1 Migkeǥiyan ni Samuel si Saul te, “Iyan a zengan midsuǥù te Nengazen te kebpetiǥisi te lana ziyà te kenikew he tuus te mibpilì ka iyan he hadì te keet-etawan din he menge Israilihanen. Umbe pemineǥa nu heini is lalag te Nengazen he Mekeǥeǥehem: 2 ‘Edsilutan ku is menge Amalikanhen tenged te kedsurunga zan te menge Israilihanen te kebpuun dan diyà te Ehipto. 3 Umbe ǥuntaan, surunga niw is Amalikanhen! Dezeeti niw is langun he zutun te kandan. Penhimetayi is menge maama zan, menge vahi, menge vatà, minsan is edsusu pa, apil is menge vaka, kerehidu, kemilyu, wey asnu.’ ”

4 Umbe, mibpemesuǥuan ni Saul is menge sundaru te Telaim. Duen 200,000 he menge sundaru he netiǥum, wey zuen 10,000 zaan he ebpuun te Juda. 5 Ne midhendiyà ensi Saul te inged te Amalek, ne ziyè dan te zal-ug is ed-ayan. 6 Mibpeuwit si Saul te lalag diyà te menge Kinhanen te, “Genat kew! Ewai niw heeyan is menge Amalikanhen para kenè ku sikiyu ikeapil te edhimatey duma kandan, su mid-uǥupan niw is menge Israilihanen te kegawas dan puun te Ehipto.” Ne zutun mibpekeziyù is menge Kinhanen. 7 Ne midsurung eni Saul is menge Amalikanhen puun te Havila taman te Shur, he zapit te edsilaan te Ehipto. 8-9 Nengepatey zan is langun he menge Amalikanhen, gawas ki Agag he hadì. Wazè dan mulà himetayi piru mibihag dan dà. Wazè dan daan penhimetayi is kerehidu he meupiya is lawa zin wey is menge vaka, minsan is menge nati. Is langun he meupiya ne wazè dan himetayi, iyan dan dà midhimetayan kes kanà memeupiya wey kenè en egkepulusan.

10 Dutun he timpu migkeǥiyan te Nengazen si Samuel te, 11 “Mibesulan ku is kedhimuwa ku ki Saul he hadì, tenged te mid-iniyuǥan e zin ne wazè din daan tumana is suǥù ku.” Hein nezineg haazà ni Samuel, utew sikandin nepauk, umbe midhangyù sikandin diyà te Nengazen te tivuuk he kezukileman.

12 Meselem utew zutun te sunud he andew, migenat sikandin is ebpekidhinguma ki Saul. Piru nezineg din te, “Midhendiyà si Saul te Carmel su ibpehitindeg din is ledawan he para mevantug sikandin, ne nepasad ne midlaus sikandin diyà te Gilgal.”

13 Mibeyaan ni Samuel si Saul. Ne hein neked-ehè dan, migkeǥiyan ni Saul te, “Deyzey ke tuvazi ka te Nengazen! Su midtuman ku is menge suǥù din.” 14 Midtavak si Samuel te, “Emun tutuu he midtuman nu is suǥù te Nengazen, ne maan is duen ku egkezineg he menge vaka wey kerehidu he ed-engà?” 15 Midtavak si Saul te, “Menge vaka wey kerehidu he pinekemeupiya he mid-uwit te menge sundaru he ebpuun te Amalikanhen. Wazè dan himetayi su ibpemuhat dan diyà te Nengazen he iyan Megbevayè nu, piru is duma midpenhimetayan dey emina.” 16 Midtavak si Samuel te, “Hustu en! Edtudtulan ku sikew ke hengkey is migkaǥi te Nengazen kedì geina he mezukilem.” Midtavak si Saul te, “Tudtuli a.” 17 Migkaǥi si Samuel te, “Minsan mid-isip nu zengan is keugelingen nu he egkaayuayu, mibpilì ka ǥihapun te Nengazen he egkehimu he hadì te mge tribu te Israel. 18 Wey midsuǥù ke zin. Ke sikandin te, ‘Purungi nu zèdeeti is menge Amalikanhen, is mekesesalà he menge etew. Tebeka nu sikandan taman te egkeamin sikandan he ebpematey.’ 19 Piru maan is wazè nu pezumdumahi is Nengazen? Maan is mibpehimulusan niw te ebpenguwa is menge azen dan? Maan is mibeelan nu heini is mezaat he vaal ziyà te edtuvangan te Nengazen?”

20 Midtavak si Saul te, “Piru mibpezumdumahan ku is Nengazen. Mibeelan ku is mibpeveelan din kedì. Mibihag ku si Agag he hadì te menge Amalikanhen, ne midhimetayan ku is langun he sakup din. 21 Piru mid-uwit is menge sundaru ku te pinekemeupiya he menge kerehidu wey menge vaka he edhimetayan en daan pezem. Mid-uwit kayi te Gilgal para ibpemuhat diyà te Nengazen he Megbevayè nu.” 22 Midtavak si Samuel te, “Igkelipey ves te Nengazen is kebpemuhat niw kenà is kebpezumazuma kandin? Meupiya is kebpezumazuma te Nengazen kenà is kebpemuhat. Meupiya pa is kebpemineg kandin kenà is kebpemuhat te menge melambeg ke kerehidu. 23 Is kebpekidsukulà te Nengazen iring ded kezaat te kebpeveveyilan, ne is kegkemesinupaken iring ded kezaat te ked-azap te zuma he menge ed-ezapen. Geina te inselikwey nu is suǥù te Nengazen, idselikwey ke zin daan pinaaǥi te kegkeewaa kenikew he hadì.”

24 Ne migkaǥi si Saul ziyà te ki Samuel te, “Nekesalà a; midsupak ku is suǥù te Nengazen wey is menge migkaǥi nu kayi te kedì. Nahandek a te menge etew, umbe mibpezumdumahan ku sikandan. 25 Guntaan kehizuwi a ne peseyluwa a kenikew te menge salè ku, ne zuma ka kedì su ed-ezapen ku is Nengazen.” 26 Piru midtavak si Samuel te, “Kenà a eduma kenikew. Inselikwey nu is suǥù te Nengazen, umbe inselikwey ke zin he iyan hadì te Israel.”

27 Hein mid-iniyug en si Samuel su egenat en, migewezan ni Saul is kilid te kumbalè din, ne nevindas heini. 28 Migkeǥiyan ni Samuel te, “Iring kayi is egkeulaula kenikew: egkuwaan guntaan te heini he andew te Nengazen diyà te kenikew is ginhedian te Israel ne ibeǥey zin te iring nu zed he Israilihanen he meupiya pa kenà sikew. 29 Is Megbevayà utew lavew he ebentuǥen te Israel ne kenà teruen ne kenà daan egkehalin is isip din, su kenè man iring te etew he egkahalinhalin is isip.” 30 Midtavak si Saul te, “Nekesalà a. Piru edhangyù a he kenè nu zèdeeti is dengeg ku kayi te menge ebpemendumala te keet-etawan ku wey etuvangan te tivuuk he Israel pinaaǥi te kedumahi nu kedì te ked-azap te Nengazen he Megbevayè nu.” 31 Umbe, miduma si Samuel ki Saul, ne mid-azap si Saul te Nengazen.

32 Migkaǥi si Samuel te, “Guntaan uwita niw kayi te kedì si Agag he hadì te menge Amalikanhen.” Mid-uvey si Agag diyà te ki Samuel he wazà kulbai. Kunaan din ke kenà sikandin edhimetayan. 33 Ne zutun migkaǥi si Samuel te, “Guntaan utew mezakel is menge iney he neewaan te menge anak tenged te kebpemenhimatey nu, edhimetayan ku sikew su wey meewai is iney nu zaan te anak.” Ne zutun midhimetayan ni Samuel si Agag diyà te etuvangan te Nengazen diyà te Gilgal. 34 Ne midlikù si Samuel ziyà te Rama, ne si Saul ne mid-ulì daan diyà te Gibea. 35 Puun dutun wazè en mebpekidhinguma si Samuel ki Saul taman te minatey si Samuel, piru ingkeseeng ni Samuel is neulaula ni Saul. Nekedsendit is Nengazen te kedhimuwa zin ki Saul he hadì te Israel.