku.
25 Íco ꞌbá idemará ru rĩ ꞌbã ị̃ndụ́, ꞌbá ũndũwá kóru rĩ kí dó sĩ ímbátáŋá ụ̃nị̃;
mí uzá ꞌbá ị́jọ́ vãlépi rá rĩ drị̃ gá, ĩꞌdi dó sĩ ímbátáŋá ꞌbã ị́jọ́ vã.
26 ꞌBá átẹ́pị̃ ní ũcõgõ fẽlépi ãzíla ãndrẽ drolépi lị́cọ́ agá rá rĩ;
ĩꞌdi ngọ́tị́ŋá drị̃nzá ãzíla ásị́ ị̃gbẹ̃ ãkõ ajílépi la.
27 Mâ ngọ́tị̂, ídrĩ gã ímbátáŋá arelé úmgbé;
ígã ꞌdã ị́jọ́ nị̃ŋá.
28 Sãdínĩ ũnzí rĩ la ị́jọ́ liŋá pịrị rĩ ꞌbã idemará ru;
ãzíla ĩꞌdi uꞌá ị́jọ́ ũnzí sĩ ãyĩkõ sĩ cécé íná ãjị́-ambamba rĩ sĩ rĩ áni.
29 Ídé drị̃rịma bábá ꞌbá idemará ru rĩ ꞌba nî;
ãzíla ꞌbá azalépi aza-azâ rĩ kí ála kí ũngúkú co rá.