17
Yesu olamo
1 Kane Yesu osetieko wacho wechegi, nongʼiyo polo bangʼe olamo kama:
“Wuora, sa osechopo. Mi Wuodi duongʼ mondo Wuodi bende omiyi duongʼ. 2 Nimar isemiye loch ewi ji duto mondo omi ji duto misemiye oyud ngima mochwere. 3 To ngima mochwere ema: ni mondo gingʼeyi in Nyasaye makende mar adier, kod Yesu Kristo, Jal miseoro. 4 Asemiyi duongʼ e piny kuom tieko tich mane imiya mondo atim. 5 To koro, Wuora, miya duongʼ e nyimi machal gi duongʼ mane an-go kodi kane piny pok obetie.
Yesu olemo ne jopuonjrene
6 “Asehulo nyingi ni joma ne imiya e piny. Ne gin jogi, to ne imiyagi, kendo koro girito wachni. 7 Koro gingʼeyo ni gik moko duto ma isemiya oa kuomi. 8 Nimar ne amiyogi weche mane imiya kendo ne girwakogi. Gisengʼeyo gadier ni ne aa iri, kendo giseyie ni ne iora. 9 Koro alamonegi. Ok alam ni piny, to alamo ni joma isemiya, nimar gin magi. 10 Giga duto gin magi, kendo gigi duto gin maga, kendo aseyudo duongʼ kuomgi. 11 Koro ndalona mag bet e piny orumo, nimar abiro iri, to gin pod gin e piny. Yaye Wuoro Maler, ritgi gi teko mar nyingi mane imiya, mondo gibed achiel mana kaka wan kodi wan achiel. 12 Kane pod an kodgi, to nachikogi kendo naritogi maber gi nying mane imiya. Onge kata achiel kuomgi moselal, makmana ngʼatno mane ochan ni nyaka lal mondo Ndiko ochop kare.
13 “Koro abiro iri, to awacho gigi kapod an e piny, mondo gibed gi morna mogundho eigi. 14 Asemiyogi wachni, kendo piny ochayogi, nimar ok gin mag pinyni, mana kaka an bende ok an mar pinyni. 15 Ok alam mondo igolgi oko e piny, to alamo ni iritgi mondo kik Ngʼama Rach timnegi marach. 16 Ok gin mag pinyni, mana kaka an bende ok an mar pinyni. 17 Pwodhgi gi adierani, nikech Wachni en adiera. 18 Kaka ne iora e piny e kaka an bende aseorogi e piny. 19 Apwodhora nikech gin, mondo omi gin bende gipwodhreni gi adiera.
Yesu olemo ne joma oyie duto
20 “Ok alam ni gin kendgi, to alamo bende ni jogo mabiro yie kuoma bangʼ ka gisepuonjogi. 21 Yaye Wuora, mi gibed achiel, mana kaka in e iya kendo an e iyi. Mad gin bende gibed e achiel kodwa, mondo piny oyie ni iseora. 22 Asemiyogi duongʼ mane imiya, mondo gibed achiel kaka wan achiel, 23 ka an kuomgi kendo in kuoma. Mad giriwre gibed gimoro achiel mondo piny ongʼe ni ne iora, kendo ni iseherogi mana kaka isehera.
24 “Wuora, adwaro ni joma isemiya obed koda kama antie, kendo ni gine duongʼna, ma en duongʼno misemiya nikech ne ihera kapok nochwe piny.
25 “Wuoro Makare, kata obedo ni piny ok ongʼeyi, an to angʼeyi, kendo jogi bende ongʼeyo ni ne iora. 26 Asehulonegi nyingi, kendo pod abiro medo nyiso ji ngʼama in, mondo hera miherago obed kuomgi, kendo an awuon bende abed kuomgi.”