5
Ãzãkoma zịjó Ãdróŋâ tị gá
1 Úpí Ãdróŋá, mí are ị́jọ́ ãfũlépi áma tị gá rĩ ꞌi;
mí are áma áwáŋá mání sĩ ãzãkoma aꞌị́jó rĩ ĩndĩ.
2 Mí are áwáŋá mání awálé sĩ ãzãkoma aꞌị́jó rĩ,
Ãdróŋá ãzíla úpí mádrị̂!
Ma ími zị Úpí Ãdróŋá.
3 Úpí, mí are áma ụ́ꞌdụ́kọ́ ụ̃ꞌbụ́tị sĩ;
ị̃tụ́ ꞌbã agâ gá ma ị́jọ́ zị ími tị gá
ãzíla ma umvitáŋá míní áma umvijó rĩ tẽ.
4 Mí adru Ãdróŋá uꞌálépi ị́jọ́ ũnzí sĩ ãyĩkõ sĩ rĩ ꞌi ku.
ꞌBá ũnzí rĩ kí abe mí uꞌá ãngũ ãlu gá ku.
5 ꞌBá ãfó rú rĩ icó kí pá tulé ími drị̃lẹ́ gá ku,
Íngụ̃ ꞌbá ị́jọ́ ũnzí idélépi rĩ kí pírí ũnzí.
6 ꞌBá ĩnzõ jọlépi rĩ kí, mi kí ị̃lị̃kị̃ rá.
Úpí, íngụ̃ ꞌbá ꞌbá ãrí asulépi rĩ kí
ꞌbá ꞌbá ulélépi rĩ kí abe ũnzí.
7 Wó ásị́ ị̃gbẹ̃ mídrị́ ãmbógó rĩ sĩ;
ma amụ́ jó mídrị̂ gá;
ma ími ị̃nzị̃ jó mídrị́ ãlá rĩ agá
ma ãvụ̃ vụ̃rụ́ ãrútáŋá fẽjó míní ãzíla ma drị̃ ja jó mídrị́ ãlá rĩ gâlé ru.
8 Úpí, mẹ́rọ́ꞌbá mádrị̂ kí ũꞌbí ru!
Íce áma drị̃ sĩ ị́jọ́ míní lẽlé rĩ ngajó;
Íko áma ãzã sĩ acị́jó gẹ̃rị̃ mídrị́ ãlá rĩ agâ sĩ.
9 Ị́jọ́ mẹ́rọ́ꞌbá mádrị̂ ꞌbã kí jọlé rĩ sĩ útị̃ ásị́ ku;
kí ásị́ gá ị́jọ́ ꞌbá dịjó rĩ ga tré,
kí tị ũré ru sĩ ꞌbá uléjó,
ĩnzõ ga kí agá tré.
10 Ílã kí ꞌbá ũnzí la rú Ãdróŋá;
ị́jọ́ ũnzí ĩꞌbadrị̂ ꞌbã fẽ kí aꞌdélé nĩ.
Ị́jọ́ ũnzĩ ĩꞌbadrị́ wẽwẽ rú ꞌdĩ kí sĩ ídro kí rá,
ãꞌdusĩku mvu kí mí rụ́ ꞌdâ rá.
11 Ĩmi uꞌá ãyĩkõ sĩ ĩmi ꞌbá Ãdróŋá ꞌbã tãmbalé nĩ ꞌdĩ;
lẽ ĩngo úngó ãyĩkõ sĩ ụ́ꞌdụ́ pírí sĩ.
Ãdróŋá ímba ꞌbá ími lẽlépi rĩ kí tã,
ãꞌdusĩku ími rụ́ sĩ kí ãyĩkõ sĩ.
12 Úpí ãndá-ãndá ru mi ꞌbá pịrị rĩ ꞌbaní ásị́ ị̃gbẹ̃ fẽ rá,
lẽtáŋá mídrị̂ la kí tãmba gọ́bẹ́rẹ́ áni.