61
Andre tẽŋá zịjó Ãdróŋá drị́
1 Ãdróŋá, mí are áma áwáŋá fô;
mí are ị́jọ́ mání zịlé ími tị gá rĩ!
2 Ma awá mídrị́ sĩ ãzãkoma aꞌị́jó angájó ãngũ ụ̃nọ́kụ́ ị̃ndụ́ ꞌbã ãsị̃jó rĩ gá,
sáwã ũcõgõ ꞌbã áma ásị́ fẽjó acájó ũkpó kó ru rĩ sĩ,
mí agụ ma ꞌbé
zolépi mání ãndânĩ rĩ ꞌbã drị̃ gá,
3 ãꞌdusĩku mi ꞌbá áma andre tẽlépi rĩ ꞌi,
bõrõ ũkpó áma atrịlépi mẹ́rọ́ꞌbá kí sĩ rĩ ꞌi.
4 Ífẽ má uꞌá mání ãngũ mídrị́ ãlá rĩ agá jãꞌdâ;
ífẽ má adru ími kúkúꞌdĩ gá jãꞌdâ,
5 ãꞌdusĩku mí are ũyõ mání sõlé rĩ ꞌbo Ãdróŋá;
ãzíla ífẽ mání ãwítã ꞌbá ími ụ̃rị̃lépi rĩ ꞌbadrị̂ rá.
6 Mí ĩdrĩ ụ́ꞌdụ́ úpí ní adrujó ídri rĩ kí ãzo rú,
ũpĩ ĩꞌdidrị̂ ꞌbã ị̃drị̃ ru áꞌbị́ anzị ꞌbarụ́ áꞌbị́ anzị ꞌba rụ́!
7 Lẽ ꞌbã ri úmvúke drị̃ gá Ãdróŋâ drị̃lẹ́ gá jãꞌdâ;
ímba ĩꞌdi tã lẽtáŋá ãzíla ị́jọ́ mgbã mídrị́ ukólépi ku rĩ sĩ.
8 Ị́jọ́ ꞌdĩ sĩ ma dó úngó sĩ ími rụ́ ịcụ́jó rĩ ngo,
ãzíla ma dó sĩ ũyõ mání nalé rĩ ꞌbã ãzị́ nga ụ́ꞌdụ́ ãlu ãlu sĩ.