Tkabꞌ Tuꞌj Pabl kye Nimil aj Tesalónica
A tkabꞌ uꞌj kye nimil toj tnam Tesalónica junx taꞌ tnabꞌljo xnaqꞌtzbꞌil tukꞌa tnejil tuꞌj Pabl kye nimil antza. Me tojjo tkabꞌ uꞌj, nimx nyolin tiꞌjjo aj tul meltzꞌaj qAjaw. Tbꞌajlinxi ttzꞌibꞌin Pabljo tnejil uꞌj, bꞌeꞌx ul tqanil te, qa aye nimil antza nimx yajbꞌil otaq tzaj kyiꞌj, ex otaq chi bꞌisin, quꞌn kubꞌ kyximin qa a tkabꞌ tulil qAjaw Jesucrist otaq bꞌaj toj kywutz. Tuꞌntziꞌn luꞌn, xi ttzꞌibꞌin Pabljo tkabꞌ tuꞌj kye, tuꞌntzin tqe kykꞌuꞌj, ex tuꞌn tchewx kyanmin tojjo jniꞌ yajbꞌil n-ikyꞌxtaq kyuꞌn, ex tuꞌn tqe kykꞌuꞌj qa naꞌmtaq tul Jesucrist tkabꞌ majin.
Tuꞌn ttzyetjo uꞌj lo, xi tqꞌoꞌn Pabl chjonte te Dios, quꞌn ajo kynimbꞌil ex kykꞌuꞌjbꞌil nimil toj Tesalónica kyjataq tchꞌiy. Te tibꞌajxi, xi tchikyꞌbꞌin kye qa ajo Tkawbꞌil Dios ilxixtaq tiꞌj tuꞌn tjapin, ex ajo tkabꞌ tulil qAjaw, twutzxix, me naꞌmxtaq tkanin tqꞌijil. Ex atzin il twutz txꞌotxꞌ, a tzeꞌnku n-ikyꞌx kyuꞌn, ilxixtaq tiꞌj tuꞌn tjapin. Me okxixpe kxeꞌl tetz toj il, ajxix tjapin tqꞌijiljo ichin, a ntqꞌma Pabl, a aj ilxixch (2:3).
Kyxoljo yol te qꞌol nabꞌl tiꞌj kychwinqil nimil, ajo ntzaj tqꞌoꞌn toj tbꞌajsbꞌil tuꞌj, ntzaj tqꞌoꞌn juntl yol te nukꞌbꞌil tiꞌjjo tuꞌn kyaqꞌnin tuꞌn kykanbꞌinte kywaꞌ toj tumilxix, a tzeꞌnkuxjo yekꞌbꞌil kyij tqꞌoꞌn Pabl kye, teꞌ tten kyukꞌa.
1
Jun qꞌolbꞌil
1 Ayiꞌn Pabl nxi ntzꞌibꞌinjiꞌy uꞌj luꞌn, junx tukꞌa Silvano ex Timotey. Nxi ntzꞌibꞌiꞌn kyeꞌy, ayiꞌy Ttanim Dios toj tnam Tesalónica,✡Kybꞌi. 17:1; 1Tes. 1:1. a ayiꞌy ma tzꞌok kymujbꞌin kyibꞌa tukꞌa qMan Dios ex tukꞌa qAjaw Jesucrist. 2 Chjonte qMan Dios tuꞌn t-xtalbꞌil ex tnukꞌbꞌil kyibꞌaja, a qTata ex qAjaw Jesucrist.
A Dios kkawil kyibꞌaj aj il, aj tul qAjaw Jesús
3 Erman, kukx nxi qqꞌonjiꞌy chjonte te qMan Dios kyiꞌja. Ex il tiꞌjjo lo tuꞌn tkubꞌ qbꞌinchiꞌn, quꞌn a kynimbꞌila nchꞌiyxix wen, junx tukꞌa kykꞌuꞌjbꞌila teyile junjun. 4 Tuꞌnpetziꞌn, kukx nqo yoliꞌn kyiꞌja kyxol kykyaqil Ttanim Dios, quꞌn tuꞌn nimxix kynimbꞌila ex tuꞌn waꞌlqexixa toj tkyaqiljo nya bꞌaꞌn ntzaj kyuꞌnxjal, ex toj tkyaqiljo bꞌis n-ikyꞌx kyuꞌn.
5 Ate luꞌn nyekꞌinte qa tzꞌaqlexix Dios tukꞌa tkawbꞌil, quꞌn toj tkyaqiljo jniꞌ n-ikyꞌx kyuꞌn, ma tzaj tqꞌoꞌn Dios kyokixa toj kyaꞌj. 6 Quꞌn tzꞌaqlexix te Dios. Tuꞌnpetziꞌn, il tiꞌj tuꞌn ttzaj tqꞌoj Dios kyiꞌjjo ayeꞌ nchi yajin kyiꞌja. 7 Ex ktzajil tqꞌoꞌn ajlabꞌl kyeꞌy, ayiꞌy n-ikyꞌx kyuꞌn; ikyxjo tzeꞌnku qeꞌ ktzajil tqꞌoꞌn ajlabꞌl qeꞌy, toj tqꞌijil, aj tul qAjaw Jesús toj kyaꞌj tukꞌa qꞌaqꞌ njulin wen, ex kyukꞌa jniꞌ t-angel. 8 Ex tzul qꞌolte tkawbꞌil kujxix kyibꞌaj kykyaqiljo, a mi ẍi nimin tiꞌj Dios, ex mi xkubꞌ kynimin a Tbꞌanil Tqanil kolbꞌil te qAjaw Jesucrist. 9 Ex ktzajil qꞌoꞌn kawbꞌil kujxix te jun majx, ex kchi elix lajet najchaq tkꞌatz Dios toj kyaꞌj, jaꞌ nqoptzꞌaje qAjaw tukꞌa tkyaqil tipin. 10 Tkyaqiljo lo kbꞌajil, aj tul tqꞌijil, tuꞌn tul qAjaw, tuꞌn tjaw nimsin tbꞌi, ex tuꞌn kyjaw kaꞌylaj tkyaqil nimil, junx kyukꞌiy, ayiꞌy ma txi kyniminjiꞌy a yol xi qqꞌmaꞌn kyeꞌy.
11 Tuꞌnpetziꞌn, kukx nqo naꞌnjiꞌy Dios kyiꞌja, tuꞌn kybꞌeta toj tumilxix, a tzeꞌnkuxjo kyokliꞌn, teꞌ ẍi tzaj txkoꞌn tuꞌn. Ex nqo kubꞌsin qwutza te Dios, tuꞌn kytzaj oniꞌn tuꞌn, tuꞌn tjapin bꞌajjo jniꞌ kyajbꞌila bꞌaꞌn ex tkyaqil kyaqꞌiꞌn, a nkybꞌinchiꞌn tuꞌn kynimbꞌila, noq tukꞌa tkyaqil tipin qMan. 12 Ikytziꞌn, kjawil nimsit tbꞌi qAjaw Jesucrist toj kychwinqila, ex ikyxjo kyeꞌ ex kchi jawil nimsiꞌn kywutz tkyaqil xjal noq tuꞌn t-xtalbꞌil qMan Dios ex qAjaw Jesucrist.
✡1:1 Kybꞌi. 17:1; 1Tes. 1:1.