5
Yesu pe p̃arin yar wa na sineyeen yar lala
1 La nap̃a apuarar yum̃aena na p̃arin yar wa, apisiriplan la petan li wa tap̃ena lala vena kilaen yum̃aena na sanene narui. Yaru nap̃a pe p̃arin yaru wa, naga sum̃alu su likan yeririna lala a Ntewa, vena waren kiela nalaena lala amio nakup̃ap̃aena lala vania, vena naga kilia viewo kiela mlamulena viowa lala. 2 P̃arin yaru wa nene pisu kilale ruru nap̃a yar la asum̃a amiyum̃ae piowa ga, asum̃a amiyepe ga petan mrapa, komin nap̃a naga m̃ena pe kumpui ga, naga m̃ena kilia malum, kila sane sinena kilia ye ruru nena yeririna tap̃ena lala, naga mom̃au ruru nena pan la. 3 Naga sa ga yeririna tap̃ena lala, ana pogos nap̃a kila nakup̃ap̃aena lala, monar kila ve vanon re ga mlamulena kiena ne yeririna lala, ana vanon m̃ena kiena mlamulena viowa lala. 4 Komin sur ne nanene, pe pon re yar tai liganar si naga poli visave popon imi ve p̃arin yaru wa, ana Ntewa ga kilia liganar yaru vena war pupia kia na sanene, sa nap̃a naga mliganar yermarua Eron nanua sumo pe kieta p̃arin yaru wa p̃esa.
5 A e lepas kiena Kristo, sa ke m̃ena nene. Naga pe kieta pupia p̃arin yaru wa, ana naga pe pisirlua re naga pa metava sape naga sanene poli, ana Ntewa ga pisirlua naga. Visena kiena ne Ntewa nap̃a pisa sanene sike e nasiriena wa na sumo lala, nap̃a ta pisa sanini, sape
“Ko na nepisu sane p̃ane opim ope naruu nenaga, a in na nepim nepe arimom̃a kemua lelaga.” Yauena 2:7
6 Tap̃ena, pisa sanini, sape
“In na nemligan ko sane yermarua Malkusteke, ko na yaru wa maro e kiena lus, nap̃a yoko ouarar m̃a yum̃aena nene vano-o ve uro re.” Yauena 110:4
7 Mat 26:36-46; Mak 14:32-42; Luk 22:39-46Ntewa mligan yum̃aena nene pa Yesu, ana tepisu e pogos na kiena malena e yomarava nini, naga kila ke pa rui. Sila ga naga sitom manene yomarava nini pap̃isi, ana tagin pa Ntewa, wamarana mlau vanonia. Naga sum̃alar m̃arera sike e Ntewa sape visae kiena malena kovio, yoko Ntewa kila malia sina, ana naga m̃areran la sane nap̃a mlenwo itania.
Ana Ntewa pisu p̃elaga wo na mom̃auena a navatanoena kiena ne Yesu, ana sinena myea, mloge kiena naviunena lala. 8 Lelaga nap̃a Yesu naga pe narina ne Ntewa rui, ana Ntewa tam̃an naloge viowaena na pogos m̃arera lala pimi pania, sape vian Yesu vena tol ruru p̃elaga na logearena e kiena malena. 9-10 Naga patanon make nasinenanena lala kiena ne arimana, pano-o kila make yum̃aena la nap̃a Ntewa mla pania, kila narui pisirlua naga sane yermarua Malkusteke. Sanene, Yesu pimi pe Ntewa kiena p̃arin yaru wa, pim pe purp̃es nen malena nap̃a ve uro re kieta ita punu ga nap̃a temlogearia.
Popon teimi temarua ruru wo e Kristo
11 Ana kia nap̃a Malkusteke, kiena suniena marua wo la sike ne, nap̃a akilia akila meraravan ruru van amiu sanape e yar nene amio kiena yum̃aena. M̃areran navisayu ruruen merarava van amiu, komin nap̃a yam tai sa nap̃a kiligamiu pop̃e towe la sane. Ana visae kam na asitom asape aloge kilalelia, 12 1Kor 3:2yoko wo vap̃isi, komin nap̃a kam na amlelaga nakonua rui, ana atorokin nap̃a aim ave navianena na visena wa kiena ne Ntewa rui. Ana peraga, asum̃a ga sa ga nene, ana monar avian amiu si ea, siar si e kana purp̃es nen visena ne lala.
!Lelaga nap̃a, kam na nakanen kinanen m̃arera la rui, ana sa ga nap̃a asum̃a sinemiun ke amun yu na wa! 13 La nap̃a amun ke yu sanene wa ape sisi ke ga wa, ana tap̃atete ave manmarua e visena na mrapa lelaga, 14 ana la nap̃a akan ke kinanen m̃arera, la amarua ruru rui. La ne sanene, kiela sitomena la miyum̃ae ruru pano-o apisu veve ruru make sur punu ga, ana akapur apimi po tol nap̃a apisu kilale ruru sur ya nap̃a po a sur ya nap̃a piowa.