स्तोत्र 30
एक स्तोत्र. मंदिराच्या समर्पण सोहळ्यासाठी एक गाणे, दावीदाचे स्तोत्र
1 याहवेह मी तुमची प्रशंसा करेन,
कारण तुम्ही मला खोल दरीतून बाहेर काढले आहे
आणि माझ्या शत्रूंना माझा उपहास करू दिला नाही.
2 हे याहवेह, माझ्या परमेश्वरा, मी तुम्हाला साहाय्यासाठी विनवणी केली
आणि तुम्ही मला रोगमुक्त केले.
3 याहवेह तुम्ही मला अधोलोकातून बाहेर काढले;
तुम्ही मला गर्तेत जाण्यापासून वाचविले.
4 अहो याहवेहच्या भक्तांनो, त्यांची स्तुतिस्तोत्रे गा,
त्यांच्या पवित्र नावाला धन्यवाद द्या.
5 त्यांचा क्रोध क्षणभर टिकतो,
पण त्यांची कृपा जन्मभर राहते.
विलाप करणे केवळ रात्रभर राहील,
परंतु प्रातःकाल उगवताच आनंद होईल.
6 माझ्या भरभराटीच्या वेळी मी म्हणालो,
“मी कधीही डगमगणार नाही.”
7 याहवेह, तुमच्या कृपेने
मला बळकट पर्वताप्रमाणे*म्हणजेच सीयोन पर्वत स्थिर केले होते,
परंतु तुम्ही आपले मुख लपविले,
तेव्हा मी भयभीत झालो.
8 याहवेह मी तुमचा धावा केला,
मी प्रभूला कृपेची विनवणी केली.
9 मी चिरनिद्रीत होण्यापासून
मी अधोलोकात जाण्यापासून काय लाभ?
माती तुमची स्तुती करेल काय?
ती तुमच्या विश्वासूपणाची साक्ष देईल काय?
10 याहवेह, माझे ऐका, मजवर दया करा;
याहवेह मला साहाय्य करा.
11 तुम्ही माझ्या शोकाचे रूपांतर हर्षनृत्यात केले.
तुम्ही माझे शोकाचे गोणपाट काढून मला उल्हासाची वस्त्रे घातली,
12 जेणेकरून मी शांत न राहता, माझ्या हृदयाने सदैव तुमची स्तुतिस्तोत्रे गात राहावे.
याहवेह, माझ्या परमेश्वरा, मी सदासर्वकाळ तुमची प्रशंसा करीतच राहीन.