2
Yesu kilia viewo m̃ena mlamulena viowa kiena yeririna lala
Ana legiena lap̃as p̃arovia, Yesu p̃asup̃e si pa ma pulkumali nap̃a Kapeneam, ana pe piavi re poli, yeririna la amloge asape naga pam si rui. Ana p̃isi na la moki nap̃a apim puna, yo loyum̃a naga pulen la pap̃isi, a vanua m̃ena e mratava naga yepa vitokaki ga. Ana pogos nap̃a la asike lele taaga sanene, Yesu mlologon Visena Wa kiena ne Ntewa pan la. Ana e ke e pogos nene na, yar lap̃asia atar yaru tai nap̃a minana pimi, nap̃a yepena wetelu ga mare. Ana la vari atar ga naga e m̃ana tog nap̃a mono ke ea pimi.
Ana pogos nap̃a apim atol yo nap̃ane, apisu sane yo pule pa rui, tap̃atete si atar kiela erau nene va lavisin Yesu. P̃isi na lala ataryaun naga apa metava e wos nen yum̃a nap̃ane, lala am̃epo wos nen yum̃a metava mesmesun ga e nap̃a Yesu sike ea, amligan malumun yaru nap̃a mono ke e m̃ana tog, pitomi tano e pulmas nap̃ane, pito loyum̃a.
Ana pogos nap̃a Yesu kira pisu sur nene, kilia sape la nene, amlelaga m̃arera e naga pap̃isi sane yoko naga iila kiela inanena nene, naga pisa pania, pisape “Naruu, in na nepiewo kon kiom̃a mlamulena piowa lala.”
Ana e pogos nene yaru navianena na visaluaena la p̃asia asum̃a ga, amloge ke visena kiena ne Yesu. Ana p̃isi na la kiela sitomena la miyum̃ae piowa ke e sur nene, apisa kare ke naga, apisape “?Yaru nene pisalele kare ke kia wa kiena ne Ntewa sanape na sanene? Ntewa naga taaga kilia viewo mlamulena viowa lala, pe yar re si tai poli, ana yaru nene pis ke sanene, naga sitom ke sape naga pe Ntewa narui.”
Ana veraga ga, Yesu mnunulu-p̃aria sape asitom ke piowa sanene e naga, ana pis pan la, pisape “?Komin ya ne sinemiu la pulen ke sitomena viowa la ne sanene? Visae nevisa ve sanini van inanena nene, nevisave ‘Nepiewo pa kiom̃a mlamulena viowa rui,’ pona nevisa vania nesapenua ‘Osum̃alu, osulowar mom̃a tog, oyali,’ ana e visena lua nene, tai naga m̃areran navisaena, a tai naga meme ga nap̃a avisa. Nap̃a sape ‘Osum̃alu, oyali,’ naga m̃arera manene laa, komin yoko akilia avisulup̃ar sane kiau visena nene pe lelaga pona pe pe lelaga re poli, nap̃a yaru nene sum̃alu, pona pe sum̃alu re poli. 10 Ana nagane, neyum̃aen sur tai nap̃a amiu asitom ke asape Ntewa ga naga taaga kilia yum̃aenia, vena akilia avisulup̃ar sane Narina Yeririna naga kiena puriukawaena torokin nap̃a viewo mlamulena viowa lala na yomarava nini. Amiu ayagogan ruruia.”
11 Ana Yesu pisa pa yaru na inanena nap̃ane, pisape “Nepisa pan ko, osum̃alu, osulowar mom̃a tog, oyali ova um̃a.”
12 Ana veraga ga, e maran la nap̃a apisu ke, sum̃al sanene, kus m̃ana tog, mial pa vanua pa um̃a.
Ana pogos nap̃a p̃ina la nene apisu sur nene, amilan pap̃isi, amieluar Ntewa, asape “Awee, pe tepisuli re sur tai sanene poli wa e kieta malena, p̃ane ga ne.”
Yesu pio Matiu nap̃a kiena kia tai Livae pimi tavevea
Matiu 9:9-13; Luk 5:27-32
13 Ana Yesu p̃asup̃e si pito garo e is nen pupia lapa, ana p̃ina la moki apim lele taaga e yo nene akovivia, naga pian la ke. 14 P̃isi na naga mial laa pa sane, kirawal yaru tai teke e kiena yum̃aena e yum̃a na warpoloen kururu varu na takis. Yaru nene naga Livae, narina ne Alpeas. Ana Yesu pion pania, pisape “Oimi otavevenu.” Ana veraga ga Livae sum̃alu, taveve Yesu. 15 Siraunia, Yesu pa kinana e yum̃a m̃ana Livae, ana e pogos nene, li nawarpoloen m̃ena takis la moki, amio p̃arm̃arera tap̃ena la, nap̃a apimi atotano veraga amio Yesu amio kiena nalogena lala, komin e legiena nene, yeririna kar la ne nap̃a atavevelili m̃a Yesu. 16 Ana navianena navisaluaena la p̃asia, nap̃a la ape le Varasi lala, apisu nap̃a Yesu teke veraga amio yaru la ne sanene, apiun tan nalogena lala, apisape “?Komin ya ne kiamiu navianena kinan ke veraga amio p̃arm̃arera la sa nene?”
17 Ana Yesu mloge visena nene, pisatam̃e la, pisape “Yaru la nap̃a yepela poga ga la pe sinelan re asape ava puna ne yaru nakilaruruen maiena la poli, ana la ga nap̃a amai, la na sinelan pap̃isi. In na pe nepimin re nap̃a nevio yaru la nap̃a apisa ke asape amesmes p̃isi rui e marana ne Ntewa vena ataveve inu, peraga, in na nepimin li viowa la sane la nini.”
Naviunena tai e lepas na monsilena
Matiu 9:14-17
18 Ana e pogos nene, nalogena kiena ne Yoane Nakeena amio le Varasi lala ap̃uar ke p̃elaga namonsilena nakilaen lotuena van Ntewa, ana yeririna la apim pu Yesu, apiun tania, apisape “?E, sanape ne nap̃a nalogena kiena ne Yoane la amonsilu pe nakilaen leniena, a nalogena sa le Varasi m̃ena lala, akila ke maran taaga, ana komin ya ne kiom̃a nalogena lala pe akila re poli?”
19 Ana Yesu pisatam̃e la, pisayu naga amio kiena nalogena lala, sane la akekara pap̃isi pogos nap̃a naga sike amio la, ana p̃isi na sinela viowa pogos nap̃a sa naga ure matan la, ana pisape “?Pogos nap̃a yaru natalopa-ena sike e p̃ap̃agena amio kiena erau lala wa, asitom ke asape lala monar aligan kinanena na p̃ap̃agena? Peraga. 20 Ana siraunia, visae pogos tai nasinekar kiena ne yaru nene lap̃asia aimi aurelua naga vetan kiena erau lala, e pogos nene narui kiena erau la nene akilia aligan kinanena, komin nap̃a la sinela piowagan manene naga.”
Sur viu amio sur marua
21 P̃elaga na monsilena nene, naga p̃elaga marua tai na lotena kiena ne le Yu lala, ana Yesu sinenan pisape kila meraravan van la sape p̃elaga marua la ne sanene, la tap̃atete yakol si amio suri viu la nap̃a naga pian lan ke ne. Ana pisa p̃akaiwa tai e lepas nene pan la, pisape “Tap̃atete tela kinakina kulmrae tai nap̃a pe urviu ana tesuluwo ruru pulus nap̃a teke e kulsota marua nene, komin kulmrae viu nene kilia urewowa kulsota nene komp̃as, p̃isi na pulus naga kilia vim ve keviu laa sane. 22 Ana kuruta na munena nap̃a sirpup pava ke ga wa, tap̃atete tetaron vito e kulus nen nane nap̃a pe urmarua, nap̃a ataron kuruta na munena pito ea yam moki rui. Ana visae tekila ve sanene, yoko kuruta nap̃ani lapa, kila kulus mapoa, kuruta namunena naga taroi, a kana pias nena piowa nena ga. Ana kuruta viu, monar tetaron va e kulus nen nane nap̃a pe urviu, m̃arera ruru po, ana tekilia teligan ruru mom̃a yam ve piavi.”
Yesu pe sup̃en Legiena Wa
Matiu 12:1-8; Luk 6:1-5
23 Ana e legiena tap̃ena si tai, nap̃a pe Legiena Wa, Yesu amio kiena nalogena lala amial apano, ana kiela mrapa naga pa kom lokove na kona lala. La amial m̃a sanene, pano-o kiena nalogena la viso kari la, ana apae plan kona lap̃asia akania. 24 Lala akila ke sanene, le Varasi la p̃asia asum̃a e nap̃ane, nap̃a akirawal ke Yesu lala, apisa pa Yesu, apisape “!Ei, okira! Kiom̃a nalogena la akila ke sanene, la pe pon re akila sanene e Legiena Wa poli, sa ve sanene la akilaro ke kieta navisaluaena ne.”
25 Ana Yesu pisatam̃e la, pisape “?Pona pe amiu apuloli re e Visena Wa pogos tai poli yo, nap̃a pisayu sur la nap̃a P̃arin Sup̃e Keviu Tepet kila nanua sumo? !Amiu akilia ruru pa rui! Naga amio kiena yaru lala viso kar la pap̃isi, 26 naga pa loyum̃a e lele wa kiena ne Ntewa, mla kilaparavi wa nap̃a navisaluaena pisape yar wa ga lala akilia akania, p̃isi na Tepet la akania. Ana Apieta, nap̃a pe p̃arin yaru wa e pog nene, naga tam̃an ga pan la.
27 “Nevisa van amiu, sane kieta navisaluaena lala pe pe na m̃areran kare itaen re si poli. Ve sanene na, Legiena Wa naga pe pe na kila kareen re si malena kiena yeririna la poli, ana pe naiila itaena. 28 Ana Narina ne Yeririna nap̃a pe sup̃en sur punu ga, naga ke narui pe sup̃en m̃ena Legiena Wa, naga ga kilia visa ya nap̃a tekilia teyum̃aen e Legiena Wa, a nap̃a ve teyum̃aen re.”