2 TIMODHY
Riown Wargahng Agweed Poale Yihr Timodhy
Rob Ke Nying Warga
Goan ka duohng yi riown wargahng Poal naa agweede yihr Timodhy beehda puohny wa ka nahge nyethiin kedea ngad kony yihr Poal. Gihn teeg yea keraahyo beehda guum. Timodhy apuohny kedea cwihnye aciihm ne mag rob kedea puohny ke nying Jeacuu Kriihjto beer mee ke nud cwihny. Kare nud umage puohny adiehr gihr Ciig Beer kedea lum Anweehd gihn acoon kedea uyuge tiihye wa ngad puohny maa ngad nyoadh lum Juog, giih me yuge cang kii raahm kedea mahn ke nyoge mooge.
Timodhy atoohn ne cohg ke nying ka raaje kii ngo nea ree amade yi yug giih beehl kedea peehm ke toohd me gihn me kony gene tooro, abea ge lyaahb wudh yaa lihng gen urwaahny gene.
Yihdh giih ni cang e aber yihr Timodhy e kar kaa naa abeehd Poale maa gihn anaa acube yi cwihny yiiho gihre, teeg cwihny, guum maa raahm yi bahng.
Kaa Acaan Luube
Lum umodho 1:1-2
Muohj kahw kedea doohr 1:3-2:13
Atoohno 2:14-4:5
Beehd mar Poal ke ngude 4:6-18
Gug luube 4:19-22
1
1:1 1Tim 2:7 A Poal e ne gweehd yihri, yih Timodhy a ge aoohr Jeacuue Kriihjte neehn kaa agweehg Juoge ngo coon. A aoohre ne teed lum Juog yihr nyoge kedea ne nyoadh ngo yihr gen kejea nea Jeacuu yiih gene yiiho, e boadh wahy me be gug yoad gene yoado. Boadh wahy gihn nweehd won keehd Jeacuu Kriihjto.
* 1:2 Timodhy: 1Tim 1:2; 1Kor 4:17 Timodhy, warga gihn agweeda yihri bang gihn yih neehn nyethiin yeya maa anhyaara ke nying kaa ayiihi lum Juog kii ngo. Beehn Juog Wuure kedea Jeacuu Kriihjto Ruohdho cub gene muuny mar gen kedea doohr mar gen yihri maa duu gene cwihny gen caahn rihi.
1:3 Pihp 3:5; 1Tim 1:5 Juog koohre muohja muohjo ne naang ke bang dewaahr kedea decahngo. Juog gihr ge wura en ne wuora kedea a beehdo kaa dhe yooh me ne cohg me meehg cwihny Juog mihno riha. E naa gihn beehda ke cwihnya acielo. Ke nying nihn, e kwahya yihr Juog, e wiiha be wul ne kwaj ke nyingi. Piih wongi ge anaa awoj piny ge poohd para paro. Yih acana keraahyo, a daahd uniida yihn keehdo beere cwihnya naa yum. 1:5 Tiihy 16:1 Kwaad yiiho gihn ne yihri be wul yi wiiha. Ngo uroomo keehd yiiho mar wongu ge cuohn ne Loaj kedea mar miihu ge cuohn ne Yunij. Ngo dhiila kaa ngahyo kejea yiiho gihri noono ree ujwage.
Muuny Acub Juoge Yihr Timodhy
1:6 1Tim 4:14 Ke nying kwaad yiiho gihn ayiihi lum Jeacuu, e naa gihn bera ngo yihri kejea mag muuny Juog gihn ayoadi cahng anaa acuba cinga yi wiihi. Cinga anaa acuba yi wiihi ne dooj yihn kedea ne cub yihn yi tiihy kwaag yaa ayiiho. 1:7 Rom 8:15 Teeda teedo yihri kejea bar maalo ke tiihy nu, bang gihn Juog Wahy Juog acube yihro beere wo be tud. A teeda yihri kejea bar maalo ke tiihyu nu bang gihn Juog wo amuoje ke Wahy Juog me wo be weehge tudo, abea Wahy Juog cub tee kedea nhyaaro kedea dhe yoohn koar rogo.
1:8 2:9; Rom 1:16 Nea lum Juog ayiiho beer mee e wiihi be laahy ne rob ke nying Jeacuu yihr nyoge kedea ne rob ngo kejea a beehda gomi. Yih kea tud nea yih ke maa neehn ka beehda kan yi thijin. Dhiil guum neehn mara ke nying Juog bang gihn Juog yih umuoje ke tee me guumi giih me reje. 1:9 Epi 2:8-9; Tii 3:5 Anahg Juog e naa par ngo e keede ne boadh wahyo kedea ukwanye won ne tiihy tiihye. Giih nu ge ayug Juoge yihro padh ke nying gihn maa tiihyo yihre, anahg ke nying gihn maa atage kedea ke dhe yoohn muuny mare. Muuny ngo acube yihro, ke nying Waahde Jeacuu Kriihjto. Acube yihro yi nihn umodho e maalo maa piny ge puud kuu acage. 10  1:10 Jon 1:14; Tii 3:6Thoo: 1Kor 15:20, 55, 57; Judea 2:14-15 Gihn maa anaa angahyo ke nying gihn atag Juoge ngo atooro. Abea, awaahn ni ngo anyoadhe yihro naa abeehn Jeacuu Kriihjto Ngad Boadh nyoge. Jeacuu, thoo ataaje kedea unyoadhe beehdo me yea tooro thoo yihro ke dhe yoohn kitaab Juog. 11  1:11 1Tim 2:7 Ngahyi kejea lum Juog ke ngude e naa akwany an kedea uyuge an ne ngade me oohre ne rob ke nyinge kedea ne puohny Ciig Beer yihr nyoge cang. 12 Ke nying tiihy akwany Juoge an yea, e naa gihn ayoada giih raahm rog. Abea keehd maano e wiiha be laahy, bang gihn ngaa acub tiihj yihra beehda ngaa me ngahya kedea ngo gaahna gaahno. Ngo angahya kejea giih atiihya ge pahdh yi cwihnye cang, kedea ke nying giih nu atiihya, a ukooge cahng uduu Jeacuu.
13  1:13 1:5; 1Tim 1:10 Dhe yoohn puohny maa athiir gihn alihngi banga ngo kea wii. Puohny yaai ke puohny maa athiir. Puohny nyoge ne cohg ke dhe yoohn me yiih gene Jeacuu Ngad boadh won unhyaare. 14  1:14 1Tim 6:20 Wahy Juog gihn beehdo ke won yih ukonye ne mag luube giih beey ge wii Juoge yi cingi.
15  1:15 4:16 Ngahyi kejea Piigeluj maa Ehrmojean kedea yaa yiiho giih abeehno ke yoohn piny Aacya ge goohd oogo riha. 16  1:16 Onecipoaruj: 4:19 Abea Onecipoaruj gihn me beer atiihye yihra. Beehn Juoge dooje Onecipoaruj kedea yaa paare ke nying gihn beer e ayuge. A aliewe tiel me thoohdh kedea umeehge aduuna ngahmo. Wiihe kuu alaahyo ne liew an keehd maa anaa yi thijin, 17 bang gihn kaa awahnhe ke geen Roama, e athubo ke daahd kara uwahdhe kaa ayoade an. 18 Beehn Juoge wiie giih me reje naa atiihy Onecipoaruje piny yihr ngo cahng ukihm Juoge nyoge. Ngahyi thiow kaa akonye an kii ngo kaa anaa yi geen Epicoj.

1:1 1:1 1Tim 2:7

*1:2 1:2 Timodhy: 1Tim 1:2; 1Kor 4:17

1:3 1:3 Pihp 3:5; 1Tim 1:5

1:5 1:5 Tiihy 16:1

1:6 1:6 1Tim 4:14

1:7 1:7 Rom 8:15

1:8 1:8 2:9; Rom 1:16

1:9 1:9 Epi 2:8-9; Tii 3:5

1:10 1:10 Jon 1:14; Tii 3:6Thoo: 1Kor 15:20, 55, 57; Judea 2:14-15

1:11 1:11 1Tim 2:7

1:13 1:13 1:5; 1Tim 1:10

1:14 1:14 1Tim 6:20

1:15 1:15 4:16

1:16 1:16 Onecipoaruj: 4:19