26
Wazè en Maan Himetayi ni David si Saul
Sevaha zutun he andew, duen menge tig-Zif he midhendiyà te ki Saul ziyà te Gibea ne migkaǥi te, “Diyà si David te vuvungan he Hakila med-eles, he zehipag te Jeshimon.” Ne midhendiyà si Saul te sibsivayan te Zif su ebpen-ahaan din si David. Miduma zin is 3,000 he menge sakup din he mibpilì din diyà te Israel. Diyè dan megkampu te uvey te zalan diyà te vuntud he Hakila, he zehipag te edsilaan te Jeshimon. Si David diyà mulà med-ubpà te sibsivayan. Hein netuenan ni David he nenelukun kandin si Saul zutun, midsuǥù sikandin te menge tigpeniid, umbe netuenan din he nekeume en si Saul zutun.
Ne midhendiyà si David te lugar he migkempuwan ni Saul. Neehè din dutun he nekelipezeng si Saul wey si Abner he anak ni Ner, he peremandar te menge sundaru. Egkepeliǥuyan si Saul te menge sundaru zin he nemekelipezeng daan. Migkeǥiyan ni David si Abimelec he Hitihanen wey si Abishai he anak ni Zeruya wey suled ni Joab te, “Hentei keniyu is eduma kedì te edhendutun te kampu ni Saul?” Midtavak si Abishai te, “Iyan a eduma.” Umbe, zutun he kezukileman, migenat si David wey si Abishai pehendiyà te kampu ni Saul ne neehè dan he nekelipezeng si Saul, ne is bangkew zin ne nekepepasek dutun te tanà he uvey te ulu zin. Si Abner wey zuma he menge sundaru ne nemekelipezeng diyà te nekelingut kandin. Migkeǥiyan ni Abishai si David te, “Imbeǥey en te Megbevayà kenikew is kuntada nu te heini he andew. Guntaan tuǥuti a kenikew he ebpilaken ku sikandin te vangkew. Ibpezeket ku sikandin dutun te tanà te senge pilak dà.” Midtavak ni David si Abishai te, “Kenè nu himetayi sikandin! Su edsilutan te Nengazen is edhimatey te mibpilì din he hadì. 10 Ibpesarig ku he edsilutan sikandin te uuyag he Nengazen, ne iyan is Nengazen edhimatey kandin, etawa ebpatey sikandin te daru etawa tebek. 11 Is Nengazen kenè din idtuǥut he iyan a ebpekepatey te mibpilì din he hadì. Egkuwaan te zà heini is bangkew zin wey heini is teleǥuey zin te wahig he kayi te ulunan din, ne egenat kid.” 12 Ne migkuwa ni David kes bangkew wey kes teleǥuey te wahig he zutun te ulunan ni Saul, ne migenat dan. Wazà nekaahà wey netau te neulaula; wazà nepukew kandan tenged te mibpengelinteuwan te Nengazen he utew zan mehurep.
13 Ne midhendiyà ensi David te divaluy zutun te menge suǥud ne midhendiyà sikandin te buvungan he malù meziyù dutun te migkempuwan ni Saul. 14 Migkulahì ni David ensi Abner, ne migkeǥiyan din kes peremandar zutun te menge sundaru ni Saul he si Abner te, “Abner, egkezineg e ve kenikew?” Midtavak si Abner te, “Hentei ka? Hengkey is tuyù nu te hadì?” 15 Midtavak si David te, “Kenè be iyan ke man kes pinekemevurut he etew te Israel? Maan is wazè nu meventayi heeyan is hadì he egalen nu? Duen midhengkeniyan he edhimatey kandin! 16 Kenà meupiya heini is kebpesegdana nu te hadì. Ibpenangdù ku ziyà te uuyag he Megbevayà he engayan ka he ebpatey wey is menge sakup nu, su wazè niw bentayi is egalen niw, he mibpilì te Nengazen he hadì. Ahaa nu ke keniyan ded be kes bangkew te hadì wey kes teleǥuey te wahig he keniyan te ulunan din.” 17 Nekilala ni Saul is laǥeng ni David, umbe migkaǥi sikandin te, “David, mama, iyan ke ves heeyan?” Midtavak si David te, “Uya, iyan a heini, Mahal he Hadì. 18 Maan is edel-asen nu is suluǥuen nu? Hengkey ves is mezaat he neveelan ku? 19 Mahal he Hadì, pemineǥa nu is egkeǥiyen ku. Emun iyan is Nengazen edsuǥù kenikew te kedhimatey kedì, deyzey pezem ke egkehizuwan e zin pinaaǥi te kedewata zin te pemuhat ku. Ne emun ketau zà te etew, ne deyzey pezem ke rewaki sikandan te Nengazen. Su impepelaǥuy e zan puun te tanà he gaked te Nengazen ne migkeǥiyan e zan te ibpesilbi ad te zuma he menge ed-ezapen. 20 Kenè nu ituǥut he ziyà a ebpatey te zuma he tanà, he meziyù te Nengazen. Sikew is hadì te Israel, maan is ebpen-ahaan a kenikew he iring e zè man pezem te tilema? Maan is edel-asen a kenikew he iring te tagbis diyà te vuntud?”
21 Migkaǥi si Saul te, “Nekesalà a. Likù ka kayi te kedì David, anak ku, ne kenè ku en ed-um-umanen is mibeelan ku kenikew, su wazà a kenikew himetayi. Henduen a te vuneg te mibeelan ku, ne utew ad iyan nesayep.” 22 Midtavak si David te, “Heini zed kes bangkew nu, ipekuwa nu heini te sevaha he sakup nu. 23 Imbeǥey ka te Nengazen kedì guntaan he andew, piru wazè ku zà sikew himetayi su iyan ka mibpilì te Nengazen he hadì. Te heini he mibeelan ku, edtuvazan a te Nengazen, su iyan sikandin ebales dutun te menge metazeng wey menge metinumanen. 24 Guntaan he andew, mibpekeveǥat ku is untung nu, deyzey zaan pezem ke ebpekeveǥaten din is untung ku ne edluwasen e zin te langun he kelised.” 25 Ne migkeǥiyan ni Saul si David te, “Berakat he tuvazi ka te Megbevayà, anak ku. Mezakel pa is ereg he ebeelan nu, ne ebmezeeǥen ka.” Ne zutun migenat si David, ne si Saul ne mid-ulì daan.