22
1 Rụ́ múké rĩ ndẽ málĩ wẽwẽ rú rĩ rá
ãrútáŋá ịsụ́jó rĩ ndẽ adrujó sílĩvã jõku gólũdĩ trũ rĩ rá.
2 ꞌBá málĩ trũ ãzíla lẽmẽrí rĩ kí ãko ãlu la icí kí nĩ;
Úpí ũꞌbã kí pírí nĩ.
3 ꞌBá ị́jọ́ ꞌa uyalépi ũndũwá sĩ rĩ la ị́jọ́ ũnzí amụ́lépi rĩ ndre údu rú ãzíla ĩꞌdi ru zị̃ rá,
wó ꞌbá ũndũwá kóru rĩ la mụ drị̃ gá ãzíla ĩꞌdi fi drị̃lẹ́ ũnzĩ amụ́lépi rĩ agá nĩ.
4 ꞌBá ru irilépi vụ̃rụ́lé ãzíla Úpí ụ̃rị̃lépi rĩ
la málĩ, ãrútáŋá ãzíla ídri ịsụ́ rá.
5 Gẹ̃rị̃ ꞌbá ũnzí rĩ ꞌbadrị̂ kí agá ụ̃cị́kị́ kí mãtégõ be cí,
wó ꞌbá ru tãmbalépi mba-mbã rĩ acị́ gẹ̃rị̃ ĩꞌbãdrị̂ kí agâ sĩ ku.
6 Mí imbá anzị mídrị̂ kí gẹ̃rị̃ múké rĩ sĩ,
drĩ kí dó sĩ mba ꞌbo icó kí gẹ̃rị̃ múké rĩ aꞌbelé ku.
7 ꞌBá málĩ trũ rĩ kí adru úpí ru ꞌbá lẽmẽrí rĩ kí drị̃gá,
ãzíla ꞌbá séndẽ aꞌị́lépi rĩ ĩꞌdi ãtíꞌbó ꞌbá ĩꞌdiní séndẽ fẽlépi rĩ ãni.
8 ꞌBá ásị́ ũnzĩ ngalépi rĩ la drị̃lẹ́ ũnzĩ tra áyụ,
ị́jọ́ ũnzí ĩꞌdi ꞌbã ngalé rĩ la ãsị̃ rá.
9 ꞌBá ãko fẽlépi ásị́ pírí sĩ rĩ ĩꞌdi drị̃lẹ́ba rú,
ãꞌdusĩku ĩꞌdi ãkónã ĩꞌdidrị̂ kí ale ꞌbá lẽmẽrí rĩ kí abe.
10 Ídrĩ ꞌbá idemará ru rĩ dro ãmvé, ãgátã gaŋá la fũ rá,
ãwãŋá ãzíla úꞌdáŋá la ukó rá.
11 ꞌBá ị́jọ́ múké rĩ lẽlépi ãzíla ị́jọ́ jọlépi ásị́ ị̃gbẹ̃ sĩ rĩ,
Úpí la adru ĩꞌdi ꞌbã wọ̃rị́.
12 Úpí la ị́jọ́ mgbã rĩ tã mba rá,
wó ĩꞌdi ꞌbá ũnzí rĩ kí ꞌbã ụ̃tị̃táŋá kí fẽ ãsị̃lé ụ̃trụ́ ru.
13 Ũvúꞌbá la jọ la, “Kẹ̃mị̃ ãmvé ꞌdãá cí!
Ádrĩ fũ ãmvêlé, ĩꞌdi áma ci rá!”
14 Ũkú ãwụ́ꞌbá ru mịfị́ ãcí rĩ ꞌbã tị ĩꞌdi ꞌbụ́ mgbi rĩ áni;
ꞌbá Úpí ꞌbã ũmbã ꞌbã sĩ angájó ĩꞌbaní rá rĩ kí uꞌde ala gá nĩ.
15 Aza la ru tõ ngọ́tị́ŋá were rĩ ásị́ gá nĩ,
wó ị̃ndụ́ la cojó kẹ̃lị́ká sĩ ímbátáŋá ru rĩ la aza ĩꞌdi agá rĩ dro álị́.
16 ꞌBá ꞌbá lẽmẽrí rĩ kí ũnzãlépi sĩ málĩ ĩꞌdidrị̂ kí ĩjãlãjó rĩ,
jõku ꞌbá fẽtáŋá fẽlépi ꞌbá málĩ trũ rĩ ní rĩ kí acá ị̃rị̃trá lẽmẽrí.
Ị́jọ́ ꞌbá ũndũwã rú rĩ ꞌbã jọlé rĩ kî
17 Ínzị̃ ími bị́lẹ́ mgbọ rú ãzíla mí are ị́jọ́ ꞌbá ũndũwã rú rĩ ꞌbã jọlé rĩ kî;
Íꞌbã ími ásị́ sĩ kí nị̃jó,
18 ãꞌdusĩku ĩꞌdi múké míní ímbátáŋá ꞌdĩ kí tã mbajó ími ásị́ gá,
ꞌba adru kí dó sĩ pírí ími tị gá ꞌdâ bábá.
19 Má imbá míní kí ãndrũ ꞌdĩ, ãndá mi dó sĩ
ị́jọ́ ꞌdĩ sĩ ásị́ ꞌbã Úpí Ãdróŋâ drị̃ gá.
20 Ásĩ ándrá ĩminí ị́jọ́ kãlị́ na,
ímbátáŋá ru ãzíla nị̃táŋá drị̂ kí,
21 sĩ ĩminí ị́jọ́ mgbã ãzíla ãndá rĩ kí nị̃jó
ãzíla ĩminí sĩ ị́jọ́ pịrị rĩ umvijó ꞌbá ĩmi tị pẽlépi rĩ ꞌbaní ku yã?
22 Íra jõ ꞌbá lẽmẽrí rĩ kí ꞌbã ãko kí ĩꞌbaní adrujó lẽmẽrí rĩ sĩ ku;
ãzíla mí uní ꞌbá ãzãkoma lẽlépi rĩ kí ꞌbã ị́jọ́ dũwánĩ gá ku,
23 ãꞌdusĩku Úpí la kẹ́sị̃ ĩꞌbadrị̂ lị nĩ
ãzíla ĩꞌdi málĩ ꞌbá kí ralépi rĩ ꞌbadrị̂ kí ꞌdụ rá.
24 Írụ wọ̃rị̃ ꞌbá ásị́ ãcí rĩ be ku,
mí uꞌá ꞌbá ũmbã rụlépi mbẽlẽ rĩ be ku,
25 jõ íni ku mi gẹ̃rị̃ ĩꞌdidrị̂ kí ụ̃nị̃ rá
ãzíla mi gbã mãtégõ gá rá.
26 Ítu pá ꞌbá ãzí ní dẹ́nọ̃ ꞌdụŋá gá ku
jõku ífẽ mî ãko ãzí ꞌbá ãzí ní gúrã rú sĩ dẹ́nọ̃ ꞌdụjó ku.
27 Ãko ãzí drĩ adru mídrị́ ꞌdá yụ sĩ dẹ́nọ̃ ꞌdã tị ũfẽjó,
ála uja gbọ́lọ́ mídrị̂ ꞌdụlé tị la gá áyụ.
28 Mí uja lõkókõrí ándrá mí áyị́pịka ꞌbã kí ꞌbãlé údu
sĩ ãngũ awajó rĩ ꞌbã mịfị́ ku.
29 Índre ꞌbá ãzí ãzị́ ngalépi ãlị̃gọ̃ sĩ la rá yã?
Ĩꞌdi drụ́zị́ ãzị́ nga ũpi ꞌbanî
icó ãzị́ ngalé ꞌbá ãzị́ŋá kóru rĩ ꞌbaní ku.