135
Úngó sĩ ꞌbá ịcụ́jó rĩ
1 Ĩmi ịcụ́ Úpí ꞌi!
Ĩmi ịcụ́ rụ́ ĩꞌdidrị̂ ꞌi,
ĩmi ãtíꞌbó Úpí drị́ ꞌdĩ, ĩmi ịcụ́ Úpí ꞌi.
2 Ĩmi ãtiꞌbo pá tulépi jó Ãdróŋá drị̂ agá,
ãzị́ ngalépi jó ĩꞌdidrị̂ agá ꞌdĩ, ĩmi ịcụ́ Úpí ꞌi!
3 Ĩmi ịcụ́ Úpí ꞌi, ãꞌdusĩku Úpí ĩꞌdi ãlá ru;
ĩngo úngó kí sĩ ĩꞌdi rụ́ ịcụ́jó, ãꞌdusĩku ĩꞌdi ị́jọ́ ãzí ũnĩ-ambamba la sĩ rụ́ la ungojó,
4 ãꞌdusĩku Úpí pẽ Yãkóꞌbõ ꞌi ꞌbá ĩꞌdi ãni la rú
pẽ Ịsịrayị́lị̃ ĩꞌdi ꞌbã ãko rú.
5 Ánị̃ rá Úpí ꞌi ãmbógó ru,
ãzíla Úpí ãmadrị̂ ĩꞌdi ãdroŋa pírí kí drị̃lẹ́ gá.
6 Ị́jọ́ cí Úpí ní ãyĩkõ fẽlépi
ꞌbụ̃ gâlé ãzíla vũ drị̃ gá ꞌdâ,
mĩrĩ agá ãzíla mĩrĩ ị̃ndụ́ gá vũ gâlé rĩ ĩꞌdi nga la rá.
7 Ĩꞌdi ị́rị́tị kí fẽ tụlé ụ̃nọ́kụ̂ ꞌbã drị̃ gá ꞌdâ pírí nĩ,
Ĩꞌdi ãvi fẽ ũnĩlé uzogó ní sĩ ꞌdịjó nĩ
ãzíla ĩꞌdi ũlí fẽ lilé angájó ãngũ ĩꞌdiní si tã la mbajó rĩ gá.
8 Fẽ kãjãní Mị̃sị́rị̃ gá rĩ ꞌbaní ị̃lị̃kị̃jó nĩ,
kãjãní ꞌbá ꞌbadrị̂ kí ãnãkpá ꞌbadrị̂ kí abe.
9 Idé tálí kí ị́jọ́ ícétáŋá ru rĩ kí abe Mị̃sị́rị̃ gâlé,
idé kí Fãráwụ̃ ụrụꞌbá gá ãmbogo ĩꞌdidrị̂ kí abe.
10 Fẽ sụ́rụ́ ũꞌbí ꞌbaní ị̃lị̃kị̃jó rá
ãzíla ụꞌdị́ ũpi ũkpó trũ ꞌdĩ kí rá.
11 ꞌDị Sị̃họ́nị̃, úpí ꞌbá Ãmọ́rị̃ drị̂ ꞌbadrị̂ rá,
Ụ́gị̃, úpí Bãsánĩ drị̂ rá
ãzíla ụꞌdị́ ũpi Kãnánĩ gá rĩ kí rá
12 fẽ dó sĩ ãngũ ĩꞌbadrị̂ ãwítã rú,
ãwítã rú ꞌbá ĩꞌdidrị́ Ịsịrayị́lị̃ ꞌbaní.
13 Úpí, rụ́ mídrị̂ la pá tu jãꞌdâ,
Úpí, ála mụ rụ́ mídrị̂ ꞌbã ị́jọ́ igálé jãꞌdâ,
14 ãꞌdusĩku Úpí la mụ ị́jọ́ pịrị rĩ lịlé ꞌbá ĩꞌdidrị̂ ꞌbaní rá,
ĩꞌdi mụ ãtiꞌbo ĩꞌdidrị̂ kí ízákĩzã ndrelé rá.
15 Ãdroŋa sụ́rụ́ ãzí rĩ ꞌbadrị̂ kí sílĩvã kí gólũdĩ be,
ꞌdi kí ãko ꞌbá ꞌbaní idélé drị́ sĩ la kî.
16 Ãdroŋa ĩnzõ rú ꞌdi kí tị trũ, wó icó kí ị́jọ́ jọlé ku;
kí mịfị́ trũ, wó icó kí ãngũ ndrelé ku.
17 Kí bị́lẹ́ trũ wó are kí ị́jọ́ ku,
kí ũmvu trũ wó se kí ává ku.
18 ꞌBá ãdroŋa ꞌdĩ kí idélépi rĩ kí adru cécé kî áni,
ꞌbá ásị́ tị̃lépi kí drị̃ gá ri kí vâ adru cécé kî áni.
19 Ĩmi ꞌbá Ịsịrayị́lị̃ drị́ ꞌdĩ, ĩmi ịcụ́ Úpí ꞌi!
Ĩmi ãtalo ãfũlépi Ãrọ́nị̃ rụ́ ꞌdĩ, ĩmi ịcụ́ Úpí ꞌi!
20 Ĩmi ꞌbá Lẹ́vị̃ drị́ ꞌdĩ, ĩmi ịcụ́ Úpí ꞌi!
Ĩmi ꞌbá Úpí rulépi ꞌdĩ, ĩmi ịcụ́ Úpí ꞌi!
21 Ĩmi ịcụ́ Úpí ꞌi angájó Zị̃yọ́nị̃ gá,
ãꞌdusĩku ĩꞌdi uꞌá Yẹ̃rụ́sãlẹ́mụ̃ gá!
Ĩmi ịcụ́ Úpí ꞌi!