8
Jesu Omupulisita Omukulu no Ulikani no Ubya
1 Cwale etaba no mu yambo twamba ninji kame tuli ni mupulisita omukulu, woyo oli ku Lyoko no silyo no lubona no maata onje ombumu mu liwilu. 2 Omubeleki mu sibaka no kukena ni tende no niti eyo kaisisumiwa mu maata no munu kono a Mbumu.
3 Kakuli omupulisita omukulu naketiwa nji abe etimpo ni itabelo mulibakaelyo kame ku fanena nji uyu omupulisista mukulu ni yonyene ngeso alite esinjili no nubu. 4 Cwale nji osili bano ba litunga, kambe katendile omupulisita kame kakuli kwaali apulisita awo atundisa etimpo okukumanena ni mulawo. 5 Alemine okutenda emisebezi eyi ili esifekiso ni mwiinda naku liwilu, kakuli abo Mushe yo saela okuyaka etende, kame ana ku laelelwa kwa Nyambe aba ana kwamba nji, “Omone nji kame otenda einu yonje okukumanena ku inu eyi ona kumonisiwa ba lilundu.” 6 Kono kanyi omo kwikalele, Jesu na biwi esitulo eso no utokwa onene okubitelela eyi no kale kanyi oulikani aimanena ni wakuwaba, kakuli kame ina beekiwa ba tisepiso no kuwaba.
7 Kakuli nji oulikani no weli kambe kawa si nyaziwa, kambe kakwisa esibaka no ulikani no wiili. 8 Kakuli Nyambe na wana oufosi kwa onyene aba amba nji,
“Amaywaa kame aiya, kame kwamba Ombumu,
Aba sani kuleme oulikani no ubya na sindoo ya Isilaele na sindoo ya Juda.
9 Kasa kanyi oulikani ni na ku kulema na njeku lyoo,
ba liywaa aba nina kwalema ni Lyoko okwa twaletela okwatundisa mu naha no Engepita.
kakuli kasi ku twalelela mu ulikani wange,
mi cwale kanisi kwaateteta, kame kwamba Mbumu.
10 Cwale, ou wo kame oulikani sani kuleme na sindoo ya Isilaele
munyima no maywaa awo, Kame kwamba Ombumu.
Kame sani ingenyeke emilawo yange mu tingana too,
ni kwin̄ola ba micima yoo.
mi kame sa ni tende Nyambe woo,
mi onyene atende aanu ange.
11 Mi katamba okwiyeta omunu yonje ni mwabaye,
simba omunu ni minaye okwamba nji,
‘Olimuke Ombumu.’
kakuli onje mbani limuka,
okutangisa ku mwanukana okutwala ku mukulu.
12 Kakuli kame sani ikale ni makeke ku uyi woo,
mi kani tamba oku puluka eibi yoo kame.
13 Mu kwamba oulikani no ubya, kame aamba owu no weli nji kaukwite tuso, mi esi sihonehile niku kuulwa etuso kame sili bebi ni kubwa.