56
Ásị́ tị̃jó Ãdróŋá drị̃ gá
1 Ãdróŋá, ími ásị́ ꞌbã adru mání ị̃gbẹ́ ru fô,
ãꞌdusĩku mẹ́rọ́ꞌbá mádrị̂ kí sáwã pírí sĩ áma ndrụ̃ ꞌdịlé.
2 ꞌBá ãꞌdị́ ꞌdịlépi má be rĩ kí ũꞌbí ru,
Kí áma vú ũbĩ ị̃tụ̂rụ̃.
3 Sáwã mání adrujó ụ̃rị̃ sĩ rĩ gá,
átị̃ ásị́ ími drị̃ gá.
4 Átị̃ ásị́ Ãdróŋá drị̃ gá, má icó idélé ụ̃rị̃ sĩ ku;
ma ĩꞌdi ịcụ́ ị́jọ́ ĩꞌdi ꞌbã azịlé rĩ sĩ.
ꞌBá ꞌbá ru rĩ la dó má rụ́ ãꞌdu idé?
5 Ị̃tụ̂rụ̃ mẹ́rọ́ꞌbá mádrị̂ kí áma tị ụꞌdụ;
kí sáwã pírí sĩ ị́jọ́ itú sĩ áma adrájó!
6 Icí kí tị sĩ áma ũmbãjó
ị́jọ́ pírí mání ngalé rĩ kí agá,
sĩ lẽjó áma ꞌdịjó.
7 Ãdróŋá, ífẽ ĩꞌbaní drị̃rịma ị́jọ́ ũnzĩ ĩꞌbadrị̂ kí sĩ;
ũmbã mídrị̂ sĩ íꞌbe kí vụ̃rụ́ fô!
8 Ínị̃ ũcõgõ mádrị̂ íngõpí yã rĩ gá rá;
ímba mị́ndrẹ mádrị̂ kí tã cụ́pã mídrị̂ gá cí,
kãlãfe la kí ísĩ kí bụ́kụ̃ mídrị̂ agâlé cí.
9 ꞌDã ꞌbã ũngúkú gá, ádrĩ ími umve sĩ áma ãzã kojó,
mẹ́rọ́ꞌbá mádrị̂ kí apá rá.
Ị́jọ́ ꞌdĩ sĩ ma dó sĩ nị̃ la rá Ãdróŋá ãtị̃ ma rá.
10 Ma Ãdróŋá ịcụ́ ị́jọ́ ĩꞌdi ꞌbã azịlé rĩ kí sĩ,
maÚpî ịcụ́ ị́jọ́ ĩꞌdi ꞌbã azịlé rĩ sĩ.
11 Átị̃ ásị́ Ãdróŋá drị̃ gá, má icó idélé ụ̃rị̃ sĩ ku;
ꞌbá ꞌbá ru ꞌdĩ la áma idé ãꞌdu rú?
12 Ãdróŋá, ma ị́jọ́ mání ũyõ najó míní rĩ kí idé rá;
ma ídétáŋá ãwãꞌdĩfô fẽjó míní rĩ kí ajị́ rá,
13 ãꞌdusĩku mí ápá ma drã sị́ gá rá
ãzíla ífẽ áma pá ní ĩtrĩlé ku.
Ị́jọ́ ꞌdĩ sĩ Ãdróŋá, ma dó acị́ ími drị̃lẹ́ gá
dị̃zã ídri drị̂ agá.