1 ˀnti¹ntsˀe³, a³li² ncjin²-jin² maestro mao³, nca³ je³ˀyao³ nca³ nqui²sa⁴ tse³ cjoa⁴ñˀain³ cˀoai⁴-na¹ xi³ maestro coan³². 2 Nca⁴ nca³tsˀi³ nia¹ tse³ to⁴chˀao³ nˀian². Tsa² jnco³ xi³ tsi² chˀao³ tso² en¹-le⁴, je²-vi⁴ xi³ ña³qui³ cho⁴ta⁴nta³. Cˀoa⁴-ti⁴ ma³-le⁴ va³te¹xo³ma³-le⁴ yao³-le⁴ jo³-ni³ tsa² xi³ tji¹ˀa³ freno. 3 Coe⁴-ni³ ña¹ vˀe²ˀa³² freno tsˀoa³ na⁴xin¹, jme¹-ni³ nca³ si⁴²tjo³son²-si¹ni³na¹. Cˀoa⁴-sˀin² ni²ntˀe¹ yao³-le⁴. 4 Coe⁴-ni³ cˀoa⁴-ti⁴ je² barco. Nta³ tsa² cjai¹nca³ je³, nta³ tsa² cjai¹nca³ nˀion¹ ntjao⁴ xi³ fi²cao⁴, cjai¹ to⁴ˀnti¹ cji³ ya¹te³ timón xi³ fi²cao⁴ barco to⁴jña³-ni³ve⁴ nca³ me³-le⁴ fi²cao⁴ je² xi³ ca³ni¹. 5 Cˀoa⁴-ti⁴sˀin² je² ni³jen³² ˀnti¹ cji³, to⁴nca³ a³li² to⁴cˀoa⁴cji³ tse³ cjoa⁴ xi³ ma³-le⁴. Coe⁴-ni³ nta³ tsa² to⁴ˀi⁴tse¹ lˀi¹, a³li² to⁴cˀoa⁴cji³ jña¹jcha¹ va³ca¹. 6 Je² ni³jen³² jo³ lˀi¹ ni¹, cjai¹nca³ chˀao³ sˀin¹. Cˀoa⁴-sˀin² ni³jen³² ti¹jna³jin³-le⁴ yao³-na¹, je² xi³ si¹qui³tson¹-na¹ nca³yi³je³ yao³-na¹, va³ca¹ nca³yi³je³ jo³ xa¹ cˀoa⁴ cji³ma³-ni³. Ya⁴ infierno nčhoa¹-ni³ xi³ va³ca¹ ni³jen³². 7 Nca³yi³je³ jo³ tjin¹ jco⁴ya³ cho⁴ xi³ tjin¹ cao⁴ ni⁴se³ cao⁴ ye⁴ cao⁴ cho⁴ jin³ na³nta¹ ma³ntˀe¹, cˀoa⁴ ni²ntˀe¹ xi³ cho⁴ta⁴son³ˀnte³ ˀmi²-na¹. 8 To⁴nca³ ni⁴jnco³-jin² cho⁴ta⁴ xi³ coan⁴-le⁴ si⁴²ntˀe¹ ni⁴jen⁴, nca³ je² ni³jen³² jnco³ cjoa⁴tsˀen⁴ xi³ tsi² tsa² ma³ ni²cˀe¹jyo². A³li² to⁴cˀoa⁴cji³ tjin¹-le⁴ xqui³toan¹ xi³ si¹cˀen³-ni³na¹. 9 Cao⁴ ni³jen³² chˀa²sje³je³ya³-nia¹ Ni³na¹ Nˀai³-na¹, cˀoa⁴ cao⁴ ni³jen³² no²cjoa⁴ˀaon³-ni³le⁴² cho⁴ta⁴ xi³ cˀoa⁴coan³ cjoan³ jo³ cji³ Ni³na¹. 10 Ti⁴je²-ni³ tsˀoa³ vi³tjo³-ni³ en¹nta³ cao⁴ en¹tsˀen⁴. ˀnti¹ntsˀe³, a³li²coi³ ma³chjen¹ nca³ cˀoi⁴-sˀin² ma³ je² cjoa⁴-vi⁴. 11 Jnco³ nca⁴jao⁴ a³ ti⁴ya⁴ vi³tjo³-ni³ na³nta¹tsje³ cao⁴ na³nta¹jnčha³. 12 ˀnti¹ntsˀe³ je² ya¹higo a³ va³-le⁴ to³ xi³ aceituna ˀmi², a³xo⁴ xca⁴to³tse⁴² a³ va³-le⁴ higo. Cˀoa⁴-ti⁴sˀin² ni⁴jnco³-jin² nca⁴jao⁴ na³nta¹ xi³ ti⁴ya⁴ sˀe³-ni³le⁴ na³nta¹jnčha³ cao⁴ na³nta¹tsje³.

13 ˀya¹-ni³ xi³ jon² xi³ chji⁴ne⁴ xi³ xˀin⁴cjoa⁴. Ca²ta³va³co¹ xa¹-le⁴ jo³-sˀin² nca³ nta³ fi²cao⁴ yao³-le⁴ cao⁴ cjoa⁴ˀi³nta³-jin³ xi³ tsˀe⁴ cjoa⁴ˀi³sen³ta³con². 14 Tsa² ni⁴ma⁴-no³ tjin¹-le⁴ cjoa⁴xin²ta³con² xi³ vao³ xi³ sja³, tsa² tjin¹-le⁴ cjoa⁴co²ntran⁴, a³li² chˀa²sje³nta³-jion²³ yao³-no³, ni⁴chˀa²sje³ nti³so³-jion²³ xi³ cjoa⁴qui²xi⁴. 15 A³li²coi³ ncˀa³ nčhoa¹-ni³ cjoa⁴ˀi³sen³ta³con² je²-vi⁴, to⁴ˀi⁴² tsˀe⁴ son³ˀnte³-vi⁴, tsˀe⁴ xi³ xa¹ cˀoa⁴cjoan³, tsˀe⁴ nai⁴². 16 Ya⁴ jña³ nca³ tjin¹ cjoa⁴xin²ta³con² cjoa⁴co²ntran⁴, ya⁴²-ve⁴ tjin¹ cjoa⁴si³ cao⁴ nca³yi³je³ cjoa⁴tsˀen⁴. 17 To⁴nca³ je² cjoa⁴ˀi³sen³ta³con² xi³ ncˀa³ nčhoa¹-ni³, ti¹tjon²-cjoan²la² tsje³, cˀia⁴ to⁴jvi³, i³nta³jin³, ntˀe¹, tse³ cjoa⁴ma⁴ta³con² xi³ tjin¹-le⁴, nta³ xa¹-le⁴, li²coi³ ve³sin³, li²coi³ nti³so³. 18 Je² cho⁴ta⁴ xi³ ma³-le⁴ si¹qui³njen³nchˀan¹jin³, je² ni¹ xi³ nchˀan¹-sˀin² vˀe¹ntje² cjoa⁴qui²xi⁴.