110
Úpí kí úpí ĩꞌdiní Pẽlé rĩ be
1 Úpí jọ úpí mádrị̂ ní:
“Íri áma drị́ ãndá rĩ gá ꞌdâ,
kpere mání mẹ́rọ́ꞌbá
mídrị̂ kí ꞌbã agá ími pálé gá.”
2 Úpí la ãngũ mídrị́ ũpĩ drị̂ ꞌa nzã angájó Zị̃yọ́nị̃ gá,
Mi dó sĩ mụ ũpĩ nalé mẹ́rọ́ꞌbá mídrị̂ kí drĩdríŋĩ gá.
3 Ãsĩkárĩ mídrị̂ kí mụ ru fẽlé ãꞌdị́ ꞌdịlé ásị́ pírí sĩ ụ́ꞌdụ́ ãꞌdị́drị̂ gá.
Ụ̃ꞌbụ́tị nị́nị́ ãsĩkárĩ mídrị̂ kí ru ụ̃tị̃ bõngó ãlá sĩ
andrẹlị́ ãngũsãrã sĩ rĩ áni,
kí dó sĩ amụ́ mị́rụ́ ꞌbé ãlá rĩ sị́gá ꞌdõlé.
4 Úpí na ũyõ ꞌbo,
ãzíla icó ru úŋmĩ ujalé ku
Mi adru átáló ru jãꞌdâ,
cécé Mẹ̃lẹ̃kị̃zẹ̃dẹ́kị̃ ꞌbã ándrá adrujó rĩ áni.
5 Úpí ĩꞌdi ími drị́ ãndá rĩ gá,
Ụ́ꞌdụ́ ĩꞌdidrị́ adrã drị̂ sĩ, ĩꞌdi ũpi kí ụꞌdị́ rá.
6 Ĩꞌdi ị́jọ́ lị sụ́rụ́ kí drị̃ gá, ãngũ ãꞌdị́ drị̂ la ga tré ãvũ sĩ
ãzíla ĩꞌdi ũpi ụ̃nọ́kụ́ drị̃ gá ri kí ụꞌdị́ pírí rá.
7 Úpí la mụ ị̃yị́ mvụlé áꞌbụ gẹ̃rị̃ tị gá rĩ gá;
ị́jọ́ ꞌdĩ sĩ ĩꞌdi mẹ́rọ́ꞌbá ĩꞌdidrị̂ kí ndẽ rá.