31
Úríndí fẽjó Úpí drị́
1 Úpí, má amụ́ áma zị̃lé ími pálé gá,
mí aꞌbe jõ ma drị̃nzá ịsụ́lé ku,
ípa ma mũkẽ mídrị̂ sĩ.
2 Mí are ma fô,
mí amụ́ áma palé mbẽlẽŋá ru!
Mi írã mání sĩ áma zị̃jó ala gá rĩ ꞌi,
mi bõrõ mádrị́ ũkpó áma palépi rĩ ꞌi.
3 Mi írã ãzíla bõrõ ũkpó mání sĩ áma zị̃jó ala gá rĩ,
rụ́ mídrị̂ ꞌbã ị́jọ́ sĩ mi áma drị̃ ce ãzíla áma tã mba rá.
4 Ímba áma tã ímbá ꞌbelé sĩ lẽjó áma rụjó rĩ agá,
ãꞌdusĩku mi ãngũ mání sĩ áma zị̃jó ala gá rĩ ꞌi.
5 Má aꞌbe áma úríndí ími drị́lẹ́ agá,
Úpí Ãdróŋá mí anzé ma, mi Ãdróŋá pịrị rĩ ꞌi.
6 Ángụ̃ ꞌbá ãdroŋa ĩnzõ rú rĩ kí ị̃nzị̃lépi rĩ kí ũnzí,
ãzíla áꞌbã áma ásị́ Úpí drị̃ gá.
7 Ma adru ãyĩkõ sĩ lẽtáŋá mídrị́ ukólépi ku rĩ sĩ,
ãꞌdusĩku índre áma ĩcãndĩjó rĩ rá,
ãzíla ínị̃ ũcõgõ áma ásị́ gá rĩ cé.
8 Ífẽ ma mẹ́rọ́ꞌbá mádrị̂ kí drị́lẹ́ gá ku,
wó íꞌbã áma pá ãngũ mgbọ la gá.
9 Úpí, mí adru mání ásị́ ị̃gbẹ̃ sĩ ãꞌdusĩku ma cãndí agá,
ũcõgõ sĩ áma mịfị́ uꞌde kí dó uꞌde uꞌdê,
áma ũkpó de dó ru rá.
10 Má ãndẽ ũcõgõ sĩ ꞌbo,
áwáŋá mání awájó rĩ isé áma ílí ãlị́ŋá ru,
áma ũkpõ de dó ru rá ãꞌdusĩku ma ũcõgõ agá,
ãzíla áma ĩfãkã acá kí dó ũkpó kóru.
11 Mẹ́rọ́ꞌbá mádrị̂ kí
jĩránĩ mádrị̂ kí abe pírí kí áma rụ́ iza,
mâ wọ̃rị́ka kí idé mâ sĩ ụ̃rị̃ sĩ,
drĩ kí áma ndre gẹ̃rị̃ agá kí apá mâ sĩ apá apâ.
12 ꞌBá pírí ãvĩ kí ị́jọ́ áma drị̃ gá cécé ádrã ꞌbã rĩ rá rĩ áni;
má acá cécé úmvú lẹ́rị́kọ́ áni,
13 ãꞌdusĩku má are ꞌbá ũꞌbí kí kõyõkõyõ jọ;
ụ̃rị̃ fi áma ásị́ gá wókõ pírí sĩ,
icí kí tị áma ụrụꞌbá gá,
ãzíla itú kí ị́jọ́ sĩ áma ꞌdịjó.
14 Wó Úpí, áꞌbã ásị́ ími drị̃ gá,
ájọ dó sĩ, “Mi Ãdróŋá mádrị̂ ꞌi.”
15 Ídri mádrị̂ ĩꞌdi ími drị́lẹ́ gá,
ípa ma mẹ́rọ́ꞌbá mádrị̂ kí drị́gá
ãzíla ꞌbá mání cãndí fẽlépi rĩ kí drị́gá.
16 Ãdróŋá, mí andré ãtíꞌbó mídrị̂ ꞌi ásị́ ị̃gbẹ̃ mídrị̂ sĩ,
ípa ma lẽtáŋá mídrị́ ukólépi ku rĩ sĩ.
17 Úpí, ífẽ ma drị̃nzá ịsụ́lé ku
ãꞌdusĩku má awá mí rụ́ rá.
Ífẽ ꞌbá ũnzí rĩ ꞌbã ịsụ́ kí drị̃nzá;
ãzíla ífẽ ꞌbã fi kí kírí-kírí ru ꞌbụ́ gâlé.
18 Mí ụ̃pị̃ ĩnzóꞌbá kí tị cí,
ãꞌdusĩku kí ãfó ru ãzíla ãrútáŋá kóru,
kí ị́jọ́ jọ ị́pị́pị́ŋá sĩ ꞌbá mídrị́ ãlá rĩ kí ụrụꞌbá gá.
19 Mũkẽ mídrị̂ ꞌbã ãmbõgõ ꞌdõ áni yã!
Ímba tã la ꞌbá ími rulépi rá rĩ ꞌbánî.
ꞌBá ãlu-ãlu nị̃ ũnĩ mídrị̂ rá,
mi ꞌbá apálépi ru zị̃lépi mí rụ́ rĩ kí tãmba múké-múké.
20 Mi kí tãmba ãzíla ụ̃zị̃ ími índríkã gá
ꞌbá tị itúlépi kí ụrụꞌbá gá rĩ kî sĩ.
Ãngũ míní adrujó rĩ agá mi kí tãmba
mẹ́rọ́ꞌbá kí uꞌdálépi rĩ kí sĩ.
21 Ma Úpî ịcụ́,
ĩꞌdiní lẽtáŋá ĩꞌdidrị̂ iꞌdajó mání
sáwã ꞌbání áma tị cejó rị́ rĩ gá rĩ sĩ.
22 Má idé ụ̃rị̃ sĩ, má ũrã dó,
“Dro dó ma ĩꞌdi mẹ́lẹ́tị gá rá.”
Wó mí are áma áwáŋá rá
mání ími umve agá sĩ ãzãkoma aꞌị́jó rĩ sĩ.
23 Ĩlẽ Úpí ꞌi, ꞌbá pírí ãꞌị̃táŋá trũ ꞌdĩ.
Úpí la ꞌbá ãꞌị̃táŋá trũ rĩ kí tãmba nĩ,
wó ĩꞌdi ꞌbá ãfó ru rĩ ní drị̃rịma fẽ rá.
24 Ĩmi adru ũkpó ru, ĩmi ásị́ ꞌbã mba-mbã
ĩmi ꞌbá pírí ásị́ tị̃lépi Úpî drị̃ gá ꞌdĩ.