34
Ãdróŋâ ịcụ́jó mũkẽ ĩꞌdidrị̂ sĩ
1 Ma Úpî ịcụ́ sáwã pírí sĩ;
má icó ĩꞌdi ịcụ́ŋá aꞌbelé ku.
2 Ma áma ũnũ Úpî sĩ;
ꞌbá pírí ĩkpãlé ĩkpã-ĩkpã rĩ ꞌbã are kí ãzíla ꞌbã ũnũ kí dó ru ãyĩkõ sĩ.
3 Ĩmi amụ́, ãma amụ́ kí ãmbõgõ Úpí drị̂ iꞌdalé;
ãma ịcụ́ kí ĩꞌdi rụ́ ãngũ ãlu gá.
4 Ázị Úpí ꞌi, umvi ma rá;
anzé ma ụ̃rị̃ mádrị̂ kí agá pírí rá.
5 ꞌBá ãngũ ndrelépi ĩꞌdi rụ́ sĩ ãzãkoma ndrụ̃jó rĩ kí adru dị̃zã rú;
icó kí adrulé drị̃nzá sĩ ãluŋá la ku.
6 ꞌBá ị́jọ́ ꞌbã ndẽlé rá rĩ umve Úpí ꞌi, Úpí are ĩꞌdi tị rá;
pa dó sĩ ĩꞌdi ũcõgõ ĩꞌdidrị̂ kí agá pírí rá.
7 Mãlãyíkã Úpí drị̂ la ꞌbá ĩꞌdi rulépi rĩ kí andre tẽ
ãzíla pa nĩ.
8 Íꞌbị̃ ãzíla índre drĩ Úpí ꞌbã mũkẽ!
ꞌBá ru zị̃lépi ĩꞌdi agá rĩ drị̃lẹ́ba rú.
9 Ĩmi ị̃nzị̃ Úpí ꞌi, ĩmi ꞌbá ĩꞌdidrị́ ãlá ꞌdĩ;
ãꞌdusĩku ꞌbá ĩꞌdi ị̃nzị̃lépi rĩ kí ị́jọ́ ãlu ãlu ĩꞌbaní zịlé rĩ kí ịsụ́ rá.
10 Kẹ̃mị̃ kí icó acálé ũkpó kó ru ãbị́rị́ sĩ rá;
wó ꞌbá Úpî ndrụ̃lépi rĩ ĩcẽ kí ãko múké rĩ kí ịsụ́ agá ku.
11 Anzị̂, ĩmi amụ́, ĩmi are drĩ ma;
ma ĩmi imbá sĩ Úpí ní ãrútáŋá fẽjó.
12 ꞌBá ídri lẽlépi rá rĩ ãꞌdi ꞌi,
ãzíla lẽlépi ụ́ꞌdụ́ ũꞌbí múké drị̃lẹ́ gâlé rĩ kí ndrelépi rá rĩ ãꞌdi ꞌi?
13 Ímba ími ĩdra tã ị́jọ́ ũnzí sĩ;
ãzíla ími tị tã ĩnzõ jọŋá sĩ.
14 Mí aꞌbe ị́jọ́ ũnzí cã ãzíla ínga ị́jọ́ múké rĩ áyụ;
índrụ̃ ásị́ ị̃gbẹ̃ ãzíla mí ũbĩ vú la.
15 Mịfị́ Úpí drị̂ ĩꞌdi ꞌbá ãlá rĩ kí drị̃ gá;
ãzíla bị́lẹ́ la mgbọ rú sĩ áwáŋá ĩꞌbadrị̂ arejó.
16 Mịfị́ Úpí drị̂ ꞌbá ị́jọ́ ũnzí ngalépi rĩ kí drị̃ gá;
ĩꞌdi fẽ kí ị́jọ́ la ãvĩ ꞌbá ụ̃nọ́kụ́ gá ꞌdâ rĩ kí drĩdríŋĩ gá rá.
17 ꞌBá ãlá rĩ drĩ kí Úpí umve, ĩꞌdi kí are rá;
ĩꞌdi kí pa ị́jọ́ kí ịsụ́lépi rĩ kí agá pírí rá.
18 Úpí ĩꞌdi ꞌbá ásị́ nũlépi rá rĩ kí andregá ãni rú;
ãzíla ĩꞌdi ꞌbá ũcõgõ rú úríndí agá rĩ kí pa rá.
19 Ũcõgõ ꞌbá ãlá rĩ ꞌbadrị̂ kí ũꞌbí ru,
wó Úpí la kí pa kí agá pírí rá.
20 Úpí la ĩꞌdi ĩfãkã kí tãmba pírí rá,
ãzí ãlu la icó nũlé ku.
21 Ị́jọ́ ũnzí la ꞌbá ũnzí rĩ kí ụꞌdị́ nĩ;
ála drị̃rịma fẽ ꞌbá ꞌbá ãlá rĩ kí ngụ̃lépi ũnzí rĩ ꞌbaní rá.
22 Úpí la ãtíꞌbó ĩꞌdidrị̂ kí pa rá;
icó ị́jọ́ lịlé ꞌbá apálépi ru zị̃lépi ĩꞌdi rụ́ rĩ drị̃ gá ãluŋá la ku.