81
Úngó ngolé ụ̃mụ̃ gá rĩ
1 Ĩngo úngó ụ́ꞌdụ́kọ́ ụrụgá sĩ Ãdróŋá adrulépi ũkpó ãmadrị̂ rú rĩ ní;
ĩmi uzá ãyĩkõ sĩ Ãdróŋá Yãkóꞌbõ drị̂ ní!
2 Ĩngo úngó! Ĩco kụ́lị mvá;
ĩco úngó ãjị́ ambamba rĩ ãꞌdụ́ngụ́ sĩ ụ̃ꞌdị́ be.
3 Ĩvu gũká sĩ ụ̃mụ̃ ĩmbá úꞌdí rĩ drị̂ ị̃nzị̃jó rĩ ꞌbã ị́jọ́ iꞌdajó,
ĩvu gũká sáwã ĩmbâ ꞌbã agájó úꞌdí rĩ sĩ,
sáwã ĩmbá ꞌbã agájó gbụrụ pírí rĩ sĩ.
4 Ị́jọ́ ꞌdĩ ĩꞌdi Ịsịrayị́lị̃ gá ꞌdâ ãzị́táŋá ru,
ãzị́táŋá ꞌdĩ angá Ãdróŋá Yãkóꞌbõ drị̂ drị́.
5 Ãdróŋá fẽ ãzị́táŋá ꞌdĩ ꞌbá Ịsịrayị́lị̃ drị̂ ꞌbaní,
ĩꞌdiní ándrá mụjó ꞌbá Mị̃sị́rị̃ drị̂ kí drị̃ arụ́jó sĩ ãma trũjó rĩ sĩ.
Má are ụ́ꞌdụ́kọ́ ãzí mání nị̃lé ku la jọ.
6 “Áꞌdụ tẹ́rị́ ĩmi drị̃ gá ri ꞌbo;
Átrũ ĩmi ãzị́ ũkpó ĩminí ngalé rĩ kí agá rá.
7 Ĩminí ándrá adrujó ũcõgõ agá rĩ sĩ, ĩzị ándrá ma, wó má umvi ándrá ĩmi rá,
Má umvi ĩmi ãngũ mání sĩ áma zị̃jó ãvi ꞌbã sĩ ũnĩjó rĩ gá;
Má ụ̃ꞌbị̃ ándrá ĩmi ị̃yị́ Mẹ̃rị́bã drị̂ agá ꞌdãá.
8 Ĩmi are drĩ ị́jọ́ mání ĩmi bị́lẹ́ ị̃ndụ́ lijó ꞌdĩ ĩmi sụ́rụ́ mádrị́ ꞌdĩ;
ĩmi ꞌbá Ịsịrayị́lị̃ drị́ ꞌdĩ, ĩdrĩ tá ị́jọ́ mání jọlé ĩminí rĩ are rá la múké fô!
9 Lẽ ĩmi ị̃nzị̃ ãdróŋá ãzí ndú la ku;
lẽ ĩmi ãvụ̃ ãdróŋá ãzí ĩminí nị̃lé ku la ị̃nzị̃jó ku.
10 Ma Úpí Ãdróŋá ĩmidrị́,
ĩmi anzélépi ãngũ Mị̃sị́rị̃ drị̂ gâlé rĩ ꞌi.
Ị̃nzị̃ tị mgbọ rụ́, ma ĩminí ãko múké ri kí fẽ rá.
11 Wó ꞌbá mádrị̂ are kí áma ụ́ꞌdụ́kọ́ ku;
ꞌBá Ịsịrayị́lị̃ drị̂ fẽ kí mání ãrútáŋá ku.
12 Ị́jọ́ ꞌdĩ sĩ áfẽ dó mụ kí drị̃ ũnzĩkãnã ĩꞌbadrị̂ kí ngaŋá trũ,
sĩ ị́jọ́ kí ásị́ ꞌbã lẽlé ri kí ngajó.
13 ꞌBá mádrị̂ drĩ kí tá áma are rá la múké;
ꞌbá Ịsịrayị́lị̃ drị̂ drĩ kí tá gẹ̃rị̃ mádrị̂ kí vú ũbĩ rá la tá múké!
14 Ma tá mẹ́rọ́ꞌbá ĩꞌbadrị̂ kí ndẽ gbõŋá ru,
ma tá drị́ mádrị̂ uja kí ụrụꞌbá gá ũnzí.
15 ꞌBá Úpî ngụ̃lépi ũnzí rĩ kí amụ́ ãvụ̃lé drị̃lẹ́ la gá ụ̃rị̃ sĩ;
drị̃rịma ĩꞌbadrị̂ la mụ adrulé jãꞌdâ.
16 Wó Úpí la tá ꞌbá ĩꞌdi lẽlépi rĩ ꞌbaní ãná múké rĩ fẽ nalé rá,
ĩꞌdi tá fẽ ĩꞌbaní agajó ãnụ́ írã agá rĩ sĩ rá.”