10
Yesu pisayu sanape nap̃a yaru mligan lua wona
Matiu 19:1-12; Luk 16:18
1 Ana siraunia, Yesu mligan Kalele ana pa metava e lepas nae Yutea, kome wii nae Yortan lepas na vano. Ana p̃ina lala apim ke sina ga puna e pogos nene, ana sa nap̃a naga kila ke silaga, pian la ke e sur la moki.
2 Ana Varasi m̃ena ga p̃asia asike e pogos nene, apimi puna ne Yesu, apisape akilali sina ga naga, la apiun naviunena tai pania. La apisape “?Kieta Navisaluaena pisa ya ne e lepas nen p̃elaga nap̃a visae yaru mligan lua wona? ?Ositom sanape, mesmes ga nap̃a yaru kilia kila sanene, pona pe mesmes re poli?”
3 Ana Yesu piuntam̃e la, pisape “?Ana Yermarua Mosis pisalua ya ne e kiena navisaluaena rui?”
4 Mat 5:31Ana Varasi la apisape “Mosis pisawal navisaluaena tai nap̃a naga tam̃ania sape yaru kilia la lum̃aki naliganluaena tai van wona, vena ligan lua.”
5 Ana Yesu pisatam̃e la, pisape “Lelaga, ana Mosis siri visena nene vanon ga nap̃a amiu p̃arimiu la m̃arera pap̃isi, suri nene kila naga tam̃ania sape akilia aligan plan womiu lala. 6 A siaria e nasiiena naga pe sa re nene poli, komin Visena Wa kiena ne Ntewa pisa sape
‘E purp̃esia, Ntewa sii yeririna, yerm̃ene a sira.’
7 Ana visena tap̃ena si tai, nap̃a pisape
‘Vanon suri nene, p̃isi na yaru ligan arimana amio anena, naga va iakol amio wona, 8 ana lalua aimi ave taaga ga narui.’
“Nanene kila sane lalua ve ave lua re sina ga, aimi ave taaga ga narui. 9 Ana sur ya nap̃a Ntewa vilolaria pimi taaga, pe mesmes re nap̃a yaru kilapure si poli.”
10 Ana pogos nap̃a lala apa si loyum̃a, kiena nalogena lala apiun sina ga tania e lepas nen visena la nap̃ane. 11 Mat 5:32; 1Kor 7:10,11Ana Yesu pisa mesmes ga pan la, pisape “Visae yaru tai ligan lua wona, p̃isi na va ure si sira tap̃ena, Ntewa pisu sane yaru nene naga tap̃a ke pa kolau rui, naga kila kare sira nap̃a pe wona nasumo. 12 Ana visae sira tai ure matan wona na yerm̃ene, va pu yerm̃ene tap̃ena, naga m̃ena nene Ntewa pisu sane kolau.”
Yesu pisa ruru sisi lala
Matiu 19:13-15; Luk 18:15-17
13 Ana lap̃asia akus narila la apimi pu Yesu, vena naga ligan limana te la, ana nalogena la apisuia, apisi m̃arera pan yeririna la nene, apisalup̃ar la. 14 Ana pogos nap̃a Yesu pisuia, pe kekaran re nena nap̃a kiena nalogena la amiyum̃aen sanene poli, naga pis pan la pisape “Amiu ve avisalup̃ar re sisi la nene, atam̃an la ga aim pun inu, vanon nap̃a sisi lala, la na sa ga yeririna la nap̃a asike loyum̃a e nasup̃enena kiena ne Ntewa. 15 Mat 18:3In na nevisa ve lelaga van amiu, yar nap̃a sinenan ke sape va loyum̃a e nasup̃enena kiena ne Ntewa, naga monar kilia sane naga sa ga sisi kokan tai, naga tap̃atete kila sur tai vena kus nasup̃enena kiena ne Ntewa e malena kiena.” 16 Ana Yesu kutarar sisi la nene e limana, mligan limana te p̃arila pisa ruru la.
Yaru m̃ee tai nap̃a kiena sur moki
Matiu 19:16; Luk 18:18-23
17 Ana e pogos nap̃a Yesu siar mial pa ke narui, yaru m̃ee tai kiriri pimi kinai tano puna, piun tania, pisape “?Navianena Nowo, in na monar nekila yum̃aena wo ya, nap̃a kila p̃isi na netol malena nap̃a ve uro re?”
18 Ana Yesu pisa pania, pisape “?Vanon ya ne opiun tan inu sanene, osape in na nepe Navianena Nowo? Pe yar re tai po poli, Ntewa ga naga taaga po. 19 Ana ko na okilia m̃ena kiena navisaluaena la nap̃a monar ologear la, nap̃a apisa ke asape, ve owem̃ar re yaru mare, ve otap̃a re kolau, ve ovinau re, ve ovisokan re, ve okilakewean re yaru, ko ova tanon arimom̃a amio anom̃a.”
20 Ana yaru m̃ee nene pisa pania, pisape “Navianena, navisaluaena la nap̃a opisa ke ne, siar pogos nap̃a nepe sisi ke ga wa, nesum̃a nemlarar make punu ga rui pimi tol nagane.”
21 Ana Yesu kira pisu m̃a sane pano-o, kekaran naga vanon kiena visena nene pap̃isi, pisa pania, pisape “Sur taaga teke ga wa nap̃a ko na okila re poli wa. Ko ovano, owilwilin plan make kiom̃a sur la punu ga, owar kana kilavaru nena, ova oviovionia van yaru la nap̃a pe kiela sur re poli. Visae ko okila sanene, p̃isi na kiom̃a suri wo lala ve moki vap̃isi ma e peni. Ko, ova okila, siraunia oimi otavevenu.”
22 Ana pogos nap̃a yaru m̃ee nene mloge visena nene, kila naga milan karea, sinena piowa pap̃isi, vanon nap̃a naga kiena sur la moki manene laa. Ana naga pure matan Yesu.
Yaru nap̃a kiena sur moki, naga m̃arera laa nap̃a va loyum̃a e nasup̃enena kiena ne Ntewa
Matiu 19:23-30; Luk 18:24-30
23 Ana Yesu kira pisuveve kiena nalogena lala, pisa pan la, pisape “!Nevisa ruru van amiu, visae yaru tai nap̃a kiena suri moki, sinenan pisape va loyum̃a e nasup̃enena kiena ne Ntewa, suri nene na m̃arera towe m̃a nap̃a!” 24 Ana kiena nalogena lala amilan visena kiena ne Yesu nene pap̃isi, naga pisa si pan la, pisape “Pe lelaga naruu la, navaen loyum̃a e nasup̃enena kiena ne Ntewa naga m̃arera na m̃arera. 25 Ee, nevisa van amiu, nap̃a kamel tai naga va warpoyo e pulus nen nitil, nanene naga m̃arera vap̃isi ne, ana visae yaru tai nap̃a kiena suri la moki sinenan sape va loyum̃a e nasup̃enena kiena ne Ntewa, naga m̃arera laa na wa.”
26 Ana pogos nap̃a nalogena la amloge visena nene, amilan pap̃isi, apisape “?Suwala, ana visae ve sanene, p̃isi na ane kilia tol namalena nene?”
27 Ana Yesu kirava pisu la, pisape “Ee, lelaga nap̃a yaru tap̃atete tamalia yaru, ana Ntewa ga kilia kila make suri punu ga.”
28 Ana Pita sinenan sape vis, pisape “?Ana sanapen imimi? Imimi memligan make kiamimi sur la rui, ana metaveve ko.”
29 Ana Yesu pisa pan la, pisape “In na nepisa ke pe lelaga pan amiu, yaru a nap̃a visae ligan m̃ana um̃a, pona wenla pona vinena, anena pona arimana, narina pona kiena porotano, ana visae naga ligan sur la nene vanon ga inu, a vanon kiau lologena wo, 30 p̃isi na naga warmarana sina ga kiena suri la nap̃a mligania, kilia tol sina ga ve ponotia tai. E yomerava nini, yoko tol sina m̃ana um̃a la, wenla la, amio vinena la, anena la amio narina la, a porotano la, a amio sur la nene, yoko tol pog m̃arera ve moki, nap̃a yaru la sinela kar m̃ena ga. Ana metavan sur tap̃ena la nene, e pogos nap̃a imi, yoko tol m̃ena malena nap̃a tap̃atete p̃isi. 31 Mat 20:16; Luk 13:30Ana yaru la moki liu nap̃a asike metava, p̃isi na avito tano, ana yaru la nap̃a asike tano, p̃isi na la ava metava.”
Yesu pisawal kiena marena yam telu narui
Matiu 20:17-19; Luk 18:31-34
32 Ana Yesu lala amlulu ke mrapa, apa ke metava ma Yerusalem narui. Ana Yesu naga sumon ke kiena nalogena la, la sinela kurkur pap̃isi nap̃a apisu naga sumon la apa Yerusalem, komin la akilia ke asape yeririna nae yo nene la sinela kari ke pap̃isi. Ana li tap̃ena la nap̃a asurau ke ga wa, la m̃ena asum̃a amarau lili m̃aga. A naga piolua ga kiena lualima taaga pa lua apimi puna, pisawal si pan la sanape nap̃a p̃isi na akila viowa vania gar Yerusalem. 33 Naga pisayu pan la, pisape “Amiu ayagoga ruruia. Nanagane ita tepa ke Yerusalem narui, nap̃a ve ve piavi re, p̃isi na aligan Narina Yeririna e limana ne yerkawa lala kiena ne yaru wa lala, amio navianena navisaluaena m̃ena lala, ana p̃isi na la nene alip̃ere naga avisave p̃isi na monar mare. Ana siraunia, aligan naga e limana ne la nap̃a pe ape le Yu re poli, 34 nap̃a p̃isi na la nene akirakirai viowa vania, avilasirkon marana, p̃isi na akoa naga vano-o awem̃aria. Ana e kana legiena natelu, p̃isi na mali sina.”
Semes amio Yoane, apiun sur tai tan Yesu
Matiu 20:20-23
35 Ana amiyal laa apa sane, p̃isi na narina ne Sepeti lalua nene Semes amio Yoane, apimi puna ne Yesu, apiun petania, apisape “Navianena, imimi lua mesape sur ya nap̃a meviun tan ko nagane, mesape otam̃an van imimi.”
36 Ana Yesu pisatam̃e la, pisape “?Ana amiu lua sinemiun asape in na nekila ya ne van amiu?”
37 Apisatam̃ea, asape “Imimi lua sinemimin mesape otam̃an sanini: pogos nap̃a ko na ovim ove p̃arin sup̃e na yomerava nini, p̃isi na mekilia metotano memio ko e kiom̃a yo wa metava lavisin ko, tai te lepas na p̃amarua, a tai e lepas na p̃am̃eli.”
38 Luk 12:50Ana Yesu pisatam̃e la, pisape “Amiu pe akilia re sur ne apiun ke ne poli. ?Sanape, amiu lua nene asitom asape atorokin nap̃a tomunpae e piala naloge viowaena nene nap̃a in na monar nemun ea? ?Ana amiu asitom ke asape amiu akilia atol nakeena e wii nap̃a akee in ea?”
39 Lalua apisa pania, apisape “Ee, imimi lua metoroki.”
Ana Yesu pisa pan la, pisape “Ee, lelaga nap̃a p̃isi na amiu amun m̃ena ga e m̃au piala naloge viowaena nene, ana pe lelaga nap̃a atol nakeena e wii nakeena nap̃a akeenu ea, 40 ana sur nene nap̃a amiu lua apiunia, asape atotano amio inu e lepasneu luwoka, sur nene naga pe kiau re nap̃a nela van amiu poli. Yo la ne sanene, kiena ga la nap̃a Ata kila ruru pe kiela, pisaar p̃isi rui pisape p̃isi na atotano ea.”
Narin Yeririna pimin vena yum̃ae kiena ne yeririna lala
Matiu 20:24-28
41 Ana pogos nap̃a nalogena tap̃ena la lualima nene amloge sur nene, nap̃a wenla lalua nene Semes amio Yoane apiunia, la sinela kar lalua. 42 Luk 22:25,26Ana Yesu pio la apimi puna vena naga visi van la, ana pisape “Amiu akilia ruru p̃elaga kiena ne yaru la nap̃a pe amlelaga re e Ntewa poli. Tepisu sa nap̃a sup̃e lala amio yerkawa lala na yomerava, la sinelan asape am̃areran yaru tap̃ena lala asu vatanon la silaga.
43-44 Mat 23:11; Mak 9:35; Luk 22:26“Ana amiu kiau nalogena lala, kiamiu p̃elaga monar ve ve sa re nene. Visae amiu yar tai sinenan sape imi ve yerkawa tai pona ve kiamiu nasumonena tai, kana mrapa nena sanini: yaru nene monar imi ve sa ga yaru na yum̃ae kiamiuena tai. 45 Narina Yeririna naga kila sanene p̃isi rui, nap̃a pe pimin re vena yar la aiila naga poli, naga pimin naiilalaena, a vena tam̃an kiena malena nawulplanen yeririna la ve moki.”
Yesu tap̃a ruru kilamara kata tai
Luk 18:35-43
46 E pogos nene, Yesu amio kiena nalogena lala apim asike garu Seriko, ana pogos nap̃a amligan yo e pulkumali nene apano, ana yeririna la moki pap̃isi ataveve la. Pog nap̃a amiyal ke apano, ana kilamara kata tai tom̃a tano e isinen mraplepa. Yar nene, arimana kiena kia Timeas, ana apio kia kiena ne narina asape P̃atimeas. P̃atimeas nene, totano e mraplepa legiena punu ga, pion ke pan yar lala sape akuan narin kururu varu vania vena iilaena kiena malena.
47 Ana pogos nap̃a mloge apisape Yesu nae Nasaret mial ke e mraplepa pimi, p̃isi na naga pion ke, sape “!Yesu-o, ko lus kiena ne Tepet, nesape ko sinem̃a ye inu wa!”
48 Ana yaru tap̃ena la apisin sinemimien pania, asape “Ee, ve om̃aaga re.”
Ana naga pion manene la pavini, sape “!Sup̃e-o, ko lus kiena ne Tepet, awis, nesape sinem̃a ye inu.”
49 Ana Yesu panar sum̃alu su mrapa e yo nene, pis pan yeririna lala, pisape avio yar nene vim lavis puna, ana lala apa apisa pan kilamara kata nap̃ane, asape “Welu.” Ana naga sape “P̃asa.” Ana lala apisape “Ve ologe re viowa. Yesu nap̃ane sape oim puna wa. Ko osum̃alu, ita.” 50 Ana yaru nene kuanlua m̃ana kulkota, sum̃al veraga ga, pimi puna.
51 Ana Yesu piun tania, pisape “?Ko na sinom̃an osape nekila ya ne van ko?”
Ana naga pisatam̃ea, sape “Sup̃e, awis, in na sineun nesape kilamarau la imi wo, vena nekilia nekirava.”
52 Ana Yesu pisa pania, pisape “Pogaga, ko na okilia ova si um̃a mom̃a. Kiom̃a nalelagaena ga kila ko opim omloge po narui.” Ana naga pisu ruru ke ga suria e pogos nene, ana mial taveve Yesu e mrapa apano.