118
Ãwãꞌdĩfô fẽjó ãꞌdị́ ndẽŋá sĩ rĩ
1 Ífẽ ãwãꞌdĩfô Úpí nî ãꞌdusĩku ĩꞌdi múké,
“Lẽtáŋá ĩꞌdidrị̂ ĩꞌdi jãꞌdâ.”
2 ꞌBá Ịsịrayị́lị̃ drị̂ ꞌbã jọ kí,
“Lẽtáŋá ĩꞌdidrị̂ ĩꞌdi jãꞌdâ.”
3 ꞌBá lị́cọ́ Ãrọ́nị̃ drị̂gá rĩ ꞌbã jọ kí,
“Lẽtáŋá ĩꞌdidrị̂ ĩꞌdi jãꞌdâ.”
4 ꞌBá Úpî ụ̃rị̃lépi rĩ ꞌbã jọ kí,
“Lẽtáŋá ĩꞌdidrị̂ ĩꞌdi jãꞌdâ.”
5 Ũcõgõ mádrị̂ agá, má awá Úpî drị̃lẹ́ gá,
umvi ma rá ãzíla fẽ mání drị̃lẹ́mgbọ rá.
6 Úpí ĩꞌdi má be cí. Má icó idélé ụ̃rị̃ sĩ ku.
ꞌBá ꞌbá ru rĩ icó dó márụ́ rá rĩ gá ãꞌdu idélé?
7 Úpí ĩꞌdi má be cí, ĩꞌdi ꞌbá áma ãzãkolépi rĩ ꞌi.
Ma dó mẹ́rọ́ꞌbá mádrị̂ kí ndre ꞌbá mání ndẽlé rá la rú.
8 Ĩꞌdi múké sĩ ru zị̃jó Úpî agá
ndẽ ásị́ tị̃jó ꞌbá drị̃ gá rĩ rá.
9 Ĩꞌdi múké sĩ ru zị̃jó Úpí agá,
ndẽ ásị́ tị̃jó drị̃lẹ́ka kí drị̃ gá rĩ rá.
10 Sụ́rụ́ pírí ce kí ma rị́,
wó ũkpó Úpí drị̂ sĩ, má ị̃lị̃kị̃ kí rá.
11 Ce kí ma wókõ pírí gâsĩ,
wó ũkpó Úpí drị̂ sĩ, má ị̃lị̃kị̃ kí rá.
12 Tra kí ru áma andregá cécé ãnụ́kụ́fị́ ꞌbã kí ru trajó rĩ áni,
na kí sị́ áma drị̃ gá cécé ãcí velépi ụ́ꞌdụ́kọ́ trũ rĩ áni,
wó ũkpó Úpí drị̂ sĩ, má ị̃lị̃kị̃ kí rá.
13 Mẹ́rọ́ꞌbá mádrị̂ ụ̃ꞌbị̃ kí ásị́ pírí sĩ lẽjó áma ꞌdịjó,
wó Úpí pa ma kí drị́gá rá.
14 Úpí la mání ũkpó fẽ nĩ ãzíla ĩꞌdi áma tãmba nĩ,
acá dó sĩ ꞌbá áma palépi rĩ rú.
15 Ála úngó ãyĩkõ drị̂ kí ngo ãꞌdị́ ndẽŋá drị̂ kí abe
hémã ꞌbá ãlá rĩ ꞌbadrị̂ kí agá,
“Ũkpõ Úpí drị́ ãmbógó rĩ sĩ idé ị́jọ́ ꞌdĩ nĩ.
Úpí ꞌbã drị́ ãndá rĩ idé ị́jọ́ ũkpó la kî!
16 Úpí inga ru drị́ ãndá rĩ ụrụgá fẽ sĩ ãmaní ãꞌdị́ ndẽlé rá,
Úpí ꞌbã drị́ ãndá rĩ idé ị́jọ́ ũkpó la kî!”
17 Má icó drãlé ku wó rá la sĩ ma adru ídri rú,
ãzíla ma dó sĩ ị́jọ́ Úpí ní idélé rĩ kí ũlũ.
18 Úpí fẽ mání pángá ũkpó ru,
wó fẽ ádrã gẹ̃rị̃ sĩ ku.
19 Ínzị̃ mání kẹ̃jị́ ị́jọ́ pịrị rĩ drị̂ ꞌi,
Ma dó sĩ fi agá ãzíla ma dó sĩ ãwãꞌdĩfô fẽ Úpí nî.
20 ꞌDĩ kẹ̃jị́tị Úpí drị̂ ꞌi,
ꞌbá ãlá rĩ ꞌbaní sĩ fijó agâlé rĩ ꞌi.
21 Ma míní ãwãꞌdĩfô fẽ, ãꞌdusĩku mí umvi ma rá,
mí acá dó ꞌbá áma palépi rĩ rú ꞌbo.
22 Írã ꞌbá jó sịlépi rĩ ꞌbã kí gãlé sĩ rĩ
acá dó ãko ụ̃rọ̃drị́ trũ ãndânĩ pírí.
23 Úpí idé ị́jọ́ ꞌdĩ nĩ,
ị́jọ́ ĩꞌdi ꞌbã idélé ꞌdĩ ãma mịfị́ gá ụ̃sụ̃táŋá rú!
24 ꞌDĩ ụ́ꞌdụ́ Úpí drị́ ĩꞌdiní sĩ ãꞌdị́ ndẽjó rĩ ꞌi,
lẽ ãma idé kí ụ̃mụ̃, lẽ ãma uꞌá kí dó sĩ ãyĩkõ sĩ!
25 Ípa ãma, Úpí, ípa ãma!
Úpí ífẽ ãmaní ãꞌdị́ ndẽlé fô!
26 ꞌBá amụ́lépi Úpí ꞌbã rụ́ sĩ rĩ ĩꞌdi drị̃lẹ́ba rú.
Ãwi míní sụ̃sụ́ angájó jó Úpí drị̂ agá.
27 Úpí ĩꞌdi Ãdróŋá ꞌi, fẽ dị̃zã ĩꞌdidrị̂ ní dị̃lé ãma drị̃ gá ꞌbo.
Ĩmi umbé dó ãnãkpá idétáŋá ru rĩ ĩbáká sĩ áló
ãlĩtárĩ drị̂ ụrụꞌbá gá.
28 Mi Ãdróŋá mádrị̂ ꞌi, ãzíla áfẽ míní ãwãꞌdĩfô,
ma ị́jọ́ míní idélé ụ̃sụ̃táŋá ru rĩ kí vú nze.
29 Ífẽ ãwãꞌdĩfô Úpí ní, ãꞌdusĩku ĩꞌdi múké,
ãzíla Lẽtáŋá ĩꞌdidrị̂ ĩꞌdi jãꞌdâ.