29
Ụ́ꞌdụ́kọ́ Úpí drị́ ãlụ́kụ́kụ̃ agá rĩ
1 Ĩmi mãlãyíkã ãzíla ãko ãzí ꞌbụ̃gá ꞌdĩ, ĩmi ịcụ́ Úpí ꞌi;
ĩmi ịcụ́ dị̃zã ãzíla ũkpõ Úpí drị̂ ꞌi.
2 Ĩmi ịcụ́ Úpí ꞌbã rụ́ dị̃zã rú rĩ ꞌi;
ĩmi ãvụ̃ vũ gá Úpî drị̃lẹ́ gá ãlã ĩꞌdidrị̂ sĩ.
3 Ála Úpí ꞌbã ụ́ꞌdụ́kọ́ are ị̃yị́ kí drị̃gâsĩ;
Ãdróŋá dị̃zã rú rĩ la ụ̃kpẹ̃ ãvi áni,
Úpíla ụ̃kpẹ̃ ãvi áni mĩrĩ ãmbógó rĩ drị̃ gá.
4 Ụ́ꞌdụ́kọ́ Úpí drị̂ ĩꞌdi ũkpó trũ;
Ụ́ꞌdụ́kọ́ Úpí drị̂ la ãmbõgõ ĩꞌdidrị̂ iꞌda.
5 Ụ́ꞌdụ́kọ́ Úpí drị̂ la márígó anu,
Úpí la márígó Lébãnõnĩ drị̂ kí anu nírí nírí.
6 Ĩꞌdi ꞌbé Lébãnõnĩ drị̂ kí fẽ umvúlé kãjóŋá áni,
ãzíla ĩꞌdi ꞌbé Sị́rị̃yọ̃nị̃ fẽ umvúlé ụ̃drụ́ mváŋá áni.
7 Ụ́ꞌdụ́kọ́ Úpí drị̂ la ãngũ ji lẽrẽlẽrẽ
ãcí idraká áni.
8 Ụ́ꞌdụ́kọ́ ĩꞌdidrị̂ la ãngũ kõtórõ rú rĩ aya;
Úpí la kõtórõ Kãdẹ́sị̃ drị̂ aya ĩndĩ.
9 Ụ́ꞌdụ́kọ́ Úpí drị̂ la yéré fẽ tĩlé rá;
ĩꞌdi fẽ ife mị̃rị́ agá rĩ kí ꞌbã bị́ la zõ rá,
Jó ĩꞌdidrị̂ agá ꞌbá pírí kí uzá, “Dị̃zã ꞌba adru Ãdróŋá ãni!”
10 Úpí ĩꞌdi úpí ru ị̃yị́ tị̃lépi rĩ kí drị̃ gá nĩ.
Úpí la ũpĩ na jãꞌdâ.
11 Úpí la ꞌbá ĩꞌdidrị̂ ꞌbaní ũkpó fẽ nĩ;
Úpí la ꞌbá ĩꞌdidrị̂ ꞌbaní sụ̃sụ́ ásị́ ị̃gbẹ̃ drị̂ wi nĩ.