43
Ásị́ tị̃ŋá mádrị̂ ĩꞌdi Ãdróŋâ drị̃ gá
1 Ãdróŋá, ílị áma drị̃ gá ị́jọ́ pịrị rĩ ꞌi,
ílã ma ꞌbá ị́jọ́ kọ́lị la rú ꞌbá Ãdróŋá ãꞌị̃lépi ku ꞌdĩ kí agá;
ípa ma ꞌbá ĩnzóꞌbá ru ị́jọ́ mgbã lẽlépi ku rĩ kí drị́gá fô!
2 Mi Ãdróŋá mádrị́ mání áma zị̃jó ĩꞌdi agá rĩ ꞌi,
“Mí aꞌbe dó ma íni ãꞌdu ị́jọ́ sĩ?”
“Mã dó mụ ũcõgõ ịsụ́ŋá trũ
mẹ́rọ́ꞌbá mádrị̂ ꞌbadrị́ íni ãꞌdu ị́jọ́ sĩ?”
3 Íji mání ãcí mídrị̂ ꞌi, ãzíla ị́jọ mání ị́jọ́ mgbã rĩ,
ꞌbã ꞌde kí áma drị̃;
mí ají ma vúlé ꞌbé mídrị́ ãlá Zị̃yọ́nị̃ drị̃ gá,
ãzíla jó mídrị́ míní sĩ uꞌájó rĩ gá.
4 ꞌDã ꞌbã ũngúkú gá, ma dó mụ ãlĩtárĩ Ãdróŋá drị̂ drị̃ gá.
Ãdróŋá mádrị̂, mi ãyĩkõ mání sĩ áma ũnũjó rĩ,
ma míní úngó ngo ụ̃ꞌdị́ sĩ sĩ ími ịcụ́jó,
Ãdróŋá, mi Ãdróŋá mádrị̂ ꞌi.
5 Ma dó uꞌá ũcõgõ sĩ ãꞌdu sĩ?
Ãꞌdu la dó mání ũcõgõ fẽ nĩ yã?
Ma dó mụ ásị́ ꞌbãlé Ãdróŋá drị̃ gá,
ma mụ ĩꞌdi ịcụ́lé pâlé ãlu ĩꞌdi,
ĩꞌdi ꞌbá áma palépi rĩ ꞌi ãzíla Ãdróŋá mádrị̂ ꞌi.