1 Dutun midtiǥum te menge Filistihanen is langun he menge sundaru zan diyà te Afek, ne is menge Israilihanen ne ziyè dan megkampu te serebseb te Jezreel. 2 Dutun te kemulu edmartsa is menge pengulu te menge Filistihanen duma te menge sundaru zan he migrupu zan te ginatus wey linibu, midsunud daan dutun si David wey menge sakup din duma ki hadì Akish. 3 Ne zutun mid-insaan te menge peremandar te menge Filistihanen si Akish te, “Hengkey ves is ebeelan kayi te menge Hebriyuhanen?” Midtavak si Akish te, “Iyan heini si David he upisyal ni Hadì Saul he hadì te Israel. Subre en he senge-tuig is kebpekeduma zey wey puun dà te ked-awè din diyà te ki Saul taman guntaan ne wazà neehè ku he mezaat he mibeelan din.” 4 Piru nengepauk is menge peremandar te menge Filistihanen. Ke sikandan te, “Ipelikù heeyan he etew ziyà te lugar he imbeǥey nu kandin. Su kenà ereg he eduma sikandin kenitew te ebpekidtebek, su kela ke unaya kiw zin te edhimatey para maawà is kegkepeuki kandin te egalen din. 5 Henduen be te iyan heini kes mibantug te menge vahi te Israel hein ebpemenayew sikandan wey ebpemenganta te, ‘Tignengkelibu is nepatey ni Saul, piru is ki David mulà tigsepulù he libu’?”

6 Umbe, impehendiyà ni Akish si David te kandin ne migkeǥiyan din te, “Tutuu is egkeǥiyen ku kenikew ǥuntaan kayi te etuvangan te uuyag he Nengazen he egkeseriǥan ka iyan, ne egkesuatan ku pezem he meduma ka kedì te ebpekidtebek, su puun te keduzuma nu kedì taman guntaan wazè ku naahà he mezaat he vaal nu. Piru is duma he menge egalen ne kenè dan ebpekesarig kenikew. 7 Umbe ulì ke en, wey kenè ka mebaal te kenè dan egkesuatan. Sigi, meupiya is kedhipanew nu.” 8 Piru mid-insà si David te, “Hengkey ves is neveelan ku he salà puun pa te kedumazuma ku kenikew taman guntaan, Mahal he Hadì? Maan is kenà a ebpekezuma te kebpekidtebek te kuntada nu?” 9 Midtavak si Akish te, “Netuenan ku he meupiya ka iring te menge belinsuǥuen te Megbevayà. Piru is menge peremandar te menge sundaru ku ne kenà egkesuat he mekezumaa te kebpekidtebek. 10 Umbe, te egkepkepawà ne enew ke en duma is menge sakup nu ne ulì kew.”

11 Egkepkepawà ne mid-enew si David wey is menge sakup din, ne midlikù dan diyà te tanà te Filistihanen, ne is menge Filistihanen mulà nenhendiyè dan te Jezreel.