5
Jeacuu Ngaa Maa Abab Piny Athiehdhe Dieng Paahl
1 Ke batien gihn nu, e Jeacuu abeehn ne ci Jeruucalem bang gihn yaa Judea yihr gen anaa yaay me ge dhiil ci Jeruucalem ke nyinge. 2 Abea buud ka cuohn ne Ciihb Gead*5:2 Ciihb Gead: Ngo beehda dhe roog gihr geen Jeruucalem e ne cuohn wa maano. Jeruucalem beehde e ngo aciel piny ke roog. Acuohn wa gihn bang gihn kaano e nahg paahl me yea ne piih. nud ke paahl. Buud paahl atieg piny ke pehme abiihj kedea uyoad kaano ucuohne ne Paahl gihr Bedhjadha ke dhog Judea. 3 Amahr nyoge maa atwaany ge abudo ke bang thaahdh pehme. Nyoge maa acoor kedea ngoohde kedea nyoge maa abaahl. Ge akoar piih paahl utihng gene rog gen. [ 4 Bang gihn wuohnjuog na kwaay cidho yi paahl ne ciehr yihdh piih. Nea ge acier, e ngad atwaany ge kuong mono yihdh piih umodho e kwaad atwaany anaa ree ngo uaay.]†5:4 Luub 3-4 ge kuu anaa yihdh wargae 5 Dhaano maa abeehd e atwaany ke kar run dhaano aduuno wonge apaar wonge abiihjbedahg anaa anudo buud paahl. 6 Jeacuu naa aniide nyin kedea naa angeye ngo kejea abeehdo piny ke twaany ke run me thoohdh, e ngo acidho bang ngo. Noono maa apeehnye ngo kea, “Cwihnyi ne bange uthiehdh yihn ne?”
7 Maa abeehr nyine ngo kobe, “Ruohdh, yihra tooro dhaano me tihng an ne kedh yihdh piih kaano tihng piihe rog gen. Noono e thuba kaa a tum cidho yihdh piih, e a guo ngaa mooge kaa yoohmo unahge e ne kuong cidho yihdh piih.”
8 5:8-9 Mat 9:6-7 Kob Jeacuue yihre, “Yedh maalo ukaabi belo gihri ucaahdhi.” 9 5:9 5:16, 18; 7:21-22; 9:14; Mak 2:27-28 Wong kaano e nyin ree ayoade e athiehdh. Noono ukaabe belo gihre uthube thubo ke waahdh.
Gihn ni ree ayuge ke cahng Cabadh ge beehda cahng yuohmo gihr Judea 10 maa abeehn ruohdh Judea giih Jeruucalem urub gene yihr ngaan athiehdh kob gene, “Loohnge mooge ge beehde e yihdh ge adhahli bang gihn belo gihri kaahni kaahno cahng yuohmo.”
11 Maa abeehre ngo yihr gen kea, “Ngaa athiehdh an, e naa arob ngo yihra kejea kaaba belo gihra.”
12 Maa adog gene piehj, “Beehda ngaa e naa arob ngo yihri kejea kaabi belo gihri uci paajo?”
13 5:13 6:15; 11:54; 12:36; Mat 8:18; 13:36 Abea ngaan athiehdh en akwihye, bang gihn nyoge ge athoohdho ke raahyo noono e Jeacuu arwaahnyo yihre kiin nyoge.
14 5:14 Mat 9:2; Jeam 5:16 Cahng nu e ngaan athiehdh ayoad Jeacuue yi Laaro gihr Wod Juog maa arube yihr ngo kea, “Awaahn ni, yih adoohng ne ngaa maa athiehdh. Wii yug giih adhemuohm beere gihn me raaj me kaal wiih man be pahdh wiihi.” 15 5:15 9:11 Kaano e ngo ake aay maa acea ne teed ngo yihr ruohdh yaa Judea kejea beehda Jeacuu e naa athiehdh en.
16 Noono arumo, uthub ruohdh yaa Judea ke tiehng ngo ater ke nying gihn athiehdhe dhaano cahng Cabadh. 17 Maa abeehr Jeacuue ngo yihr ruohdh Judea ne jaahy gihn arob gene kea, “Juog Wura, uwahdhe yi caang rubo awaahn ni, ngo beehde e utiihyo e naa gihn tiihya thiow.” 18 ‡5:18 Me nahg gene: Mat 14:5; Jon 7:1, 25; 8:37, 40; 11:53Wahn kedea Waahd: 1:34; 3:35; 8:16-19; 10:17-18, 29-38; 14:8-11, 20, 28; 15:9-10; 16:27-28; 17 Ke nying lum nu, e yaa Judea ge athubo ke daahd dhe yooh me nahg gene Jeacuu. Ge daahd unahg gene ngo, padh ke nying gihn atiihye cahng Cabadh, abea ke nying gihn arome wiihe ke Juog naa acuohne ngo ne wahn.
Gihn Nweehd Wuro Keehd Waahd
19 5:19 1:34 Maa abeehr Jeacuue ngo yihr gen kobe, “A rob athiir yihru. A ge adoohng ne dhaano utaahngo ni, gihn me roma tiihyo a keeda tooro. A yug kwaad gihn niida ge tiihy Wura bang gihn kwaad gihn tiihy Wuro e naa gihn tiihy Waahde thiow. 20 5:20 3:35 Bang gihn Wuro Waahde anhyaare kedea unyoadhe kwaad giih tiihye yihr Waahde. Adiehr kedea wu ugaahy bang gihn giih me teeg me yoohm muu ni ge unyoadhe yihr Waahde. 21 5:21 Rom 4:17; Epi 2:5; Jon 11:25 Wa kwaad ka beehn Wure utahnge yaa athow kedea ucube kuowo me ne cohg yihr gen, ke dhe yoohn nu thiow e Waahd, kuowo me ne cohg ucube yihr ngaa me daahde. 22 5:22 3:18; 5:27, 30; 9:39; 12:47-48; Tiihy 10:42; 1Jon 2:28 Thiow Wura ngaa me cahge ke kihme tooro, bang gihn kihm nyoge awiie yi cing Waahde, 23 5:23 Pihp 2:10-11 beere nyoge cang Waahd dhiil gene kaa wuoro wa kwaad ka wuor gene Wuro. Nea ngaa be wuor Waahd e Juog Wuur ge aoohr Waahde ni, ngo be wuore thiow.
Cahng Lug Ge Ubeehn Waahd Juoge Ukihme Nyoge
24 5:24 3:16; 5:22; 6:35; 8:51; 10:28; 11:25-26; 14:6; 17:2; 20:31; 1Jon 2:25; 3:14 “Adiehr e ne roba yihru, ngaa lihng luma kedea uyiihe lum Juog ngaa aoohr an, e ngaan nu yihre ne kuowo me ne cohg kedea buu ukihm cahng lug. Buu ukihm cahng lug bang gihn thoo aloge ngahye udoohnge yi yoohn kuowo me ne cohg. 25 5:25 11:43; Mak 5:41; Luk 7:14 Athiir e ne roba yihru, cahng arob ge ulihng duona ngo abeehno awaahn ni. Yaa ulihng duona utiihy gene gihn ateeda yihr gen, ge nuu uyoad kuowo me ne cohg. 26 5:26 1:4 Me neehn ka nahge Juog e ne cub kuowo me ne cohg yihr nyoge, ke dhe yoohn nu thiow e Juog Waahde ameehge cub kuowo me ne cohg yihr nyoge, 27 kedea tee ne kihm nyoge acube yihra a ge adoohng ne dhaano utaahngo ne boadh nyoge ke nying gihn nahga Waahd Juog.
28 “Wu keá gaahy yi gihn daahda ke teedo yihru awaahn ni, bang gihn nud ke cahng muu ubeehn yaa athow ge beed yihdh leehde giih gen ulihng gene duona ke kar gen cang, 29 5:29 11:24 kedea upahr gene oogo yihdh leehde. Jo ayug giih me beeye ge ucahr kedea uyoad gene kuowo me ne cohg. Abea jo ayug giih me reje ge ucahr kedea ge ukihm.
Athiir Gihn Rob Ke Nying Jeacuu
30 5:30 4:34 “A be rom yug nyepinye ke teeg mara a keeda kedea nyoge ge kihma kaa dhe yoohn arob Juoge yihra. E naa gihn ngahya lug noono bang gihn a be tiihy gihn daahd aduuna abea a tiihy gihn daahd ngaa aoohr an.
31 5:31-32 5:36 “Nea a rubo yihru kaa nying mar nguda keede, e gihn roba ngo be kuong ke yiiho wa gihn maa athiir.
32 “Abea Juog Wura e naa arob gihn ngahya ke nyinge kedea ngahya kejea gihn teeda ke nyinge ngo beehda athiir. 33 5:33-34 1:15, 19, 34 Joon e naa ngaa anaa aoohr dhog yihre kedea maa abeehn Joone urobe gihn maa athiir ke nyinga yihru. 34 Gihn rob dhaan utaahnge ke nyinga padh en ne daahd ne nyoadh ngo kejea a beehda ngaa. A rubo kaa nying gihn arob Joone ke nyinga beere Juog wu boadhe boadho. 35 Giih atiihy Joone ne kedh nyoge bang Juog ge anaa ake liel wa gihr lamba maa a'ahb kedea ubeehdu ke nye nihn me noog e cwihnyu med ke nying tiihye e liel wa maay lamba ge anaa anhyaaru.
36 5:36 10:25, 38; 14:10-11; 15:24, 27 “Abea gihn tiihya nyoadh adiehr me ne cohg ke nyinga, ke dhe yooh me yoohm dhe yoohn mar Joon naa arobe ke nyinga. Giih tiihya beehda Wura e naa acub gen yihra ne tiihyo kedea ge ne rubo ke nyinga maa ge ne nyoadh ngo kejea beehda Wura e naa aoohr an. 37 5:37 1:34 Thiow Wura ke ngude ge aoohr an ngo urubo ke loohnge me nyoadh athiir ke nyinga. Keehd me bahnge duone kuu alihngu kedea kuohme kuu aniidu e gihn maa anyoadhe nud ke nyinga. 38 5:38 16:9 Kedea wu akweer ke meehg luub Wura beehdo yi cwihnyu bang gihn luma a ngaa aoohre ngo be yiihu. 39 5:39 Luk 24:27, 44; Tiihy 13:27; 17:11; 2Tim 3:15-16; 1Pii 1:10-11 Wu abuohj ke cej yihdh giih anaa agweed cuohnu kuu e nuu uyoadu dhe yoohn kuowo me ne cohg. Abea ukwihyu ngo kejea giih agweed ge rubo kaa nyinga. 40 Kedea wu poohd ukweer ke beehn banga beere wu ukwahnyo ke luube noono e kuowo me ne cohg yoadu yoado.
41 5:41 7:18 “Padh leej gihr nyoge e ne daahda bang uleej gene an. 42 Wu beehda kwaad nyoge me ngahya ne cohg: Wu nyoge me be nhyaar Juog. 43 A abeehno, bang gihn Juog e naa aoohr an ne rob ke nyinge maa akweeru bang gihn aparu kejea padh e naa aoohr an. Abea nea dhaano beehn bangu ke kar wiihe e kuu aoohr Juoge e lume yiihu yiiho. 44 5:44 5:41 Cwihnyu umihno nea wu piih ne leej rogu. Abea wu be daahd utiihyu ke dhe yooh me mihn cwihny Juoge rogu uleeye wun. Angahya ne cohg kejea wu akweer ke yiih luma.
45 “Wudhu keá paru kejea a ucidh ne luom wun yihr Wura. Padh an e nuu uluohmo, abea ngaa uluom wun beehda Moaje ge gaahnu, e nuu uluom wun. 46 5:46 Luk 24:27; Jon 6:14; Tiihy 3:22; 7:37 Nea giih agweed Moaje ge nuu yiiho, e luma nuu yiihu bang gihn giih agweed Moaje ge agweed kaa nyinga. 47 5:47 Luk 16:29-31 Abea ge bahnge giih agweede kuu ayiihu, e gihn teeda uyiihu kaa naa diih?”
*5:2 5:2 Ciihb Gead: Ngo beehda dhe roog gihr geen Jeruucalem e ne cuohn wa maano. Jeruucalem beehde e ngo aciel piny ke roog. Acuohn wa gihn bang gihn kaano e nahg paahl me yea ne piih.
†5:4 5:4 Luub 3-4 ge kuu anaa yihdh wargae
5:8 5:8-9 Mat 9:6-7
5:9 5:9 5:16, 18; 7:21-22; 9:14; Mak 2:27-28
5:13 5:13 6:15; 11:54; 12:36; Mat 8:18; 13:36
5:14 5:14 Mat 9:2; Jeam 5:16
5:15 5:15 9:11
‡5:18 5:18 Me nahg gene: Mat 14:5; Jon 7:1, 25; 8:37, 40; 11:53Wahn kedea Waahd: 1:34; 3:35; 8:16-19; 10:17-18, 29-38; 14:8-11, 20, 28; 15:9-10; 16:27-28; 17
5:19 5:19 1:34
5:20 5:20 3:35
5:21 5:21 Rom 4:17; Epi 2:5; Jon 11:25
5:22 5:22 3:18; 5:27, 30; 9:39; 12:47-48; Tiihy 10:42; 1Jon 2:28
5:23 5:23 Pihp 2:10-11
5:24 5:24 3:16; 5:22; 6:35; 8:51; 10:28; 11:25-26; 14:6; 17:2; 20:31; 1Jon 2:25; 3:14
5:25 5:25 11:43; Mak 5:41; Luk 7:14
5:26 5:26 1:4
5:29 5:29 11:24
5:30 5:30 4:34
5:31 5:31-32 5:36
5:33 5:33-34 1:15, 19, 34
5:36 5:36 10:25, 38; 14:10-11; 15:24, 27
5:37 5:37 1:34
5:38 5:38 16:9
5:39 5:39 Luk 24:27, 44; Tiihy 13:27; 17:11; 2Tim 3:15-16; 1Pii 1:10-11
5:41 5:41 7:18
5:44 5:44 5:41
5:46 5:46 Luk 24:27; Jon 6:14; Tiihy 3:22; 7:37
5:47 5:47 Luk 16:29-31