स्तोत्र 111
1 याहवेहचे स्तवन होवो.
जिथे नीतिमान एकत्र येऊन सभा आयोजित करतात,
तिथे मी संपूर्ण अंतःकरणापासून याहवेहचे स्तवन करेन.
2 याहवेहचे कार्य किती उदात्त आहेत,
ते त्या अतिमहान कृत्यांचे मनन करतील.
3 गौरवशाली व वैभवशाली आहेत याहवेहची कृत्ये,
आणि त्यांची नीतिमत्ता सर्वकाळ टिकते.
4 याहवेहनी आपल्या या कृत्यांना अविस्मरणीय केले आहे;
ते कृपाळू व दयाळू आहेत.
5 जे त्यांचे भय धरतात त्यांना ते अन्नाचा पुरवठा करतात;
ते आपला करार नेहमी स्मरणात ठेवतात.
6 त्यांच्या कृत्यांचे सामर्थ्य त्यांच्या लोकांना प्रकट होण्यास,
त्यांनी अन्य राष्ट्रांची भूमी त्यांना वतनादाखल दिली.
7 त्यांच्या हाताने केलेली सर्व कृत्ये न्याय्य आणि विश्वसनीय असतात;
त्यांचे सर्व नियम विश्वासयोग्य असतात.
8 ते नियम सदासर्वकाळ अटळ आहेत,
सत्य आणि सात्विकतेला अनुसरून तयार केलेले आहेत.
9 त्यांनी आपल्या लोकांना मुक्तता दिली आहे;
त्यांनी आपला करार अनंतकाळासाठी स्थापित केला आहे—
त्यांचे नाव पवित्र व भयावह आहे.
10 याहवेहचे भय सुज्ञानाचा प्रारंभ होय;
त्यांच्या नियमाचे पालन करणार्‍यांना उत्तम आकलन शक्ती प्राप्त होते.
याहवेहची सदासर्वकाळ स्तुती होवो.