Elin̄olo okutunda kwa
JAKOBO
Okulimukisa
Ebuka ya Jakobo kame ina kun̄oliwa ku munjili oisaniwa Jakobo. Esi kame sitwesahala nji wuyu neli Jakobo minaye Jesu, woyo neli omwendisi mu Keleke na kunyima mi neli ekalulo no kuta ya Jelusalema (Tikezo 15.13). Omutumiwa Paulusi naku mwisananga nji ‘Omusumo’ no Keleke mu Magalaata 2.9. Asiku kwiyeta kame alumela nji ebuka ya Jakobo kame ina kun̄oliwa mu myaka makumi atanu (50) munyima no kuleiwa kwa Kilesite. Kakuli Jakobo neli omwendisi no keleke mu Jelusalema, mwendi kame ana kun̄ola ebuka eyi yoli mu Jelusalema.
Jakobo kame an̄ola ebuka yaye ku masika no kukwana “likumi ni twili (12) awo anahasanele mu naha” (1.1) etuto mu buka ya Jakobo, kame ifanena oukutusisa yo kwa sikupumena onje kono omukwa no oukutusisa amaywi “likumi ni twili (12)” Kame sikumonisa nji Jakobo kame ana kun̄ola mukuyuleka kwa sikupumena no Majuda. Kakuli ebuka eyi kame ina kun̄oliwa nji ikeele mu maoko no sikwata sinene sawo asikubala, kame inakwamba ba tituto no kupula. Jokobo yonyene kame ana kutwalela onene omunahano ba ulikani mukaci no tumelo ni tikezo. Etumelo no niti mbaimonahala ni tikezo (2.17). Kame anaabi emamela mulibaka no kumonisa eketululo kwaanu asikufuma (2.1-4) mi kame atwambela nji tumamele neyo twaamba (3.1-12).
EMITWI NO YAAMBO
1. Jakobo kame akeeta asikubala aye. (1.1)
2. Esisitatamako kame asusuweza asikupumena koongota aba ayanda (1.2-27)
3. Cwale kame atwambela omo kutwesahalela etumelo okumonahaza mu tikezo (1.1-26)
4. Munyima no eyi kame aamba amaata no maywi (3.1-12)
5. Cwale Jakobo kame atoloka omo kushutanena okushangama kwa Nyambe ni kushangama no litunga (3.13-4;10).
6. Esisistatamako kame alemusa asikubala mulibaka no kukununeka (4.11-5;6).
7. Jakobo kame amana ebuka yaye mu 5.7-20 mu kuba etitaelo.
1
1 Okutunda kwa Jakobo, omubika wa Nyambe ni wa Mbumu Jesu Kilesite,
Kame ni n̄olela amasika likumi na yiili aa ana hasana mene nji, shaangwe.
Etumelo ni ku Shangama
2 Abaange, mu wabelelwe aba mwiyelwa amayando no kupula, 3 kakuli mulimuke nji okwetekiwa mu tumelo yenu kame ku militela okongola. 4 Cwale mulesele oukoongota kwenu kumanenene omusebezi kwako no kwiyala, nji mutende aa no kupetahala ni kukula, me mwasaela esinjili. 5 Nji omunjili mwaanyi kakwite oku shangama, akumbele kwa Nyambe woyo obaanga aanu ni mucima mumweya youlwile okusaisisa omubonda, mi mba biwi. 6 Kono akumbele mu tumelo, yo ulwile okwasepa, kakuli woyo no kwasepa kame akufekile kanyi mandinda naba liwate awo akashetwa oku noku ku mebo. 7 Omunu no mukwa no ngeso, alese kutatelela nji mbatambula esinjili okutunda kwa Mbumu. 8 Omunu no ngeso ni wa micima yiili kame akukana mwinu atenda yonje.
Okusheba ni Kufuma
9 Mulesele woyo no kusheba akukumuse mu kununekiwa kwaye kwa Nyambe, 10 mi osikufuma akukumuse mu ukukokobeza kwaye kwa Nyambe, kakuli kanyi epalisa no mopu aba saukukute. 11 Kakuli eliywaa aba lipa ni kubya kwalyo kame liletukisa omoopu, etipalisa tawo kame tikwa ni kuwaba kwayo kame isinyeha. Mu mukwa no ngeso omufumi ni yonyene mba sinyehe ngeso yo sipatehile ni yaye.
Emiliko ni Kwetekiwa
12 Embuyoti ni ya woyo omunu okongota mu mayando, kakuli aba akoma aba aetekiwa , mba tambula omushukwe no moyo eyo Nyambe na ku sepisa kwaanu awo amu singa. 13 Omunu alese okwamba aba aetekiwa nji, “Nyambe kame aneteka.” Kakuli Nyambe kaetekiwa ni uyii mane ni yonyene kaeteke omunu. 14 Kono omunu yonje kame aetekiwa aba akokiwa ni ku putelelwa ku titakazo taye no kwiiba. 15 Cwale etakazo aba ikula kame ileya esibi, mi esibi aba sikula kame silita olufu.
16 Abaange aa asingwa, mulese okongiwa. 17 Oku petahala no kuwaba ni mpo yonje no kuwaba kame itunda ku wilu, okwiiya banji okuunda kwa Sitoo no masebeli, woyo no kwa futuka, kanyi omwiinda aba ufutuka. 18 Mu ku singa kwaye, na tuleye ni liywi no niti nji ku yumbiwa yaye tutende embuya no weeli.
Okuyupa ni Kutenda
19 Abaange aa asingiwa! mu limuke eyi, omunu yonje atende woyo oyupa mu wangu, kono akatabe mu kwamba, woyo no kwatina wangu. 20 Kakuli okutweba kwa munu ka ku sebeze okuluka kwa Nyambe. 21 Cwalehe mulesele eyo yonje no kwiiba neyo isiliko no lunya mi mutambule ni musa eliywi elyo likuniwa mwaanyi, elyo litwesa okuyoyisa emyoyo yenu.
22 Kono mutende atendi no liywi, kasa aa ayupa feela, kame mukoonga mwenyene. 23 Cwale nji omunu ni muteeteti no liywi mi katende, kame akufekile kanyi omunu oku mona olubala lwaye ana kuleiwa nalo mu siponi. 24 Cwalehe aba amana oku mona wino yonyene mi nuukutela, mba pulama wangu omo aikalele. 25 Kono woyo waliketa mu mulawo no ku petahala, wonyene omulawo no tukuluho, mi ni koongotetetamo, kasa osi kuyupa feela niku pulama, kono osi kutenda omusebezi, mba fuyolwa mu misebezi yaye.
26 Nji omunu kame ayambuta nji kame atenda wino omusebezi wa Nyambe, mi kakuleme olulimi lwaye, kono kame akoonga mu omucima waye, woyo omunu okupumena kwaye ni kwambulwa tuso. 27 Okutenda wino omusebezi wa Nyambe no kukena ni niti no kwa nyazahala balubala lwa Nyambe ni Sitetu neesi, oku lekula andiyala ni timbela mu matata oo, mi yo kubabalela kweeyi no litunga yo ulwile eso anyazahala naso.