19
Wach mokor kuom Misri
1 Ma e wach mane okor kuom Misri:
To neuru, Jehova Nyasaye biro piyo piyo
koa e boche polo kochomo Misri.
Nyiseche mopa mag Misri kirni
e nyime kendo jo-Misri dhi ka rumo.
2 “Abiro thuwo jo-Misri kendgi,
ngʼato noked mana gowadgi,
joma odak mokiewo noked kendgi,
mier madongo noked kendgi,
kendo pinjeruodhi bende noked kendgi.
3 Chuny jo-Misri nonyosre
kendo anaketh gik moko duto ma gichano timo;
ginidwar wach kuom nyiseche mopa kod lang chunje mane osetho,
ajuoke kod nyakalondo.
4 Abiro chiwo jo-Misri
e lwet jatelo mager,
kendo ruoth makwiny ema nobed gi loch kuomgi.”
Ruoth Nyasaye ma en Jehova Nyasaye Maratego ema owacho.
5 Pige mag aora biro dwono,
kendo kuonde ma pi luwo biro two ma bar okak.
6 Kuonde ma pi luwo nodungʼ marach;
bede aore mag Misri nodwon mi two.
Odundu kod se biro ner,
7 kaachiel gi gik moti mopidhie cham e bath aora Nael
notwo ma bar okak kendo cham bende noner molal nono.
8 Jolupo nobed gi lit mi ywagi,
to jogo duto matego golowu e aora Nael;
kod joma chiko gokgi e pi nosienyre.
9 Jogo machweyo lewni mag tworo nobed mool
kendo joma chweyo gik mabeyo chunygi nonyosre.
10 Jogo maloso lewni nobed gi parruok,
kendo jogo mayudo misara nobed gi chuny mool.
11 Jotelo mag Zoan gin ji mofuwo,
kendo jongʼad rieko mag Farao chiwo paro manono.
Ere kaka iwacho ne Farao niya,
“An achiel kuom jorieko, ma nopuonjore kuom ruodhi machon?”
12 Koro ere jogi mariekgo?
Koro ginyisiane mondo ingʼe gima Jehova Nyasaye Maratego chano timo ne Misri.
13 Jotend Zoan osebedo joma ofuwo,
jodong Memfis osewuondi;
kendo jotelogi osewito jo-Misri.
14 Jehova Nyasaye osejwangʼogi ma chunygi ool;
gimiyo jo-Misri tangni e gik moko duto ma otimo,
machal mana ka jakongʼo madwanyore kama ongʼokie.
15 Onge gimoro amora ma Misri nyalo timo maber,
bedni en jatelo kata ngʼama otelne,
obed bad othith kata odundu.
16 E kindeno jo-Misri nochal mana ka mon. Gibiro kirni ka luoro omakogi ka gineno kum maa e lwet Jehova Nyasaye Maratego. 17 Piny Juda nomi luoro maduongʼ omak jo-Misri. Ji duto ma nowinj nying Juda kihondko nogo, nikech gima Jehova Nyasaye Maratego osechano timonegi.
18 E kindeno mier madongo abich mag Misri nowuo gi dho jo-Kanaan kendo ginikwongʼre ni ginitine Jehova Nyasaye Maratego. Achiel kuomgi noluongi ni Dala Maduongʼ mar Kethruok.
19 E kindeno kendo mar misango mar Jehova Nyasaye nobedi e dier piny Misri kendo kidi mar rapar mar Jehova Nyasaye noket e tongʼne. 20 Obiro bedo ranyisi kendo rapar ne Jehova Nyasaye Maratego e piny Misri. Ka giywagore ne Jehova Nyasaye nikech joma sandogi, to obiro oronegi jawar kendo jakony, mi enoresgi. 21 Kuom mano Jehova Nyasaye noyangre maler mi jo-Misri ngʼeye, kendo e kindeno giniyie kuom Jehova Nyasaye. Gibiro lame ka gitimone misengini kod chiwo mag cham; ka gisingore ne Jehova Nyasaye kendo gichopo singruokno. 22 Jehova Nyasaye biro goyo Misri gi masiche, nogogi kendo bangʼe nochang-gi. Giniduogi ir Jehova Nyasaye, mi nowinj kwayogi kendo ochang-gi.
23 E kindeno yo maduongʼ nobedi koa Misri nyaka Asuria. Jo-Asuria nodhi Misri kendo jo-Misri bende nodhi Asuria. Jo-Misri kod jo-Asuria nolam kaachiel. 24 E kindeno Israel nobed piny mar adek ka giriwore gi Misri kod Asuria mondo gibed gweth ne piny. 25 Jehova Nyasaye Maratego biro gwedhogi kawacho niya, “Agwedho jo-Misri ma gin joga, jo-Asuria ma gin chwechna kod jo-Israel ma gin girkeni mara.”