2 THECAALOANIKA
Riown Wargahng Agweed Poale Yihr Yaa Thecaaloanika
Rob Ke Nying Warga
Alyaahb gihn ayug ree ke nying duuo gihr Jeacuu abar maalo ke duub nyepinye kiin akuud yaa yiiho Thecaaloanika. Riown wargahng agweed Poale yihr yaa yiiho Thecaaloanika rubo kaa nying gihn anaa angaahd nyoge naa kar duuo gihr Jeacuu keehdo ngo abeehno. Acohge piny wudh nyoge kejea duuo gihr Jeacuu be yug ree uwahdhe ka ubeehn raahyo ukeehde guge thar ruohdh gihr gihn me padh me cuohn ne ‘Ngad Anyoohne’ ge udihng mahn keehd Jeacuu ni.
Maa anyoadh Poale ngo yihr yaa ukwaan wargahng ni kejea mag gene yi yiiho gihr gen beer mee keehd me nud giih me reje wale raahme. Ubeehn kwaad dhaane utiihye ke cam ne boadh ree wa maa anaa ayug Poale maa jo tiihyo keehde, umahg gene yi tiihj gihn me beer.
Kaa Acaan Luube
Lum umodho 1:1-2
Muohj Kahw kedea leej 1:3-12
Puohny ke nying duu Jeacuu 2:1-17
Rob ke nying dhe yoohn beehdo me nyaahn 3:1-15
Gug luube 3:16-18
1
1 1:1 1Th 1:1 Beehda an, a Poal wa ke Cihla kedea Timodhy, wa ne gweehdo yihru, wu yaa yiiho giih ne geen Thecaaloanika, wu ge ayiih lum Juog Wuro kedea Jeacuu Kriihjto Ruohdho ge aoohr Juoge.
2 Beehn Juog Wuur kedea Jeacuu Kriihjto Ruohdh cub gene muuny kedea doohr yihru.
Muohj Kahw Kedea Giih Ciihm Cwihny
3 1:3 2:13; 1Th 1:2-3 Jo wan, koohr Juog dhiil wane kaa muohjo ke cahng cahngo ke nyingu. Dhiil wane kaa muohjo bang gihn yiiho gihru adoohng e ngo bar wong maalo keraahyo, maa nhyaahro gihn ne keewu ngo adoohng duohng. 4 1:4 1Th 2:19-20; 3:3, 7 Ke nying gihn nu e naa gihn beel wane beel ke nyingu keew yaa ayiiho. Wa beel kaa nying gihn abaru maalo ke yiiho gihru kedea ke nying gihn aromu guum giih raahm maa giih ajohr naa ayug yaa akwaahdh wune rogu.
5 1:5 Pihp 1:28 Gihn ayoadu giih raahm maa giih ajohr nyoadh ngo kejea Juog lug angahye ke luuo. Kedea awaahn kan, ke nying giih yihdh ge akaahnu wu adoohng ne nyoge me rom beehdo yi Dhaahr Juog. Beehda ke nying gihn nahgu yaa Dhaahr Juog kedea ke nying giih ayiihu e naa gihn yoadu giih raahm maa giih ajohr awaahn ni. 6 1:6 Rom 12:19; Any 18:6 Juog ngahy lug. Ngo ubeehn ne kihm yaa ni anaa atiihy giih ajohr rogu kedea uyoad gene giih raahm rog. 7 1:7 Mat 25:31; 1Th 5:1-2 Kedea Juog ubeehn ne cub yoohm rog yihru wu yaa abuohj ke guum, maa yihr wan thiow. Gihn nu ubeehn Juoge ne tiihyo kii beehn Jeacuu Ruohdho ke yoohn maalo keehd amahr wuohdjuog giihe. 8 1:8 Rom 2:8; 1Pii 4:17 Ngo ubeehn kaa maaj muu unyaahm. Ngo ubeehn ne bang yaa akweer ke Juog kedea yaa akweer ke mag Ciig Beer. Ciig Beer ge rubo ke nying Jeacuu Kriihjto Ruohdh. 9 Kwaad yaa nu ge buu uwii Juoge. Gihn me raaj uyug Juoge rog gen umaan gene gihn kuow gene ke nyinge. Nyoadh ngo kejea Juog ge ukoye yi raahyo me guge tooro beere Jeacuu, be niid gene kedea miihr Paar Juog be yoad gene. 10 Cahng Duohng ubeehn: Cahng ubeehn Jeacuue beere wiihe moar yaa alihng lume moaro cang kedea upoong yaa ayiihe ngo. Wu thiow wu unaa kiin gen bang gihn lum apuohny wane yihru ayiihu.
11 1:11 1Th 1:2-3; 5:24 Ke nying giih nu cang e naa gihn kway wane Juog ke nyingu. Juog akway wane, uyuge wun ne nyoge me beeye me rom beehdo keehde. Beehn Juog cube tee gihre yihru kedea konye wun uromu gihn beer ke yiiho maa ukeehle yiiho gihru guge. 12 Neehn maano, e nying Jeacuu utihngu maalo kedea wun thiow nyingu utihnge maalo ke dhe yoohn muuny gihr Juog Wuro kedea Jeacuu Kriihjto Ruohdh.