ELIN̄OLO LYA PAULUSI KU
MALOMA
OKULIMUKISA
Ebuka no Maloma kama ina kuñoliwa mwendi kwa mutumiwa Paulusi enako na kunyima mukaci no myaka makumi atanu ni ilimo inee ni makumi atanu ni ilimo itanu ni yaatu (54-58) munyima no kuleiwa kwa Jesu Kilesite. Paulusi yo kasipotela kale ku Loma sebeli otuma eliñolo eli, oku taluseta alapeli eyi no kutenda mu Loma, onje Amajuda nawo kaasa Majuda. Kame ana kuñola eli liñolo oku tundelela mu Kolinte oko ana kwikalanga ba nako eyo. Paulusi na kuñola nji cwale etinaha mu litunga lyonje atwese oku lumela ni ku kuteka Jesu Kilesite (16.26.)
Ebuka no Maloma ni buka eyo ikwite outokwa onene kwaa sikulapela konje-konje mane ni mu nako yonje mulibaka omo iyupahalela nomo Paulusi atolokela wino-wino oku yoyisiwa satuwane mwa Jesu Kilesite. Paulusi kame ana kuwaneka eliywi no kuwaba lya Jesu Kilesite ku Testamente no kale. Asi ku kwiyeta no kupula kame akanana nji ekauhanyo noutokwa onene mubuka eyi ni (1.16) eyo yaamba nji, “Senisiwa mulibaka no eliywi no kuwaba, kakuli ni maata a Nyambe ba ku yoyisiwa kwaao alumela onje. Oweli ku Majuda, cwale kwaa no macaba.” Ekalulo no matatekelo no Maloma (1-11) ni yao asi ku kwiyeta mane ni kalulo no wili (12-15) kama ikwite eyi no kutenda eyino titaelo no kupula ku kuyoya kwao asi kulapela.
Emitwi no yambo
Paulusi kame atateka eliñolo lyaye abo mu ukulimukisa yonyene mane ni kwamba kwa woyo ana liñolele. (1.1-15)
Aka no wiili kama añola eyi no mwikalelo no munu mane ni kutwesahala no ku yoyisiwa mwa Jesu Kilesite (1.16-11; 36).
Munyima nweyi, Paulusi sebeli oba etitaelo no kutenda no kupula ku kuyoya no asiku lapela. (13.1-15; 13).
Kame amana eliñolo no Maloma mukuba etitumeliso no kupula kwaanu mu keleke na ku Loma (16).
1
1 Mene Paulusi, omubika wa Jesu Kilesite ona isaniwa oku tendiwa omutumwa nji aambe eliywi no kuwaba lya Nyambe. 2 Eliywi no kuwaba ana kusepisa kale Nyambe mwanuhi aye mu man̄olo no kukena. 3 Eliywi no kuwaba okukumanena kwa mwanaye, ona kuleiwa mu lusika lwa Dabida mu lutu no unu, 4 cwale naku monahalisiwa ni maata nji Mwanaa Nyanbe luli okukumanena ku mebo no kukena aba ana kwingulwa kwaafu, Jesu Kilesite Ombumu wetu. 5 Mwayonyene Jesu, Nyambe na kutuba esishemo no kutendiwa omutumiwa nji mulitina lyaye tu monise ano macaba etuso no ku kuteka. 6 Cwale okwekeza naanyi munaisaniwa kwa Nyambe nji mwikale kwa Jesu Kilesite. 7 Kwaanyi moonje aasikupumena muli mu Loma anyi musingiwa ni kwiisaniwa kwa Nyambe nji mutende esicaba saye.
Mubiwe esishemo ni kozo kwa Nyambe Sitetu ni kwa Mbumu Jesu Kilesite.
Etapelo no Kuba esi no Kutumela
8 Kame ni tateka oukutumela kwa Nyambe wange mwa Jesu Kilesite mulibaka lyenu moonje, kakuli etumelo yenu kame yambiwa mu litunga lyonje. 9 Kakuli Nyambe ni paki wange woyo ni belekela ni mebo yange mu liywi no kuwaba lya Mwanaye nji ni lesele oku mipuluka, 10 enako yonje abani lapela, kame ni kumbela nji mukusinga kwaye Nyambe alukise einu yonje nji ni lukisetwe omusipili no kuwaba aba niiya kwaanyi. 11 Kakuli kame nilakaza onene oku mimona, nji ni mibe empo imweya no mebo no kukena nji ni shukelwa 12 abo cwale kame tufanena oukususuweza toonje omunjili ku munjili mu tumelo yetu.
13 Anyi abange kame ni singa nji mulimuke, etinako no kupula kame ni singanga okwiiya mu ku mi mona kono kameni kwangwanga, kakuli kame kwiyanga indina eyi ini kwangwisanga. Kame ni naasingi nji niiye mu ku yangula etimbuto mwaanyi kanyi omo nina tendele kwa simacaba anjili. 14 Kakuli kame nili ni sikoloti ku Mageleke ni kwasi mishobo indina onje, bamweya kwasiku shangama naaelo. 15 Cwale kame ni shukelaoka kutaza eliywi no kuwaba lya Nyambe ni kwaanyi kame muyoya mu Loma.
Amaata no Liywi no Kuwaba
16 Kakuli seene oku kutaza eliywi no kuwaba lya Nyambe, kono ni maata a Nyambe no kuyoyisa onje awo asi ku pumena, oweli ku Majuda okubinda okuta ku Mangelike 17 Kakuli mwasonyene okuluka kwa Nyambe kame kuna shootolwa, oku tunda ku tumelo ni kuta ku tumelo kanyi omo ku ng'olelwe nji, “Woyo no kuluka, mbayoyo mu tumelo yaye.”
Omubonda no Masika no aanu
18 Kakuli okutweba kwa Nyambe kame kutundelela kuwilu, mi okulwisa ouyi ni ufokoli onje no alume awo ana lyatelele eniti mutikezo too no kwiiba. 19 Kakuli eso sitwesahala oku limukiwa sa Nyambe kame sina hupulelwa kwa onyene, kakuli Nyambe naimonahaza kwa onyene. 20 Kakuli oku tunda ku simuluho no litunga eyi ya Nyambe no kwamoniwa, amaata aye ni Unyambe waye kame imonahala wino-wino mu inu yaye ana tende. Cwale abakulingeso kakwisa omo sakutatulele. 21 Kakuli simba nji kame alimukile Nyambe, kaasimukuteka kanyi yokame Nyambe simba okutumela kwa yonyene, kono kame ana futuka aa nambulwa tuso mu mihupulo yoo ni micima yoo eyi isaela oku yupisisa sebeli iilola. 22 Kame ana singi nji atende anoku shangama, cwale sebeli afutuka aaelo, 23 ni kufutula ekanya ya Nyambe na kwaafa okwitenda amaswaniso no kuumba kanyi omunu, simba otuyunyi simba eiyamana, simba eyi yeenda ni mapumo.
24 Cwalehe, Nyambe naaleselele okutenda eyino titakazo no micima yoo na kwakena, nji ashubule etinyutu too mukaci koo. 25 Kakuli kame ana futula eniti ya Nyambe okwitenda amapwa ni kulapelela ni kusebeleza eyumbiwa okubita omuumbi, woyo olumbiwa enako yonje okuno kwabwa! Ameni
26 Mulibaka eli, Nyambe naaleselele okutwalelela mu titakazo too atenda eyi no kwiiba. Mane akati sebeli alangana ni akoo akati. 27 Mukutenda ngeso alume ni onyene sebeli alesela emikwa no kulangana naakati kono sebeli alangana nalume akoo.
28 Kakuli kasi tokomela oku limuka Nyambe woyo no niti, Nyambe naabi ku minahano na kwanahana wino. 29 Kame aiyalile eino kwiiba yonje mi kame ali ni matalu, ni lutimbo, mane kame ashukela eyi no akoo, ni muna nuukwibaa, ni tin̄ananyi ni tindwaa mane ni kooba 30 asimapwa, aa atimbile Nyambe, asi kunyefula, asi ku kuhumusa, asi kutateka eyi no kwiiba mi kakuteke ashemi oo. 31 Kaakwite etingana, kaasepahala, kaakwite elizwalo ni kuulwa amakeke. 32 Naaba alimukile ekatulo ya Nyambe eyi yaamba nji, Aanu onje ayoya ngeso, kame afanena okufa. Cwale kaitende fela, kono kame alumelela awo aitenda.