1 “Emun edhipanew kew is ebpekidtebek te menge kuntada niw, ne egkeehè niw is menge kudè dan, menge kerwahi wey menge sundaru zan he edhuna he mahabet te keniyu, kenè niw sikandan ikahandek, su zuma niw is Nengazen he Megbevayè niw he mibpeǥawas keniyu ziyà te Ehipto. 2 Dutun te kenè kew pa edhendiyà te edtebekan medhitindeg dèpa ziyà te teliwazà is memumuhat ne keǥiyi zin is menge sundaru te, 3 ‘Pemineg kew is menge etew te Israel. Kenè kew mahandek kayi te kebpekidtebek niw ǥuntaan. Mebpekevurut kew wey kenè kew peteranta. 4 Su eduma keniyu is Nengazen he Megbevayè niw! Ebpekidtebek sikandin para keniyu kuntra te menge kuntada niw ne ibpezaag din keniyu sikandan!’

5 “Ne zutun egkaǥi is menge upisyal te menge sundaru te, ‘Ke zuen keniyu veǥu pa he nekevangun te valey zin he wazè din pa ikepehinungud diyà te Nengazen, ne med-ulì sikandin su kela ke mepatey sikandin te tebek ne sengeeetew en is ebpekepehinungud duen te valey zin. 6 Emun duen keniyu nekepemula te paras he wazè din pa mepulusi is beǥas kayi, med-ulì sikandin su kela ke mepatey sikandin te tebek ne sengeeetew is egkepulusan dutun. 7 Ke zuen keniyu hapit en ebpengesawa, med-ulì sikandin su kela ke mepatey sikandin te tebek ne sengeeetew is ebpekepengesawa te ed-esewaan din!’

8 “Ne megkaǥi pa is menge upisyal te, ‘Emun duen keniyu egkahandek etawa egkulbaan, ne med-ulì sikandin su kela ke elin kulbai is menge zuma zin.’ 9 Ne emun ebpekepasad en he egkaǥi haazà is menge upisyal ziyà te menge sundaru, ne mebpilì dan te menge peremandar he ebpengulu te menge sundaru.

10 “Emun edsurungen niw is sevaha he inged, ne veǥayi niw te timpu is menge meǥinged te kedsurindir. 11 Emun edsurindir sikandan ne ebpuwasan dan is pultahan te inged dan para keniyu, ne uripena niw sikandan is langun ne ipeterebahu niw sikandan te para keniyu mesuat dan se kenà. 12 Iyan, emun kenè dan edsurindir su ebpekidtebek sikandan keniyu, lusuzi niw en sikandan. 13 Ne emun ibeǥey en sikandan keniyu te Nengazen he Megbevayè niw, penhimetayi niw is langun he menge maama kandan. 14 Piru egkehimu ke ebihaǥen niw is menge vahi, is menge vatà, wey menge uyaǥen dan, ne egkehimu ke egkuwaan niw is langun he menge azen he zutun te inged. Gemita niw heini he menge azen is imbeǥey te Nengazen he Megbevayè niw keniyu he ebpuun te menge kuntada niw. 15 Diyè niw zà heini veeli te meziyù he menge inged he wazà mesakup duen te tanà he ed-engkenen niw. 16 Piru is menge etew ziyà te menge inged he ibeǥey keniyu te Nengazen he Megbevayè niw su wey niw mepengevilin, geraa niw is langun. 17 Purungi niw zèdeeti is menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen, sumalà te insuǥù keniyu te Nengazen he Megbevayè niw. 18 Su emun kenè niw sikandan pudu egeraa, ne ibpenurù dan keniyu is langun he utew mezaat he menge vaal zan he ebeelan dan ke ed-ezapen dan is kandan he ebpen-ezapen, ne tenged kayi ebpekesalè kew ziyà te Nengazen he Megbevayè niw. 19 Emun egkeuǥet niw egkaaǥew is sevaha he inged, kenè niw pemilaya is menge kayu. Keena niw is menge veǥas kayi piru kenè niw pemilaya. Su kenè niw sikandan kuntada he ereg he edezeetan. 20 Piru egkehimu mulà ke ebpemilayen niw is menge kayu he kenà egkekaan is beǥas dan, ne egkeǥamit niw heini he himan para wazà ebpekepelaǥuy zutun te inged taman te egkaaǥew niw haazà.