94
Ãdróŋá la ꞌbá pírí kí ị́jọ́ lị nĩ
1 Úpí, mi Ãdróŋá drị̃rịma fẽlépi rĩ ꞌi,
mí iꞌda ũmbã mídrị̂ ꞌi.
2 Mi ꞌbá pírí kí ị́jọ́ lị mi ꞌi.
Mí angá ãzíla mí ũfẽ ꞌbá ãfó ru rĩ kí ị́jọ́ ĩꞌbaní ngalé rĩ kí vú sĩ.
3 Úpí, ꞌbá ũnzí rĩ kí uꞌá ãyĩkõ sĩ ụ́ꞌdụ́ íngõpí?
Ụ́ꞌdụ́ íngõpí yã?
4 ꞌBá ũnzí rĩ kí uꞌá ãfó sĩ ụ́ꞌdụ́ íngõpí?
Kí ru ịpị́ ị́jọ́ ũnzí ĩꞌbadrị̂ kí sĩ ụ́ꞌdụ́ íngõpí?
5 Úpí, ꞌbá ꞌdĩ kí ꞌbá mídrị̂ kí ụꞌdị́
ãzíla kí kí ĩkpã.
6 Kí ãwụzị kí ụꞌdị́ ĩmvú kí abe,
ãzíla kí ꞌbá ãmị́yọ́ŋá ru rĩ kí ụꞌdị́.
7 Kí jọ la, “Úpí ndre ãma ku,
Ãdróŋá Ịsịrayị́lị̃ drị̂ ꞌbã ásị́ ku.”
8 Ĩmi ũrã drị̃ ị́jọ́, ĩmi ꞌbá ũndũwã kóru ꞌdĩ;
Ĩmi ꞌbá azalépi aza-azâ ꞌdĩ, ĩmi dó ị́jọ́ nị̃ ãꞌdu tú yã?
9 Ãdróŋá ꞌbá kí bị́lẹ́ ꞌbãlépi nĩ rĩ icó ị́jọ́ arelé ku yã?
Ãdróŋá ꞌbá kí mịfị́ ꞌbãlépi nĩ rĩ icó ãngũ ndrelé ku yã?
10 Ĩꞌdi ꞌbá sụ́rụ́ kí imbálépi rĩ icó ĩꞌbaní drị̃rịma fẽlé ĩꞌbã ní ku yã?
Ĩꞌdi ꞌbá ꞌbá kí ímbápị pírí rĩ ĩꞌdi icó adrulé ũndũwá kóru rá yã
11 Úpí nĩ ị́jọ́ ꞌbá ꞌbã kí ũrãlé rĩ kí cé;
ũrãtáŋá ĩꞌbadrị́ rĩ kí ífí kọ́lị.
12 ꞌBá Úpí míní imbálé ãzị́táŋá mídrị̂ kí sĩ nĩ rĩ
la adru drị̃lẹ́ba ru,
13 Mi ĩꞌdi fẽ avị́lé ụ́ꞌdụ́ ũcõgõ drị̂ kí sĩ rá
kpere ꞌbání ꞌbá ũnzí rĩ ꞌbaní ꞌbụ́ ga agâ sĩ kí rụjó.
14 Ãꞌdusĩku Úpí gã ꞌbá ĩꞌdidrị̂ kí ku;
icó ꞌbá ĩꞌdidrị̂ kí aꞌbelé ku.
15 ꞌBá ị́jọ́ lịlépi rĩ kí mụ ị́jọ́ pịrị rĩ lịlé
ãzíla ꞌbá ásị́ ãlá rĩ kí mụ uꞌálé pírí ãyĩkõ sĩ.
16 Ãꞌdi la mání angá ꞌbá ị́jọ́ ũnzí rĩ kí ụrụꞌbá gá nĩ yã?
Ãꞌdi la mání pá tu ꞌbá ị́jọ́ ũnzí idélépi rĩ kí drị̃ arụ́jó nĩ yã?
17 Úpí drĩ tá áma ãzã ko ku la,
áfi tá nõ ꞌbụ́gá ꞌbo.
18 Ádrĩ jọ la, “Áma pá la ĩtrĩ-ĩtrĩ,”
Úpí, lẽtáŋá mídrị̂ la áma ãzã ko nĩ.
19 Sáwã mání adrujó ũrãtáŋá sĩ ãzíla ụ̃rị̃ sĩ rĩ sĩ,
mí ũŋmĩ áma ásị́ rá ãzíla má uꞌá ãyĩkõ.
20 Mí icó ími icílé drị̃lẹ́ ũnzí rĩ abe ku
ãꞌdusĩku kí ị́jọ́ lị mũlũmbẽ sĩ.
21 Kí tị icí ꞌbá ãlá rĩ kí ụrụꞌbá gá
ãzíla kí ị́jọ́ lị ꞌbá ị́jọ́ kó ru rĩ kí drị̃ gá sĩ kí ụꞌdị́jó rá.
22 Wó Úpí ĩꞌdi dó ꞌbá áma tã mbalépi rĩ ꞌi;
ãzíla Ãdróŋá mádrị̂ ĩꞌdi ãngũ mání sĩ áma zịjó rĩ.
23 Ĩꞌdi kí ũfẽ ị́jọ́ ũnzí ĩꞌba drị̂ kí sĩ nĩ,
ãzíla ĩꞌdi kí ị̃lị̃kị̃ ị́jọ́ ũnzí ĩꞌba kí ngalé rĩ kí sĩ rá;
Úpí, Ãdróŋá ãmadrị̂ la kí ị̃lị̃kị̃ rá.