M̃aki Nap̃a Pol Siria Pa Pan
Li Nalelagaena Wa Lala Nae Garu
KOLOSI
Visayuena Na Tusi Nene
Komp̃asnen suniena plas na tusi nini
Kolosi naga pupia pulkumali tai na lepas nae Esia nap̃a nanua sumo na m̃eke vatanon P̃arin Sup̃e keviu nae Rom. Pulkumali nene sike e purvanua nap̃a nagane kiena kia Teki. Pulkumali nene m̃eke yepasnen pulkumali tap̃ena nap̃a Episas e lepas nap̃a mrae molue ke komea. A m̃aki nini Pol siria pan yaru na sum̃are lala nae yo nene. Pol pe siar re sum̃are nae Kolosi poli, ana pulkumali nene sike lavisin Episas, nap̃a pupia pulkumali na lepas nene, nap̃a Pol miyum̃ae ke e silaga. Pogos nap̃a Pol sike garu Episas, naga mligan plan ke kiena yaru lala apa amlologon ke lologena wo e yo lala na lepas nene, a Kolosi naga tai nap̃a m̃eke e yo la nene. Ana komin suri ne nanene, Pol pisu sane yum̃aena na visuaren yo nene Kolosi naga m̃ena sike e limana.
Pol mloge visena tai asape navianiena lala na sum̃are nene, asum̃a apisa ke asape yaru lala monar alotun ga yerkawa lala a nasumonena kiena yermare lala, vena akilia ruru Ntewa, a vena akilia atol maliena nap̃a pulen suri makega. A apiyan ke yaru lala, asape monar ataveve navisaluaena marua e lepas na kinaniena, a suri tap̃ena si lap̃asa, a monar ave p̃aviu vena atol maliena.
Ana Pol siri m̃aki nini vena visalup̃aren sitomiena viowa la ne sanene, a pisawal visena lelaga kiena Yesu Kristo pan la. Purp̃esnen sitomena nap̃a pisa na sanini, sape Yesu Kristo naga taaga kilia la maliena nap̃a ulen suri makega van ita, a vianena viowa la nene asum̃a ap̃ere plan yaru lala ap̃ure matania. Kristo miyum̃aen yum̃aena kiena Ntewa na sien yomarava nini, a naga miyum̃ae kiena Ntewa vena wereplan si yaru la aimi ea. Yaru monar sikol naga e Kristo vena kilia tol malena, a pe mrapa tap̃ena re si poli. P̃isina siraunia, Pol pisawal panila e suri la nap̃a akilia atol e kiela maliena komin nap̃a amlelaga e Yesu, a nap̃a asikol la ruru amio naga.
Pol mla m̃aki nene pan yaru tai kien kia Tikikas vena la va van li nalelagaena la garu Kolosi. Tikikas nene, naga yaru m̃a nena nap̃a lalua Onesim̃as apano, naga mla Onesim̃as p̃asup̃e si pa kiena yo. Suniena nene sike e m̃aki kiena Pol nap̃a pitetalia pa puna Pilimon.
Komp̃asnen tusi la na nini
Visena p̃esa 1:1-8
P̃elaga kiena Kristo, a kiena yum̃aena 1:9—2:19
Malena viu e Kristo 2:20—4:6
Visena maro 4:7-18
1
Pol siar kiena visena
1-2 Inu Pol, nap̃a in na yaru nalologena kiena ne Kristo Yesu nap̃a Ntewa naga mligan inu, a nekekara nap̃a nevitawe amiu e m̃aki nini, nap̃a nesiria pim̃asu pan amiu li nalelagaena wa lala nae Kolosi, nap̃a amiu punu ga ape kiau wolai lala a vineu lala e Kristo, nap̃a asum̃a apiawa m̃arera e naga. In na nemio Timote, nap̃a naga sike amio inu, imimi lua memlen mesape p̃isi na lemamiena a sum̃arena kiena ne Arimata Ntewa sike amio amiu.
Pol pisa potena pan Ntewa vanon la
3 A silaga e kiamimi leniena lala, imimi lua mepisa potena pan Ntewa Arimana ne kieta Sup̃e, Yesu Kristo, vanon amiu. 4 Naga nene vanon nap̃a imimi lua mekekaran amiu pap̃isi, nap̃a visena tol imimi sape kam na asum̃a apiawa ke m̃arera e Yesu Kristo, a asum̃a sinemiu sii manene ke m̃ena li nalelagaena tap̃ena lala. 5 P̃elaga wo nene naga sum̃a molue ke ga e kiamiu malena lala komin nap̃a sinemiun manene nap̃a p̃isi na akilia atol suri wo la nap̃a Ntewa mligan ruru sike ma e peni vena ve kiamiu. Suri wo la ne sanene, amloge lologena wo pisaar pan amiu p̃isi rui. 6 Visena lelaga nene pimi pun amiu p̃isi rui, a nagane, sum̃a pa vanua manene ke m̃ena ga e yo tap̃ena lala e yomarava nini narui. Sum̃a pava ke sanene, ana sum̃a kapuru a sum̃a p̃ar ke m̃ena ga mras la nap̃a powo, torokin ke nap̃a kila pan amiu e ke e pogos nap̃a amloge p̃esania, nap̃a apisu kilale sane lemamiena kiena ne Ntewa e ita naga keviu a lelaga pap̃isi. 7 Kolosi 4:12; Pilimon 1:23Sur la nene Ep̃ap̃ras naga pian amiu e rui, pogos nap̃a naga kus lelemimi imimi lua, ana naga pimi pisawal p̃esan lologena wo nene pan amiu. Naga pe yaru tai nap̃a imimi memiyum̃ae ke lele taaga, a naga masusun yum̃aena wo lala kiena ne Kristo. Imimi mekekaran naga pap̃isi, 8 a nanagane, naga p̃asup̃e si pimi pun imimi rui, mla lologena wo tai pan imimi, nap̃a pisayu sanape nap̃a kiamiu malena lala sum̃a pule luen ga e pupia sinesiiena nap̃a Ninuna Wa mla pan amiu.
9 Komin sur nene, pogos nap̃a imimi lua memloge visena nene kiena Ep̃ap̃ras, memlen wo amiu silaga pimi tol nagane, a mesum̃a mepiun ke tan Ntewa mesape p̃isi na Ninuna Wa la manmaruaena a nakiliaena wo lala van amiu, vena akilia ruru nasinenanena wo punu ga kiena ne Ntewa. 10 Ve sanene, p̃isi na yoko akilia ayal mesmesu e mrapa napo nap̃a popon yeririna kiena kieta Sup̃e la ayal ea, a p̃isi na akilia akila nap̃a naga kilia kekaran make kiamiu p̃elaga punu ga. A yoko mras wo lala kilia imi m̃alivi e kiamiu malena lala a e m̃ena ga e kiamiu yum̃aena lala, a p̃isi na kiamiu kiliaena e Ntewa kilia va merorol manenea. 11 Imimi lua memlen mesape p̃isi na pupia puriukawaena kiena ne Ntewa sum̃a kila amiu m̃ena ga am̃arera, vena akilia asum̃alar amiu e pog m̃arera, a vena kiamiu sitomiena ve piavi, a akekara ga e pog la ne sanene. 12 Ita na monar tevisa potena va Arimata, nap̃a kila ita m̃ena ga temio li nalelagaena wa tap̃ena lala, tekilia tokus lalimana loyum̃a e kiena nasup̃enena na yomerarava nena, 13 komin naga p̃urelua ita rui petan m̃areraena na yemalolo, ana naga mlen plan ruru ita tepa e nasup̃enena kiena ne narina nene, nap̃a naga kekaran naga pap̃isi. 14 Epis 1:7Ore, Ntewa naga p̃erelua ita p̃isi rui, nap̃a piewo ita komin kieta mlamulena viowa lala.
Kristo pe p̃arun yo yau wetelu
15 Narina nene, naga Kristo nene, nap̃a naga pe nono tai nap̃a tekilia tevisuia, naga kiena ne Ntewa nap̃a tap̃atete tevisu naga,
nap̃a naga pe m̃earun make suri la punu ga nap̃a Ntewa sii la.
16 E ga e Kristo nene, Ntewa sii make sur punu ga,
nap̃a ma e peni a e yomarava,
nap̃a tekilia tevisuia a nap̃a tap̃atete tekilia tevisuia,
amio sur la nap̃a apisuar ke yo yau, sa nap̃a p̃arin sup̃e lala, nam̃areraena lala, yerkawa lala, a navisi lala.
Ntewa sii make suria e Kristo,
a Ntewa sii make suria pe kiena ne Kristo.
17 Kristo naga sike pa sumon sur tap̃ena la rui,
a naga mligan ruru make sur la nene, asum̃a amiyum̃ae ruru ga e lelela.
18 Epis 1:22,23Kristo pe purp̃es nen malena kiena nalotena,
a naga pe p̃arin lotena nene, sa nap̃a lotena nene naga pe tasnena.
Naga sumon p̃es yaru la nap̃a amal sina e marena,
ana sanene naga kila sane nanagane naga sike laa metavan make sur tap̃ena lala.
19 Kristo to metavan make sur la sanene, komin nap̃a Ntewa tam̃an kiena naurarena sike e naga, sa nap̃a kiena malena wetelu a kiena nam̃areraena sike ea.
20 Epis 2:16E ke e Kristo nene na wa, Ntewa p̃ar ke sina ga sur nae ma e peni amio yomarava nini awasup̃e ke sina ga vania.
Naga kila yo yau wetelu kilia imi ve mara wo ke sina ga amio naga, nanene e ga e tana ne Kristo nap̃a mlau e laki torovia.
Amiu ave marawo ke sina ga amio Ntewa
21 Nanua sumo, kam na ape wolawa ga, a asike laa perinan Ntewa, a ape kiena nasinekar ga, komin kiamiu sitomena viowa a kiamiu p̃elaga viowa lala. 22 Ana nanagane, nap̃a Kristo pimi pe yaru sane ita, kiena marena kila ita teve mara wo ke sina ga temio Ntewa. Ntewa kila sanene, vena kilia were amiu aimi puna nap̃a ave yar wa kemua lelaga, a ayekiki ruru wo, a nap̃a ve sur viowa re nena tai teke e amiu. 23 Ana nanene na kilia ve sanene, visae asum̃alu ga m̃arera ase Kristo, a visae amlelaga ke e naga wa. Popon amiu ve auresun amiun re nap̃a auarar manene lelagaena e navisaarena lala kiena ne Ntewa, monar alelaga sane yoko naga monar la sur punu ga van amiu nap̃a amloge rui e nalologena wo nene, nap̃a yeririna na yomarava la amloge rui, nap̃a inu Pol in na nepe yaru na lologonena.
Pol miyum̃ae m̃arera komin li nalelagaena lala
24 Nanagane nemloge piowa e tasneu komin amiu, ana in na nekekara ga ea. Nanene naga sa nap̃a nesum̃a nemiyum̃aen sur na loge viowaena make ga e tasneu, nap̃a Kristo naga mliganar inu vena nowaria, sa nap̃a naga p̃ar p̃isi rui, vena neiila p̃egas nen li nalelagaena lala vena asum̃alu m̃arera. 25 Ntewa mligan inu vena neimi ve sa yaru na yum̃aena tai na p̃egas nen li nalelagaena lala, a nagane nekilia neiila amiu e yum̃aena nene nap̃a Ntewa mligan e lum̃au, nanene vena nevisawal kiena visena va yeririna lala vena akilia make ga. 26 Kiena visena nene sane visena tai nap̃a nakonua konua rui, tapoloun ga e yermarua lala, nap̃a la pe akilia re nenaga, ana nanagane Ntewa kila pimi merarava pan kiena li nalelagaena wa lala. 27 Kiena sitomena naga pe na kilaen sanene narui, sane visena nene nap̃a kiena yeririna la nap̃a le Yu lala, la pe amloge kilale re poli, ana p̃isi na naga visawal kana sur nowo ne lala, nap̃a po manene laa, va la nap̃a pe ape le Yu re poli. ?A visen tapolou nene pisa ya? Naga pisa sanini narui, pisape Kristo naga kilia sum̃a e losinemiu lala, a amiu akilia alelaga asape p̃isi na Kristo naga kilia kila amiu akilia asikol Ntewa e kiena malena wo nae ma e peni.
28 Imimi lua mesum̃a memlologon ke Kristo ne nanene narui pan yeririna lala, mesum̃a mepisa ke pan la mepisape la monar avisuar ruru la, a mesum̃a mepian la ke e manmaruaena lala. A visae lap̃asia nap̃a kiela sitomena lala a kiela lelagaena lala marua ruru wo, la akilia aimi asum̃alu amio imimi lua e marana ne Ntewa. 29 Nesum̃a nemiyum̃ae ke m̃arera pap̃isi komin sur ne nanene, ana silaga nesum̃a nemiyum̃ae ke e pupia nam̃areraena nene nap̃a Kristo naga kokonia inu ea.