1 A³ tsi² tsa² ˀyao³, ntsˀe³, (nca³ fa³coa⁴ je² xi³ ve³ cjoa⁴te¹xo³ma³) nca³ je² cjoa⁴te¹xo³ma³ va³te¹xo³ma³-le⁴ cho⁴ta⁴ cˀia⁴ nca³ ti¹jna³con³-sa³. 2 Je² chjon⁴² xi³ je³chi³xan³ na³nqui³ ti¹jna³-le⁴ xˀin⁴-le⁴ jo³ tso² cjoa⁴te¹xo³ma³, cˀia⁴ nca³ tjen⁴ ti¹jna³con³-sa³ xˀin⁴-le⁴, to⁴nca³ tsa² cˀen³ xˀin⁴-le⁴ ti¹jna³ntai¹-le⁴ cjoa⁴te¹xo³ma³ xi³ tˀa³tsˀe⁴ xˀin⁴-le⁴. 3 Cˀoa⁴-sˀin² cˀia⁴ nca³ ti¹jna³con³ xˀin⁴-le⁴, tsa² tjin¹-le⁴ xˀin⁴ xi³ cja⁴ˀai¹ chjon⁴²cha³jnqui³tˀa³ ˀmi², to⁴nca³ tsa² cˀen³ xˀin⁴-le⁴, ti¹jna³ntai¹-le⁴ cjoa⁴te¹xo³ma³. Cˀia⁴ tsa² xˀin⁴ xi³ cja⁴ˀai¹ sˀe⁴-le⁴, a³li² chjon⁴²cha³jnqui³tˀa³-jin² ˀmi²-le⁴. 4 Cˀoa⁴-ti⁴sˀin² nca³ jon²-vi⁴, ntsˀe³, jo³-ni³ tsa² xi³ ti³yo³cˀaon³ tˀa³tsˀe⁴ cjoa⁴te¹xo³ma³-ve⁴ xi³ to⁴tˀa³tsˀe⁴ yao³-le⁴ Cristo, jme¹-ni³ nca³ tsˀe⁴ xi³ cja⁴ˀai¹ coan⁴-si¹nio³. Tsˀe⁴ coaon⁴³ je² xi³ ja³ˀa²ya³jin³-ni³le⁴ xi³ cˀen³, jme¹-ni³ nca³ coan⁴jcha¹jin³-si¹ni³na¹ cjoa⁴nta³ xi³ tˀa³tsˀe⁴ Ni³na¹. 5 Cˀia⁴ nca³ tsa³qui³yoa³² jo³ coan³ cjoan³ yao³-na¹, je² cjoa⁴chi⁴nca⁴-le⁴ je¹-ve⁴ xi³ coan³ to⁴tˀa³tsˀe⁴ cjoa⁴te¹xo³ma³, qui³si³xa¹jin³ nca³yi³je³ jco⁴ya³-le⁴ yao³-na¹, qui³si³jcha¹jin³-na¹ cjoa⁴ xi³ tˀa³tsˀe⁴ cjoa⁴vi³ya³. 6 To⁴nca³ ntˀai⁴-vi⁴ je³ji²tjo⁴ntai¹-le⁴² cjoa⁴te¹xo³ma³, nca³ jo³-ni³ tsa² je³ti³yo³cˀen³-le⁴² jña³-le⁴ xi³ tsa³qui³yo³nˀion¹-le⁴². Cˀoa⁴-sˀin² coan⁴chjen¹-na¹ jo³-ni³ tsa² cho⁴ˀnta¹ jo³-sˀin² tso² cjoa⁴cho⁴tse⁴ xi³ tsˀe⁴ Espíritu Santo, a³li²coi³ jo³-sˀin² tso² je² cjoa⁴jchi¹nca³ xi³ tji¹tˀa³ xon⁴.

7 Jme¹-ni³ xi³ coi⁴xoan¹-ˀni³. Je² cjoa⁴te¹xo³ma³-ve⁴, a³ je¹ ni¹. Ma³jain², ni⁴to⁴ˀi⁴tse¹-jin² cˀoa⁴tjin¹. To⁴nca³ an³ li²coi³ tsa³ˀve³ xi³ je¹ ˀmi², tsa² tsi² xi³ to⁴tˀa³tsˀe⁴ cjoa⁴te¹xo³ma³. Cˀoa⁴-ti⁴ li²coi³ tsa³ˀve³ xi³ cjoa⁴xin²ta³con², cˀia⁴ tsa² cjoa⁴te¹xo³ma³ li²coi³ cˀoa⁴qui³tso²: A³li² ma³xin²ta³con²-jin²³. 8 To⁴nca³ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴te¹xo³ma³. Cˀoa⁴-sˀin² qui³si³ncjin²-coan³ nca³yi³je³ jco⁴ya³ cjoa⁴chi⁴nca⁴. Cˀia⁴ tsa² tsin² cjoa⁴te¹xo³ma³ je² je¹ jo³-ni³ tsa² ti¹jna³cˀen³-ni¹. 9 Cˀoa⁴-sˀin² tsa³ca²te⁴jna³coan³ xi³jnco³ ni⁴čhjin³ tˀa³xin² cjoa²te¹xo³ma³, to⁴nca³ cˀia⁴ nca³ ja³ˀai³ cjoa⁴te¹xo³ma³-ve⁴, je² je¹-ve⁴ tsa³cˀe²jna³con³-ni¹, cˀoa⁴ an³ jo³-ni³ tsa² cˀen³-nia¹³. 10 Cˀoa⁴ coan³sjai³-na³ nca³ je² cjoa⁴te¹xo³ma³-ve⁴ xi³ tˀa³-tsˀe⁴ cjoa⁴vi³jna³chon³ cˀoa⁴coan³-na³ jo³-ni³ tsa² cjoa⁴-vi³ya³. 11 Nca⁴ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴-te¹xo³ma³. Je² je¹-ve⁴ tsa³cˀa²na⁴cha⁴-na³, cˀoa⁴ qui³si³cˀen³-na³ xi³ to⁴tˀa³tsˀe⁴ cjoa⁴te¹xo³ma³. 12 Cˀoa⁴-sˀin² nca³yi³je³ cjoa⁴te¹xo³ma³ ña³qui³ tsje³-ni¹, cˀoa⁴ tjin¹-le⁴ cjoa⁴qui²xi⁴, cˀoa⁴ nta³-ni¹. 13 Je² xi³ nta³-ve⁴ˀni³ a³ qui³si³cˀen³-na³. Ma³jain², to⁴nca³ je² je¹-ve⁴ qui³si³xa¹jin³-na³ cjoa⁴vi³ya³ xi³ to⁴tˀa³tsˀe⁴ xi³ nta³ tjin¹, jme¹-ni³ nca³ coan⁴tsen³-si¹ni³ nca³ je² xi³ je¹. Xi³ to⁴tˀa³tsˀe⁴ cjoa⁴te¹xo³ma³ je² je¹-ve⁴ nqui²sa⁴ nˀion¹ tjin¹-le⁴ je¹. 14 ˀya³-nia¹ nca³ je² cjoa⁴te¹xo³ma³ tsˀe⁴ Espíritu Santo, to⁴nca³ an³ to⁴xa¹ yao³ nia¹³. Qui³sa³te²na³tˀa³-le⁴ je¹-ve⁴ na³nqui³ ti²jna⁴-le⁴. 15 A³li²coi³ ma³cho⁴ya³-na³ jme³ xi³ sˀian³ an³-vi⁴, ni⁴-cˀoa⁴²-jin² sˀian³ je² xi³ me³-na³, to⁴nca³ je² xi³ chˀao³que⁴, je²-ve⁴ xi³ cˀoa⁴²sˀian³. 16 Cˀoa⁴ tsa² cˀoa⁴²sˀian³ je² xi³ tsi² tsa² coi³ me³-na³, an³ si³qui²xi⁴ya³nta³ nca³ nta³ tjin¹ je² cjoa⁴te¹xo³ma³. 17 Cˀoa⁴-sˀin² li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³ xi³ cˀoa⁴sˀin¹. 18 Cˀoa⁴ ˀve³-nia³ an³ nca³ tsi²jme³ xi³ nta³ tjin¹ xi³ ti¹jna³jin³-na³ (xi³ ti²xian³ xi³ ti¹jna³jin³ xi³ to⁴xa¹ yao³-na⁴ ni¹). Tjin¹-na³ cjoa⁴me³ta³con² nca³ cˀoa⁴²sˀian³ je² xi³ nta³ tjin¹, to⁴nca³ li²coi³ coi³cho²tjen⁴nqui³-le⁴ nca³ cˀoa⁴²sˀian³. 19 Nca⁴ tsi² tsa² cˀoa⁴sˀian³ je² xi³ nta³ tjin¹ xi³ me³-na³, to⁴nca³ je² xi³ chˀao³ tjin¹-ve⁴ xi³ tsi²coi³ me³-na³, je²-vi⁴ xi³ cˀoa⁴sˀian³. 20 Cˀoa⁴ tsa² cˀoa⁴sˀian³ xi³ tsi²coi³ me³-na³, li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³, xi³ cˀoa⁴sˀin¹. 21 Cˀoa⁴-sˀin² ma³sjai³-na³ je² cjoa⁴te¹xo³ma³-vi⁴, cˀia⁴ nca³ me³-na³ an³ nca³ cˀoa⁴sˀian³ xi³ nta³ tjin¹, je² xi³ chˀao³ tjin¹ ti¹jna³jin³-na³. 22 Tjin¹-na³ cjoa⁴tsjoa³ xi³ tˀa³tsˀe⁴ cjoa⁴te¹xo³ma³-le⁴ Ni³na¹, jo³-sˀin² tjin¹ ni⁴ma⁴-na⁴. 23 To⁴nca³ ˀve³ nqui²jnco³ cjoa⁴te¹xo³ma³ i⁴jin³ nca³yi³je³ jco⁴ya³-le⁴ yao³-na⁴ xi³ cjan¹cao⁴ je² cjoa⁴te¹xo³ma³ xi³ tsˀe⁴ cjoa⁴fa³ˀai³tsjen³-na⁴. Je²-vi⁴ xi³ si¹cˀe¹jna³tˀa³nˀion¹-na³ je² cjoa⁴te¹xo³ma³ xi³ tsˀe⁴ je¹ xi³ ti¹jna³jin³ nca³yi³je³ jco⁴ya³-le⁴ yao³-na⁴. 24 Ma⁴-xo¹nia³ an³-vi⁴. ˀya¹ xi³ si⁴²cˀe¹jna³ntai¹-ni³na³ yao³-na⁴ xi³ tsˀe⁴ cjoa⁴vi³ya³-vi⁴. 25 Tsjoa³-le⁴ cjoa⁴nta³ Ni³na¹ xi³ to⁴tˀa³tsˀe⁴ Jesucristo Nai³-na¹. Cˀoa⁴-sˀin² ti⁴ˀan³-nia³ cao⁴ cjoa⁴fa³ˀai³tsjen³-na⁴ ma³chjen¹-le⁴ cjoa⁴te¹xo³ma³-le⁴ Ni³na¹, to⁴nca³ cao⁴ yao³-na⁴ an³ ma³chjen¹-le⁴ cjoa⁴te¹xo³ma³-le⁴ je¹.