1 Je²-vi⁴ cˀoa⁴-ti⁴ ca²ta³ˀyai³ nca³ je² ni⁴čhjin³ xi³ cjoe⁴tˀa³ cjoa⁴ˀai¹-na¹ cjoa⁴ñˀain³ xi³ tse³. 2 Sˀe⁴ cho⁴ta⁴ xi³ to⁴yao³-le⁴ tsjoa³que³ coan⁴, xi³ chˀao³ntai³, xi³ nchja⁴tˀa³ yao³-le⁴, xi³ ncˀa³con³, xi³ chˀao³ tso²-le⁴ xi¹ncjin¹, xi³ tsˀa³ntjai²cjoa⁴que³ xi³jcha¹-le⁴, xi³ ni⁴ˀi⁴tse¹-jin² tsjoa¹ cjoa⁴nta³, xi³ tsi² tsje³ tjin¹, 3 xi³ tsin²-le⁴ cjoa⁴tjao²cha³-jin², xi³ si¹qui³tson¹ en¹-le⁴, xi³ va¹nqui³ cao⁴ cjoa⁴nti³so³, xi³ to⁴cja⁴ˀai¹-nca¹ sˀin¹, xi³ toan¹, xi³ taon³ ve³ xi³ nta³, 4 xi³ jao² ncjain¹, xi³ to⁴xquia⁴ sˀin¹, xi³ to⁴si¹xcon¹ ma³-le⁴, xi³ nqui²sa⁴ ma³tsjoa³que³ cjoa⁴sca¹ cao⁴-ni³ tsa² Ni³na¹, 5 xi³ ma³tsen³ jo³ xi³ ve³xcon¹ Ni³na¹, to⁴nca³ tjio¹tˀa³xin²-le⁴ nca³nˀion¹-le⁴ Ni³na¹. Je² xo⁴cjoan³-vi⁴ xi³ ti⁴sen⁴xin²-lai⁴. 6 Tjin¹ cˀa³ xi³ tsˀe⁴ je²-vi⁴ xi³ ma³ fa³ˀa³sˀen³che¹, si¹ntˀe¹tˀa³-le⁴ ˀnti¹ ya¹nchjin¹ xi³ cjai¹nca³ tse³ je¹ yˀa³, xi³ cja⁴ˀai¹-sa³ cjoa⁴chi⁴nca⁴ fi²cao⁴ nca³ je², 7 xi³ tjio¹co³tˀa³ya³ntsjai², cˀoa⁴ ni⁴cˀia³-jin² ma³-le⁴ cjoa⁴fa³ˀai³tsjen³ xi³ cjoa⁴qui²xi⁴. 8 Jo³-sˀin² qui³sˀin³ Janes cao⁴ Jambres nca³ ña³qui³ tsa³ca³tio²ta²ja³-le⁴ Moisés, cˀoa⁴²-ti⁴ sˀin¹ je²-vi⁴ nca³ va³tio²ta²ja³-le⁴ xi³ cjoa⁴qui²xi⁴, cho⁴ta⁴ xi³ chˀao³ tjio¹ cjoa⁴fa³ˀai³tsjen³-le⁴, xi³ tsi² nta³ ji³tjo³ tˀa³tsˀe⁴ en¹ xi³ ma³cjain¹-na¹. 9 To⁴nca³ li²jme³ xi³ ti⁴coi⁴njen³-ni³le⁴, nca³ je² cjoa⁴sca¹-le⁴ jcha⁴-le⁴ nca³tsˀi³, jo³-sˀin² tsa³ˀya³-le⁴ cjoa⁴sca¹-le⁴ xi³ nqui²jao²-ve⁴.

10 To⁴nca³ ji³ coan³cho⁴ya³-li² je² cjoa⁴fa³ˀai³tsjen³-na⁴, jo³-sˀin² tsa³ca³co³ya²³-le²³, jo³ qui³sˀian³, jme³ xi³ tsa³cˀa³mjen³ ca²sje³, jo³-sˀin² coan³cjain¹-na³, jo³-sˀin² qui³si³-cjen¹³, jo³-sˀin² coan³tsjoa³que⁴, jo³-sˀin² qui³cho¹cjoa⁴-na³, 11 jo³-sˀin² tsa³qui³yo³tjen⁴nqui³ co²ntran⁴-na³, jo³-sˀin² qui³si³cja³ˀa¹-na³ cjoa⁴ñˀain³, je²-vi⁴ xi³ ja³ˀai³ne²-na³ ya⁴ Antioquía, ya⁴ Iconio, ya⁴ Listra. Coi³ cjoa⁴ñˀain³ xi³ tsa³cja³ˀa³. Nai³-na¹ tsa³cˀa³sje³ntjai²-na³ nca³yi³je³. 12 Cˀoa⁴ je² nca³tsˀi³ xi³ me³-le⁴ nca³ tsje³ coa⁴tio²con³tˀa³-le⁴ Cristo Jesús, cˀoa⁴-ti⁴sˀin² cjoa⁴ˀa² cjoa⁴ñˀain³. 13 To⁴nca³ je² cho⁴ta⁴tsˀen⁴, cˀoa⁴ je² xi³ vˀa³na⁴cha⁴ to⁴ña³qui³ to⁴sin³ to⁴nta³ nqui²sa⁴-sa³ tsˀen⁴ coan⁴, cˀoa⁴na⁴cha⁴-sa³le⁴, cˀoa⁴-ti⁴ chˀa⁴na⁴cha⁴-sa³le⁴. 14 To⁴nca³ ji³ nta³ tˀin³coai⁴ xi³ qui³cho²tˀa³yai³, xi³ nta³ coan³cjain¹-li², nca³ je³ˀyai³ ˀya³ xi³ tsa³ca³co¹ya³-li². 15 Sa³ˀnta³ nca³ ˀnti¹ ti³soi³, tsa³ˀyai³ je² xon⁴ Escritura xi³ tsˀe⁴ Ni³na¹, je² xi³ nta³ si⁴²chji⁴ne⁴-li² jo³-sˀin² coi²tjo⁴ntjai²³ xi³ to⁴tˀa³tsˀe⁴ nca³ ma³cjain¹-li² tˀa³tsˀe⁴ Cristo Jesús. 16 Nca³yi³je³ xon⁴ Escritura Ni³na¹ ji³nčhoa³-ni³, cˀoa⁴ cjai¹nca³ nta³ ma³chjen¹ nca³ va³co¹ya³-na¹, nca³ nchja⁴ti³cao⁴-na¹, nca³ si⁴²cho⁴ya³nta³-na¹, nca³ si⁴²qui³ncha¹ya³ntia⁴²-na¹ xi³ cjoa⁴qui²xi⁴, 17 jme¹-ni³ nca³ je² cho⁴ta⁴-le⁴ Ni³na¹ ña³qui³ tji¹jnco³-si¹ni³, nca³ ña³qui³ tjin¹yi³je³-le⁴ xi³ ma³chjen¹-le⁴ tˀa³tsˀe⁴ nca³yi³je³ xa¹ xi³ nta³.