50
Ãdróŋá la ꞌbá ị́jọ́ lị nĩ
1 Ãdróŋá Úpí Ũkpó pírí ꞌDị́pị
jọ ãzíla umve ꞌbá ụ̃nọ́kụ́ gá ꞌdĩ kí pírí
angájó ị̃tụ̂ ꞌbã ãfũ agá cajó kpere ị̃tụ́ ꞌbã ꞌde agâ.
2 Ãdróŋá dị̃ angájó
táwụ̃nị̃ Zị̃yọ́nị̃ drị́ ũnĩ sĩ ãngũ pírí kí ndẽlépi rá rĩ agâlé.
3 Ãdróŋá ãmadrị̂ la amụ́ ꞌdĩ, icó ĩyãŋãlé tú ku;
wó ãcí la mụ ãngũ ivélé ĩꞌdi drị̃lẹ́ gá,
ãlụ́kụ́kụ̃ ũkpó la mụ lilé ĩꞌdi andre gá nĩ.
4 Ãdróŋá la ꞌbụ̃ kí umve ụ̃nọ́kụ́ be adrujó ĩꞌdi ꞌbã sãdínĩ rú
sĩ ꞌbá ĩꞌdidrị̂ kí ị́jọ́ lịjó.
5 Úpí Ãdróŋá jọ, “Mí atrá mání ꞌbá mádrị́ ị́jọ́ mgbã ngalépi ꞌdĩ kí má rụ́ ꞌdõlé,
ꞌdĩ kí ꞌbá tị icíma icílépi má be fẽtáŋá ídétáŋá ru rĩ sĩ ꞌdĩ kî.”
6 ꞌBụ̃ kí iꞌda la Ãdróŋá la ị́jọ́ lị pịrị,
ị́jọ́ ꞌdĩ sĩ Ãdróŋá la mụ ị́jọ́ lịlẹ́ nĩ.
7 Ĩmi are ꞌbá mádrị́ ꞌdĩ, ĩmi are ị́jọ́ mání ị́jọ́ jọ agâ;
ꞌdĩ kí ị́jọ́ mání sĩ ĩmi tõjó rĩ kî, ꞌbá Ịsịrayị́lị̃ drị́ ꞌdĩ;
Ma Ãdróŋá, Ãdróŋá ĩmidrị̂ ꞌi.
8 Má uzá ĩmi drị̃ gá ãnãkpá ĩminí fẽlé mání ãwãꞌdĩfô rú ꞌdĩ kí sĩ
jõku ídétáŋá ĩminí ivélé ivê áma drị̃lẹ́ gá ụ́ꞌdụ́ pírí ꞌdĩ kî sĩ ku.
9 Álẽ ídétáŋá ĩmi ãni
mọ́nị̃gọ́ sĩ ãzíla ị̃ndrị́ sĩ ꞌdĩ kí ku.
10 Ãnãkpá mị̃rị́ agá ꞌdĩ kí pírí mâni
ãzíla tị́ ꞌbé álĩfũ álĩfũ drị̃ gá ꞌdĩ kí mâni.
11 Ánị̃ ãriŋa ꞌbé agá ꞌdĩ kí pírí rá
ãzíla ãko ídri trũ ásé agá ꞌdĩ kí pírí mâni.
12 “Ãbị́rị́ drĩ táni áma fụ agâ nĩ, má icó lũlé la ĩminí ku,
ãꞌdusĩku ụ̃nọ́kụ̂ mâni ãko la ala gá ꞌdĩ kí abe pírí.
13 Ma ĩzá mọ́nị̃gọ́ drị̂ na rá yã?
Jõku ãrí ị̃ndrị́ ꞌbadrị̂ mvụ rá yã?
14 Ĩmi idé Ãdróŋá ní ídétáŋá ãwãꞌdĩfô drị̂ ꞌi,
ĩmi ũfẽ ũyõ ĩminí nalé rĩ ꞌbã tị Ãdróŋá Ãmbógó Ãndânĩ rĩ drị́ rá!
15 Sáwã ị́jọ́ ꞌbã ími ịsụ́jó rĩ sĩ mí umve ma ꞌi;
ma ími pa rá, mi dó sĩ mání ãrútáŋá fẽ.”
16 Wó ꞌbá ũnzí rĩ ꞌbaní Ãdróŋá jọ,
ĩmi ãzị́táŋá mádrị̂ kí jọ drị̃kã sĩ
jõku ĩmi ị́jọ́ mádrị́ tị icíma drị̂ kí
jọ lú tị gá ꞌdâ la ãꞌdu sĩ?
17 Ĩngụ̃ ímbátáŋá mádrị̂ kí ũnzí
ãzíla ĩmi uja ĩmi ũngúkú ị́jọ́ mádrị̂ ꞌbaní áyụ.
18 Ĩdrĩ ụ̃gụ́ꞌbá ndre, ĩmi ĩmi icí ĩꞌdi be,
ãzíla ĩmi ꞌbá ãwụ́ꞌbá ru rĩ kí ũngúkú ãtị̃.
19 Ĩmi tị ĩmidrị̂ kí ayú sĩ ị́jọ́ ũnzí jọjó,
ĩmi ĩnzõ jọ ĩdra ĩmidrị̂ kí sĩ.
20 Ĩmi ị́jọ́ ũnzí jọ ĩmi ádrị́pịka kí ụrụꞌbá gá,
ĩmi ĩmĩ ãndrẽ ꞌbã ngọ́tị́ mgbãrĩ uꞌdá ĩndĩ.
21 Ĩminí ị́jọ́ ꞌdĩ kí idé agâ pírí, má ĩyãŋã tú tú,
ĩmi ũrã dó sĩ ma cécé ĩmi áni.
Wó ma dó íni uzá ími drị̃ gá
ãzíla ma ị́jọ́ ũnzí ĩmidrị̂ kí iꞌda ĩmi drị̃lẹ́ gá tọndọlọ.
22 Ĩmi ũrã drĩ ị́jọ́ ꞌdĩ ꞌi, ĩmi ꞌbá ị́jọ́ ãvĩlépi Ãdróŋâ drị̃ gá rá ꞌdĩ,
ma ĩmi uce kpékpé, ꞌbá ãzí icó ĩmi palé ku.
23 ꞌBá ídétáŋá ajílépi mání ãwãꞌdĩfô rú rĩ ị̃nzị̃ ma rá,
ꞌbá gẹ̃rị̃ ĩꞌdidrị̂ idélépi pịrị rĩ ní
ma patáŋá Ãdróŋá drị̂ iꞌda rá.