Elin̄olo lya Paulusi ku
MAGALATA
Okulimukisa
Ebuka no Magalata kame ina kun̄oliwa kwa mutumiwa Paulusi (1.1). Neli elin̄olo elyo anakn̄ola Paulusi ku keleke no Magalata enakoinjili mukaci ka nako inakukwana makumi anee nimutanu nitwaatu (48) ni kutwala bamyaka makumi mutanu ni mutanu ni twiili (57) munyima no kuleiwa kwa Kilesite. Amagalata mwendi neli anu ana kuyoyanga mu tolopo no Maloma mu Galata. Asi kukuiyeta kakwite oupaki noko anakwikalanga Paulusi aba ana kun̄ola elin̄oloeli, kono emilenen̄i yiili Efese ni Kolinte kame iyambutetwa nji mwana kwikalanga.
Paulusi kame ana kun̄ola okwambela alumeli, Amajuda bamweya nawo asimacaba, mu tikeleke mu Galata. Kame ana kun̄ola mu luli okwayuta etituto no mapwa eto tina kwamba nji alumeli kame afanena okukon̄elela omulao no majuda okutunda mu Tesitamende no kale, onene omupato. Kame kuna kwikala esikwata no anu esosina kwisaniwa nji Amajudaizasi ao ana kusaelanga nji, asimacaba nonyene atwaliwe ku mupato. Kasi kupumena amaata no utumiwa wa Paulusi. Paulusi na kuimanena outumiwa waye mu kwamba einjili no mikalelo yaye (1.11-2.14) mi kame ana kuimanena eliywi no kuwaba mu kutoloka nji okuyoyisa kame kutwesa okuwaniwa fela mu kupumena mwa Jesu Kilesite (2.16). Esi ni mulibaka ni makeke ao amonisa mi kasa eyo atenda anu.
Emitwi no titaba
Paulusi kame atateka elin̄ololyaye mu kukeeta etikeleke mu Galata (1.1-5).
Cwale Paulusi kame atoloka emiyoyelo yaye na kunyima okuimanena etukelo yaye no kuiyeta ni kumonisa nji naeteke okuyoya mukukon̄elela omulao kono eso kasisi ku sebeza (1.6-2.21).
Esisikon̄elelako, kame atoloka omusebezi no mulao ni sishemo mu kuyoyisiwa (3-4).
Cwale kame aba etitaelo mukupula ku muyoyelo no kuwaba no ulapeli (5-6.10)
Paulusi kame amana elin̄olo lyaye ni kukeeta mane ni kukumbela no mamaneneno mu kupuluka nji mukufulwa kwa Nyambe okutenda omunu no ubya ni kwautokwa onene nji emilaona bandee eyo no kuta ku mupato (6.11-18).
1
1 Okutunda kwa Paulisi, omutumiwa kasa okutunda kwaanu simba okubitela mu munu, kono okubitela mwa Jesu Kilesite ni mwa Nyambe Sitange woyo ona kumwingula kwaafu. 2 Onje abaange awo nili noo ku tikeleke na mu Galata.
3 Esishemo ni kozo itunda kwa Nyambe Sitange ni kwa Jesu Kilesite Ombumu wetu iikale naanyi.
4 Woyo ona kukutoboha yonyene mulibaka no ibi yetu okutu tundisa ku kwiiba no litunga lino, okukumanena mukusinga kwa Nyambe ni Sitetu. 5 Kwa yonyene kwikale ekanya okuta oku no kwaabwa! Ameni.
Eliywi Limweya no Kuwaba
6 Kame ni komokile aba mufulalele wangu ngeso yonyene woyo ona miisanene mu sishemo sa Kilesite mane namu siulukele ku liywii no kuwaba lindina. 7 Kasa nji kame kuli ni liywii linjili, kono kame kuli anjili awo amikataza mane kame asinga okukandakanda eliywii no kuwaba lya Kilesite. 8 Kono simba aci simba elingeloi eli litunda ku wilu, aba sami iyete eliywi no kuwaba lindina kweeli tuna mikutaza, woyo munu kame sabiwe ekoto. 9 Kanyi omo tunambele kunyima, cwale nibano kame naamba kame, nji omunu yonje somikutaza eliywi no kuwaba lindina kweeli muna tambula, woyo munu kame sabiwe ekoto.
10 Kana esi ni saela, ninji ni wabelise aanu nji Nyambe? Kana kame neteka okuwabelisa aanu! Nji nisi wabelisa aanu, kani fanene okutenda omubika wa Kilesite.
Omo kuna Kwiyela nji Paulusi atenda Omutumiwa
11 Abaange, kame nisinga nji mulimuke nji eliywi no kuwaba nina kukutaza kalitundu ku munu. 12 Kakuli kana siku litambula okutunda ku munu. Kono kame lina kwiiya mu sinulo ya Jesu Kilesite.
13 Kakuli kame muna yupu omwikalelo wange nakunyima no Sijuda, omo nina kuyandiseta onene ekeleke ya Nyambe ni kwisinya. 14 Mu tuto no Sijunda, kame nina kusiya ataka ange no kupula, kame nina kwabita onene muku tukufalelwa emikwa no sizo no anjekulyange.
15 Kono cwale Nyambe woyo ona kunikete mekani sileiwa kale, kame ana niisana okubitela mu sishemo saye, 16 okuni monisa Mwanaye nji nika mukutaze mukaci no asimacaba, kanasi kweleziwa ku munu. 17 Kanasi kukambamena ku Jelusalema kwawo ana kutenda atumiwa oweli kwa mene, kono kame ina kuta mu Alabiya, mi kame sebeli nuuka ku Damaseka. 18 Munyima no myaka yaatu sebeli nita ku Jelusalema okapotela Kefasi mane sebeli niikala naye amaywaa akwana likumi ni mutanu. 19 Kono kana sikukumona natumiwa anjili konji Jakobo minaye Mbumu.
20 Cwale, mweyo nimi n̄olela, balubala lwa Nyambe, kanoongo!
21 Cwale sebeli nita ku ilalanda ya Siliya ni Silisiya. 22 Kana siku limukiwa okumoniwa ku tikeleke ta Kilesite mu Judeya. 23 Kame ana kuyupa fela nji, “Wuya ona ku tuyandisanga bano sebeli okutaza etumelo eyi ana kusinya oweli!” 24 Cwale sebeli akanyisa Nyambe mulibaka lyange.