14
Ị́jọ́ ũnzí ꞌbá ꞌbadrị̂
1 ꞌBá azalépi*14:1 ꞌbá ũndũwã Ãdróŋá drị̂ gãlépi úmgbé rĩ. aza azâ rĩ la jọ la ĩꞌdi ásị́ agâlé
“Ãdróŋá ꞌbãngá ꞌdáyụ.”
Fi kí pírí ĩꞌbaní ãzíla kí ị́jọ́ ũnzí ꞌdĩ kí nga áyụ,
ꞌbá ãzí ị́jọ́ múké la idélépi la ꞌdáyụ.
2 Úpí la ãngũ andré angájó ꞌbụ̃ gâlé,
ꞌbá ꞌba rụ́ vụ̃rụ́ ꞌdõlé
sĩ ꞌbá ãzí ũndũwá ru,
ĩꞌdi ndrụ̃lépi la cí yã rĩ ndrejó.
3 ꞌBá pírí uja kí tị bụ́lụ́ gá sĩ ị́jọ́ ũnzí ngajó,
acá kí pírí rọ̃mgbọ́ ru,
ꞌbá ãzí ị́jọ́ múké la ngalépi la ꞌdáyụ,
átã ãluŋá la yụ.
4 Úpí zị,
“ꞌBá pírí ị́jọ́ ũnzí idélépi ꞌdĩ nị̃ kí ị́jọ́ ũnzí ĩꞌbadrị̂ kí ku yã?
Kí ꞌbá mádrị̂ kí ra ãzíla zị kí ma ku.”
5 Ụ̃rị̃ ãmbógó la la kí rụ rá,
ãꞌdusĩku Ãdróŋá ꞌbã adrujó ꞌbá ãlá rĩ kí andre gá cí rĩ sĩ.
6 Ĩmi ꞌbá ị́jọ́ ũnzí idélépi ꞌdĩ ĩmi ꞌbá lẽmẽrí rĩ kí ꞌbã ásị́ ịgbẹ́ ị́jọ́ ĩꞌbã kí itúlé rĩ kí agá,
wó Úpí ĩꞌdi ꞌbá ĩꞌbã kí sĩ apájó ru zị̃jó rĩ ꞌi.
7 ꞌBárĩ, patáŋá drĩtá dó angá ꞌbá Ịsịrayị́lị̃ drị̂ ꞌbaní Zị̃yọ́nị̃ gâlé la tá múké fô!
Úpí la ꞌbá ĩꞌdidrị̂ kí fẽ acálé málĩ trũ ãzíla ãyĩkõ sĩ ị̃dị́ ãꞌdu tụ́ yã?
Lẽ Yãkóꞌbõ kí ꞌbá Ịsịrayị́lị̃ drị̂ kí abe ꞌba adru kí ãyĩkõ sĩ.