68
Ãdróŋá la mụ mẹ́rọ́ꞌbá ĩꞌdidrị̂ kí irélé rá
1 Ãdróŋá mí angá ãzíla mí iré mẹ́rọ́ꞌbá mídrị̂ kí rá.
ꞌBá ími ngụ̃lépi ũnzí rĩ ꞌbã apá kí ími drị̃lẹ́ gá rĩ sĩ rá.
2 Lẽ ídro kí rá cécé ũlíkã ꞌbã ãcíkã drojó rĩ áni,
cécé ísékísé ꞌbã akájó ãcí sĩ rĩ áni,
Ãdróŋá, ꞌbá ị́jọ́ ũnzí idélépi rĩ ꞌbã ị̃lị̃kị̃ kí ími drị̃lẹ́ gá rá.
3 Wó lẽ ꞌbá ãlá rĩ ꞌbã adru kí ãyĩkõ sĩ
ãzíla ãyĩkõ ꞌbã fụ kí Ãdróŋá drị̃lẹ́ gá;
lẽ ꞌbã uꞌá kí ãyĩkõ sĩ.
4 Ĩngo úngó Ãdróŋá nî, ĩngo úngó sĩ Ãdróŋá rụ́ ị̃nzị̃jó ri kí,
ĩmi ị̃nzị̃ ĩꞌdi, ĩꞌdĩ ꞌbá cẹ̃lépi ãngũ kõtórõ rú rĩ agâ sĩ rĩ ꞌi*68:4 Ĩꞌdi ꞌbá cẹ̃lépi ụ̃rụ́ꞌbụ̃ agâsĩ rĩ ꞌi.,
rụ́ la Úpí ꞌi,
ĩmi uꞌá ãyĩkõ sĩ ĩꞌdi drị̃lẹ́ gá.
5 Ĩꞌdi átẹ́pị ĩmvú ꞌbadrị̂ ꞌi, ĩꞌdi ꞌbá ãwụ́zị́ kí tãmbalépi rĩ ꞌi.
Ĩꞌdi Ãdróŋá uꞌálépi ãngũ ĩꞌdidrị́ ãlá rĩ agá rĩ ꞌi.
6 Ãdróŋá la ꞌbá lị́kị́cọ́ ru rĩ ꞌbaní lị́cọ́ fẽ nĩ,
ĩꞌdi ꞌbá mãbụ́sụ̃ gá rĩ kí trũ nĩ ãzíla ĩꞌdi ĩꞌbaní ãyĩkõ fẽ rá.
Wó ĩꞌdi ꞌbá drĩ ũnzí rĩ kí aꞌbe uꞌálé ãngũ ị̃yị́ kó ru rĩ agá.
7 Ãdróŋá, sáwã ándrá míní ꞌbá mídrị̂ kí drị̃ aꞌdéjó angájó Mị̃sị́rị̃ gá rĩ sĩ,
míní ándrá alịjó ĩꞌba abe kõtórõ agâ sĩ rĩ sĩ,
8 Vũ aya ru aya-ãyã, uzogó asu angájó ꞌbụ̃ gâlé,
asu ími drị̃lẹ́ gá Ãdróŋá Sĩnáyĩ drị̂,
asu Ãdróŋá Ịsịrayị́lị̃ drị̂ drị̃lẹ́ gá.
9 Ãdróŋá, ífẽ ándrá uzogó ꞌdị calépi rĩ sĩ,
ãngũ mídrị́ ru izalépi rá rĩ ní ũkpó fẽjó.
10 ꞌBá mídrị̂ uri kí ándrá ala gá,
Ãdróŋá, ũnĩ mídrị̂ sĩ, íri ꞌbá mídrị́ lẽmẽrí rĩ ꞌbaní ãko fẽlé.
11 Úpí fẽ ãzị́táŋá,
ꞌbá ãzị́táŋá ꞌdã ꞌbã ị́jọ́ ũlũlépi rĩ kí ꞌbã kãlãfe wẽwẽ rú.
12 Ũpi mẹ́rọ́ꞌbá ru rĩ kí ãsĩkárĩ ĩꞌbadrị̂ kí abe apá kí rá,
ũkú Ịsịrayị́lị̃ rú acelépi lị́cọ́ gá rĩ awa kí ãko arálé rĩ kí rá.
13 Ĩꞌbaní táni uꞌájó ãngũ kãbĩlõ ꞌbã kí sĩ ụ́ꞌdụ́ kojó rĩ gá rá tí, úꞌdîꞌda âku dó kí sílĩvã sĩ ãzíla gólũdĩ sĩ cí,
cécé ãlĩꞌbõ ꞌbã ru akujó ĩꞌdi ꞌbã ụ́pụ́pị́ sĩ rĩ áni.
14 Ãdróŋá ũkpó ꞌdị́pị iré ũpi mẹ́rọ́ꞌbá ru rĩ kí cécé uzogó ꞌdịlépi sí trũ ꞌbé Zãlị̃mọ́nị̃ drị̃ gá rĩ áni.
15 ꞌBé Bãsánĩ ĩꞌdi ꞌbé Ãdróŋá drị̂,
ꞌBé Bãsánĩ drị̂ ꞌbã sị́ mbílí rĩ kí ũꞌbí ru.
16 Ĩmi ꞌbé ãzombílíkoko ꞌdĩ, ĩmi ãngũ andré
ꞌbé Ãdróŋá ꞌbã pẽlé sĩ uꞌájó sị́ la gá rĩ gá ãjã si ãꞌdu ị́jọ́ sĩ yã?
Ãndá Úpí la mụ uꞌálé drị̃ la gá jãꞌdâ.
17 Úpí amụ́ angájó ꞌbé Sĩnáyĩ drị̂ gâlé sĩ fijó ãngũ ĩꞌdidrị́ ãlá rĩ gá,
gárĩ ĩꞌdidrị́ ãꞌdị́ drị́ álĩfũ álĩfũ kãlãfe lãlé tí rĩ ce kí ĩꞌdi andre nĩ.
18 Míní tụjó ꞌbụ̃ gâlé rĩ sĩ,
íꞌdụ ꞌbá mãbụ́sụ̃ gá ri kí ũꞌbí ru mí be ĩndĩ,
ꞌbá fẽ kí míní fẽtáŋá kí,
átã ꞌbá mvulépi mí rụ́ ꞌdâ rá rĩ fẽ kí vâ míní fẽtáŋá kí ĩndĩ,
Úpí Ãdróŋá la dó sĩ uꞌá kí agá ꞌdãá benĩ.
19 Ãma ịcụ́ kí Úpí ꞌi, ãma ịcụ́ kí Ãdróŋá ãma palépi rĩ ꞌi,
ĩꞌdi ꞌbá ị́jọ́ ãmadrị́ ũkpó rĩ kí ꞌdụlépi ụ́ꞌdụ́ ãlu ãlu sĩ nĩ rĩ.
20 Ãdróŋá ãmadrị̂ ĩꞌdi Ãdróŋá ꞌbá palépi rĩ ꞌi,
Ãdróŋá Ũkpó ꞌdị́pị la ãma pa drã agá nĩ.
21 Wó Ãdróŋá la mẹ́rọ́ꞌbá ĩꞌdidrị̂ kí drị̃ gbã rá,
ĩꞌdi ụ́rụ́kụ́ ꞌbá ị́jọ́ ũnzí lẽlépi rĩ ꞌbádrị̂ kí andi rá.
22 Úpí jọ, “Ma mẹ́rọ́ꞌbá ĩmidrị̂ kí ají angájó Bãsánĩ gá lé rĩ sĩ,
ma kí anzé mĩrĩ ị̃ndụ́ gâlé rĩ sĩ ãmvé,
23 ꞌbá mádrị̂ kí dó sĩ mụ ru pá ũjĩlé ãrí mẹ́rọ́ꞌbá ĩꞌbadrị̂ drị̂ sĩ,
ũcogo ĩmidrị̂ kí vâ sĩ wókõ ĩꞌbadrị̂ ịsụ́ mbelé ala gá ĩndĩ.”
24 Ãdróŋá, ãcị̃ mídrị́ sĩ ãꞌdị́ ndẽjó rĩ ꞌbá pírí ndre kí dó nĩ,
ãcị̃ Ãdróŋá Úpí mádrị̂ drị́ sĩ fijó ãngũ ãlá rĩ gá rĩ ꞌbá pírí ndre kí dó nĩ.
25 ꞌBá úngó ngolépi rĩ ꞌde kí drị̃ nĩ, ꞌbá ụ̃ꞌdị́ colépi rĩ kí dó kí ũngúkú gá,
izonzi bíkĩrã rú kụ́lịmvá colépi rĩ kí dó ágágá.
26 ꞌBá ũꞌbí Ãdróŋá drị́ ru tralépi ꞌdĩ, ĩmi ịcụ́ Ãdróŋá ꞌi,
ĩmi ịcụ́ Úpí ꞌbá Ịsịrayị́lị̃ drị̂ ꞌbaní ũkpó fẽlépi rĩ ꞌi.
27 Sụ́rụ́ ĩmbíráŋá Bénzãmĩnĩ drị̂ ꞌde kí drị̃ nĩ,
ꞌdã ꞌbã ũngúkú gá drị̃lẹ́ka Yụ́dã drị̂ kí ũꞌbí ĩꞌbadrị̂ kí abe,
drị̃lẹ́ka Zẹ̃bụ̃lọ́nị̃ ꞌbadrị́ Nãfũtálĩ be rĩ aꞌdé kí dó kí ũngúkú gá.
28 Ãdróŋá, mí iꞌda ũkpõ mídrị̂ ꞌi,
ũkpõ mídrị́ vúlêlé ru míní ándrá ayúlé sĩ ãzị́ ngajó ãmaní rĩ ꞌi.
29 Jó mídrị́ Yẹ̃rụ́sãlẹ́mụ̃ gá rĩ ꞌbã ị́jọ́ sĩ,
ũpi kí mụ fẽtáŋá kí ajílé mínî.
30 Mí uzá ꞌbá Mị̃sị́rị̃ drị̂ kí drị̃ gá, ꞌbá uꞌálépi úŋmí agá ꞌdĩ kí drị̃ gá,
Mí uzá sụ́rụ́ ru tralépi cécé kãjoŋa kí áni mọ́nị̃gọ́ ꞌbã kí drị̃ ꞌdelé nĩ rĩ kí drị̃ gá,
kpere ĩꞌbaní pírí ãvụ̃ agá ími drị̃lẹ́ gá ãzíla ĩꞌbaní sílĩvã kí ají agá mínî.
Mí iré ꞌbá ãꞌdị́ lẽlépi ambamba ꞌdi kí rá!
31 Drị̃lẹ́ gãmétẽ drị̂ kí mụ ãfũlé Mị̃sị́rị̃ gá rá,
ꞌbá Ị̃tọ́pị̃yã gá rĩ kí drị́ inga Ãdróŋá ãꞌị̃jó.
32 Ĩmi sụ́rụ́ ụ̃nọ́kụ́ gá ꞌdĩ, ĩngo úngó Ãdróŋá nî,
ĩngo úngó sĩ Úpî rụ́ ịcụ́jó rĩ kî,
33 ĩngo úngó ꞌbá cẹ̃lépi ụ̃rụ́ꞌbụ̃ ídu rĩ kí agâ sĩ rĩ nî,
ꞌbá uzálépi ụ́ꞌdụ́kọ́ re sĩ rĩ nî.
34 Mí ũlũ ị́jọ́ ũkpõ Ãdróŋá drị̂ drị̃ gá
ũpĩ ĩꞌdidrị̂ aku Ịsịrayị́lị̃ drị̃ cí,
ũkpõ ĩꞌdidrị̂ ụrụgá ụ̃rụ́ꞌbụ̃ kí agá.
35 Ãdróŋá mi ụ̃sụ̃táŋá ru ãngũ mídrị́ ãlápítí rĩ agâlé,
Ãdróŋá Ịsịrayị́lị̃ drị̂ la ũkpó fẽ ꞌbá ĩꞌdidrị̂ ꞌbaní.
Ãma ịcụ́ kí Ãdróŋá ꞌi!