10
Ãdróŋá zịjó ꞌbã ị̃lị̃kị̃ ꞌbá ũnzí rĩ kí rá
1 Úpí, ítu dó pá rá-rá ru la ãꞌdu sĩ yã?
Ízị̃ dó mi sáwã ũcõgõ drị̂ sĩ cí la ãꞌdu sĩ yã?
2 ꞌBá ũnzí rĩ kí ãfó sĩ ãzíla kí ꞌbá lẽmẽrí rĩ kí vú adro;
ífẽ ị́jọ́ ũnzí ĩꞌbã kí itúlé rĩ ꞌbã rụ kí vúŋá nĩ.
3 ꞌBá ũnzí rĩ la adru ãfó sĩ ị́jọ́ ũnzí ĩꞌdi ásị́ gá rĩ sĩ,
ĩꞌdi ꞌbá rọ̃mgbọ́ ru rĩ ịcụ́ ãzíla ĩꞌdi Úpí ꞌi gã úmgbé.
4 Ãfó drị́ ꞌbá ũnzí rĩ ndrụ̃ Ãdróŋâ ku;
ũrãtáŋá ĩꞌdidrị̂ agá ꞌbã ásị́ Ãdróŋâ drị̃ gá ku.
5 ꞌBá ũnzí rĩ kí sáwã pírí sĩ ị́jọ́ ĩꞌbã kí lẽlé rĩ ịsụ́ rá,
vã kí ị́jọ́ Ãdróŋá ꞌbã lịlé rĩ ku;
kí ru ịpị́ ãfó sĩ mẹ́rọ́ꞌbá ĩꞌbadrị̂ kí sĩ.
6 Kí jọ la ĩꞌbaní cénĩ-cénĩ rú, má icó yãlé ị́jọ́ ãzí sĩ ku;
ma ụ́ꞌdụ́ pírí sĩ adru ãyĩkõ sĩ, ị́jọ́ ãzí icó áma rụlé ku.
7 Ị́jọ́ ãfũlépi kí tị gá rĩ lú áwãtáŋá, ĩnzõ, ãzíla gbọ́rọ́kọ̃;
kí ị́jọ́ sĩ ru ngụ̃jó rĩ kí jọ ị́jọ́ ũnzí rĩ be mbẽlẽŋá ru.
8 Kí ru ụ̃zị̃ sĩ ꞌbá ũtẽjó tọ̃rọ́mẹ́ kí agâ sĩ,
sĩ ꞌbá ị́jọ́ kóru rĩ kí ụꞌdị́jó,
Kí ꞌbá ị́jọ́ ꞌbã ndẽlé rá rĩ kí ndrụ̃.
9 Ãngũ ĩꞌbã kí sĩ ꞌbá tẽjó rĩ gá kí ru la kẹ̃mị̃ ani,
kí ru la sĩ ꞌbá ĩkpãlé ĩkpã-ĩkpã rĩ kí ũtẽjó;
kí kí rụ ímbá sĩ selé ụꞌdị́lé rá.
10 Kí ꞌbá ũkpó kóru rĩ kí andi, kí dó sĩ uꞌde vụ̃rụ́,
ꞌbá ị́jọ́ ꞌbã ndẽlé rá rĩ kí uꞌde ũkpõ ꞌbá ũnzí rĩ ꞌbadrị̂ sĩ.
11 ꞌBá ũnzí rĩ kí jọ la, “Ãdróŋá ãvĩ ꞌbãngá ị́jọ́ ꞌdĩ kí rá,
ụ̃pị̃ ru mịfị́ kí cí, icó dó sĩ ị́jọ́ ꞌdĩ kí ndrelé ku.”
12 Mí ángá Úpí, ífẽ drị̃rịma ꞌbá ũnzí rĩ ꞌbanî;
mí ãvĩ jõ ị́jọ́ ꞌbá ũkpõ kóru rĩ drị̃ gá ku fô!
13 ꞌBá ũnzí rĩ la Ãdróŋá ꞌbã ápãrákã rú la ãꞌdu ị́jọ́ sĩ yã?
Ĩꞌdi jọ la ĩꞌdiní cénĩ-cénĩ rú,
Ãdróŋá icó ꞌbãngá drị̃rịma fẽlé mání ku
14 Wó Ãdróŋá índre ũcõgõ ãzíla ãzá ĩꞌbã kí fẽlé rĩ rá;
mi ị́jọ́ ũrã drị̃ la gá ãzíla ãzị́ la nga rá,
ꞌbá ị́jọ́ kóru rĩ tị̃ kí ásị́ ími drị̃ gá;
mi ꞌbá ĩmvú kí ãzã kolépi rĩ ꞌi.
15 Mí anu ꞌbá ũnzí ãzíla ị́jọ́ ũnzí idelépi rĩ kí drị́ rá fô!
Ífẽ drị̃rịma ĩꞌbaní ị́jọ́ ũnzí ĩꞌba kí idélé rĩ sĩ
kpere ĩꞌbaní ị́jọ́ ũnzí aꞌbe agá.
16 Úpí la adru úpí ru jãꞌdâ ãzíla jãꞌdâ;
sụ́rụ́ ãdroŋa ĩnzõ rú rĩ kí ị̃nzị̃lépi rĩ kí ị̃lị̃kị̃ ụ̃nọ́kụ́ ĩꞌdidrị̂ drị̃ gá ꞌdâ rá.
17 Úpí, mi zịtáŋá ꞌbá ĩcõcõŋãlé rĩ ꞌbadrị̂ are rá;
mi ĩꞌbã áwáŋá are rá ãzíla mi kí ásị́ imbá rá.
18 Mi ĩmvú anzị kí tãmba ꞌbá ĩkpãlé ĩkpã-ĩkpã rĩ kí abe rá,
ị́jọ́ ꞌdĩ sĩ ꞌbá ụ̃nọ́kụ́ drị̂ fẽ kí dó sĩ ĩꞌbaní ụ̃rị̃ ị̃dị́ ku.