47
Ãdróŋá ĩꞌdi úpí ru ụ̃nọ́kụ́ drị̃ gá ꞌdâ pírí
1 Ĩsa drị́, ĩmi ꞌbá pírí ụ̃nọ́kụ́ drị̃ gá ꞌdĩ;
ĩmi ịcụ́ Ãdróŋá ꞌi úngó ngolé ụ́ꞌdụ́kọ́ ụrụgá sĩ ãzíla ãyĩkõ sĩ rĩ kî sĩ!
2 Lẽ ụ̃rị̃ ꞌbã rụ ĩmi Úpí Ụrụgá Ãndá nĩ rĩ sĩ;
ĩꞌdi Úpí, Ãmbógó, ụ̃nọ́kụ́ pírí drị̃lẹ́ gá nĩ rĩ ꞌi.
3 Fẽ ũkpó ãmaní sĩ sụ́rụ́ ụ̃nọ́kụ́ drị̃ gá ꞌdâ rĩ kí ndẽjó,
Fẽ ũkpó ãmaní sĩ ꞌbá ụ̃nọ́kụ́ drị̃ gá ꞌdâ rĩ kí rụjó.
4 Pẽ ãmaní ãngũ ãwítã rú ãmaní sĩ rijó alagá ꞌdĩ nĩ,
lẽ Yãkóꞌbõ ꞌi ĩꞌdiní uꞌájó ĩꞌdi sĩ ãfó sĩ rĩ sĩ.
5 Ãdróŋá tụ ụrụgá úzáŋá ꞌbá ꞌbadrị́ ãyĩkõ sĩ rĩ trũ,
Úpí tụ ụrụgá ụ́ꞌdụ́kọ́ gũká drị̂ trũ.
6 Ĩngo úngó Ãdróŋá nî, ĩngo úngó sĩ ĩꞌdi ịcụ́jó rĩ kî;
ĩngo úngó sĩ Úpî ịcụ́jó rĩ kî,
7 ãꞌdusĩku Ãdróŋá ĩꞌdi Úpí ru ụ̃nọ́kụ́ drị̃ gá ꞌdâ pírí nĩ;
ĩmi ịcụ́ ĩꞌdi zãbụ́rị̃ ngoŋá kî sĩ.
8 Ãdróŋá la ũpĩ na sụ́rụ́ kí drị̃lẹ́ gá;
Ãdróŋá ri úpí ru úmvúke ĩꞌdidrị́ ãlá rĩ drị̃ gá.
9 Ãmbogo sụ́rụ́ ꞌbadrị̂ tra kí ru ãngũ ãlu gá
ꞌbá Ãdróŋá Ịbụrahị́mụ̃ drị̂ drị̂ kí abe,
ãꞌdusĩku ũpi ụ̃nọ́kụ́ drị̃ gá ꞌdĩ kí pírí Ãdróŋâ pálé gá,
ála ĩꞌdiní ị̃nzị̃táŋá ãmbógó la fẽ sụ́rụ́ kí agá!