8
Jesús ne, sahmi tangun me xuta cojo Nina ngatsë rë ngu compromisu xatsë
1 Quihndë ne, cjua xi hitsë sa matitjun tsëhë yëjë ni cjua xi tinújan vi ne, hacui cjua vihi: tjin naja ngu nahmi xi matitjun xi cuatjin xcusun rë me. Quiji me ngahnga, cavejña me taha ladu quixi tsëhë Nina xi jemu jyë hnga cojo hasen rë. 2 Ngajan sahmi me xa xi má me nahmi ngajan ndava Nina. Peru ndava Nina jan ne, hacuiin ngu ndihya xi catsindaja ngu xuta ta cahndë́ vëhë ne, suvá Nai naja catsindaja me.
3 Yëjë ni nahmi xi matitjun ne, hatuxa xa rë me xi sua me cjuatjo cojo Nina sua me ngu chu xi tsiquehen xuta. Vëhë xi cojo Jesús camameje rë xi tjin mé xi sua me cjuatjo cojo Nina. 4 Sa xi nguehe ngasunhndë tacun cuaha me quihndë ne, hacuiin cojo me má me nahmi ta nguehe ne ha tjin nahmi xi sua cjuatjo cojo Nina sacuatjin vitexa ley rë Moisés. 5 Sacuaha xa xi sahmi nahmi nguehe ngasunhndë vi ne, hacuiin tangun cojo xa xi má ngajan ngahnga ta, sacuaha ejemplu o tjahnguen ni rë xa xi má jan ne, vëhë xi má nguehe. Hya xi ha cuetsihin sahmi Moisés ndava Nina jan ne, cuitjin cachja Nina cojo rë me: “Nechin cuidadu ne ndandaja nihñi yëjë ni xcusun vë sacuaha xcusun xi ha catsingácun ri ngajan hiscan naxi jan.” Cuatjin cachja Nina. 6 Quihndë ne, Jesús casacu rë me ngu xa xi hitsë sa ndaja, tsëhë xi hacuaha me vëhë sahmi tangun me xuta cojo Nina ngatsë rë ngu compromisu vëhë hane hitsë sa ndaja cjua cachja me.
7 Sa xi ndatjin tjin chihin compromisu xi casahmi Nina titjun ne, sehe camamiji rë ngu nga compromisu xi ma jo xi hitsë sa ndaja. 8 Peru Nina ne, cavëë me xi xutachanga naja ne, quitjen me jyë́, vëhë xi cachja me cuitjin:
Ngahan Nai nuju ne, cuichjá cojo nuju ta cuechu nixtin
xi sahme nga ngu compromisu xatsë cojo nuju ngayun xuta tjë rë Israel cojo xuta tjë rë Judá.
9 Peru ha quihndë hacuiin sacuaha compromisu xi casahme titjun cojo xutachanga nuju,
hya xi cojo cjuahmutacun naha ne, cavaxëxen me tsëhë nangui Egipto;
hane tsëhë xi hacuiin quiji nduju me sacuatjin compromisu xi casahme cojo rë me ne,
vëhë xi ngahan ne, casahmecuendaan me, cuatjin chjá ngahan, Nai nuju.
10 Sacuaha compromisu xatsë xi sahme cojo nuju ngayun xuta tjë rë Israel
hya xi cuma ngascan tsëhë nixtin vëhë ne, hacui vihi:
Cueyá ley naha cahntsua cjuatacun nuju,
sacuaha xi cuma hindu cjua rë ley vëhë cahntsua cjuatacun nuju.
Hacuaha ngahan cuma ngahan Nina nuju
hane ngayun cuma ngayun xuta naha.
11 Tsajin yo xi cuicuya xicjin,
tsajin yo xi cuichja cojo xicjin cuitjin: “Meje rë xi cumachaya ri yo xi Nai naja.”
Tsajin yo xi cuichja cuatjin ta tsëhë xi yëjë ni sa quihndi sa changá ne,
ha camachaya rë yo ngahan.
12 Nixtin hya ne, jemu tjin ná cjuaninchataha cojo cjuatsehen xi cún me
hacuaha ha quihndë tsajin nixtin tsinguítsjen jyë́ rë me.
Cuatjin cachja Nina. 13 Hya xi chja Nina tsëhë ngu compromisu xi tjun jan ne, casahmi changá me. Hane xcusun xi ha jima changá jan ne, ha meje cjuëya.