Elin̄olo lya Paulusi no weli ku
MAKOLINTE
Okulimukisa
Elin̄olo no weli no Makolinte kame lina kun̄oliwa kwa mutumiwa Paulusi mu myaka no makumi mutanu ni mutanu (55) munyima no kuleiwa kwa Kilesite (1.1). Eli lyokame elin̄olo no weli ku man̄olo ayiili awo ana kun̄ola Paulusi mu Kolinte. Kame ana kun̄ola elin̄olo eli mu nako eyo yoli mu Efese oweli yo yambuta okuta ku Kolinte okutunda ku Mesidoniya (16.9).
Elin̄olo eli neli ekalabo ku man̄usa awo ana kutambula Paulusi okutunda kwaanu no keleke mulibaka no mikwa no kupula mu keleke, bamweya nuukutaba ni uhule. Omulenen̄i no Kolinte nau kulimukiwa ku uhule wawo mi ka inu ikomokisa eyo ekeleke aba ina kumona etitaba eti. Makolinte no weli kame likwite ekauhanyo eyo ilimukiwa onene no lilato (13).
Emitwi no titaba
Paulusi kame akeeta Amakolinte nuukutumela kwa Nyambe mulibaka lyoo (1.1-9).
Cwale Paulusi kame ambola etitaba eto ana kutambula mulibaka no oukutaba mu keleke no Makolinte (1.10-21).
Esi sitatamako Paulusi kame ambola etitaba no uhule nuukutwala ku kuta omunjili ni munjili (5-6).
Munyima no eyo kame aba etitaelo ba titaba no makwala, eitabelo no kutendela emilimu, okulapela patalaza, etimpo no mebo mane ni kwinguka (7-15).
Kumamaneneno kame amana okwamba ba inu itendahala ni titaba no munu yomboci (16).
1
1 Okutunda kwa mene Paulusi, ona isaniwa muku singa kwa Nyambe oku tenda omutumiwa wa Jesu Kilesite ni Sositeni omwabetu,
2 Kame ni n̄olela ku keleke ya Nyambe eyo ili mu Kolinte, naawo akenisitwe mwa Kilesite Jesu aa ana isanwa nji atende ano kupumena bamweya naawo ali mu sibaka sonje awo aisana ba litina lya Molyetu Jesu Kilesite, Omolyoo bamweya naaci.
3 Esishemo ni kozo ikale naanyi okutunda kwa Nyambe sitetu, ni kwa molyetu Jesu Kilesite.
Etimbuyoti mwa Kilesite
4 Kame niku tumela kwa Nyambe enako yonje mulibaka lyenu, mu sishemo sa Nyambe muna biwi mwa Jesu Kilesite 5 nji mundila yonje kame muna fumisiwa mwa yonyene mu kwamba konje mane ni mu zibo yonje 6 simba oupaki wa Kilesite kame ongotitwe mukaci kenu 7 mulibakeelyo kakwisa eso muulwile mu mpo yonje no mebo kanyi omo munyolelele okutatelela okumonahala kwa Mbumu Jesu Kilesite. 8 Yoso myongota okutwala ku mamaneneno, nji muulwe esi si nyazahala mu liywaa lya Mbumu Jesu Kilesite. 9 Nyambe wa kusepahala, yonyene ona mi isanene okwingena mu ukuwana ni mwanaye Jesu Kilesite Ombum wetu.
Oukutaba mu Keleke
10 Abaange kame nimi kumbela, mu litina lya molyetu Jesu Kilesite nji moonje, mukuyupe nji cwale oukutaba kulese okwikalako mukaci kenu, kono mu kuwane wino mu maikuto amweya mane nimu munahano umweya. 11 Kakuli kame nina biheliwa kwaanu a Kiloe nji oukulwisa kame kuli mukaci kenu anyi abaange. 12 Eso nitalusa neesi, omunu yonje kwaanyi kame aamba nji, “Mene kame nili wa Paulusi”, Simba nji, “Mene kame nili wa Apolosi”, Simba nji, “Mene kame nili wa Kefasi”, Simba nji, “Mene kame nili wa Kilesite”. 13 Ninji Kilesite kame aku tabile? Paulusi kame ana kungongotelwa ba sifapno mulibaka lyenu? Nji kame muna kolobezwa mu litina lya Paulusi?
14 Kame niku tumela aba kanisi kolobeza omunu kwaanyi, konji feela Kilisipasi ni Gayusi. 15 Nji cwale kuulwe omunu so aamba nji kame muna kukolobeziwa mu litina lyange. 16 Kame ni na kolobeze asindoo ya Setefanasi, okutunda abo kaniyii nji kame nina kolobeze kame omunu. 17 Kakuli Kilesite kasini tuma nji ni kolobeze, kono nji naambe eliywi no kuwaba, kono kasa mu kushangama no maywi nji esifapahano sa Kilesite siulwe okufutuka esi nambulwa tuso.
Kilesite Amaata ni Kushangama kwa Nyambe
18 Kakuli etuto no sifapano weelo kwaa afa, kono kwaaci awo ayoyisitwe yonyene ni maata a Nyambe. 19 Kakuli kame kun̄olilwe nji, “Kame sani sinye okushangama nwawo asi kushangama, ezibo nwawo ashangamine ni ifutule esinu no mbango.” 20 Okwaali omunu no kushangama? Omun̄oli kubine ali? Ositin̄ananyi no tinako no bano okwaali? Kana Nyambe kasifutula okushangama no litunga okuutenda oweelo? 21 Kakuli cwalehe mu kushangama kwa Nyambe elitunga kalisiku limuka Nyambe okubitela mu kushangama kwalyo. Kame si wabelisa Nyambe mu weelo tuna kwiyete okuyoyisa awo apumena. 22 Kakuli aendisi no Majuda kame a kumbela emakazo, mi Amagelike kame asaela okushangama. 23 Kono aci kame tukutaza nji Kilesite nakungongotelwa ba sifapano, oko kutendile esi sisataliso ku Majuda, weelo kwa asimacaba, 24 kono kwawo ana isanwa, onje Amajuda ni Magelike, Kilesite yo maata a Nyambe ni kushangama kwa Nyambe. 25 Kakuli oweelo wa Nyambe niwa kushangama onene okubita aanu, mi oufokoli wa Nyambe kame kuli ni maata okubita no aanu.
26 Abaange, mu tokomele okwisanwa kwenu, kakwisa ano kupula kwaanyi awo ashangamine okukumanena ni moyo no litunga, kakwisa ano kupula awo ali ni maata, kakwisa ano kupula ana leiwa mu lusika no utokwa. 27 Kono Nyambe na kuketa eyi no weelo mu litunga okwenisa eyo no kushangama, Nyambe na kete eyi nokufokola mu litunga okwenisa eyi no kongola. 28 Nyambe na kuketa eyi ili munji ni kuyenisa mu litunga simba einu eyo yulwileko okwitenda eyi iliko. 29 Nji cwale kuulwe omunu sokuyeema balubala lwa Nyambe. 30 Yokame amatatekelo no moyo wenu mwa Kilesite Jesu, woyo anatende Nyambe okushangama kwetu, ni ku luka kwetu, ni ku kenisiwa kwetu, ni ku liululwa kwetu. 31 Cwalehe kanyi omo ku n̄olelwe nji, “Mulesele woyo oku kuhumusa, aku kuhumusete kwa Mbumu.”